ئێرانەنە سزاو جە قەنارەدای سەرو یەرۍ هاموڵاتیا کوردیرە سەپیا
دادگاو دۆڵەتو ئێرانی بە تۆمەتو سیخوڕی سزاو جە قەنارەدایش سەرو یەرۍ هاموڵاتیا کوردیرە سەپنا.
تۆڕەو ڕێکوزیایەکا مافو مرۆڤو کوردەسانی وەڵاش کەرڎۆ، یەرۍ هاموڵاتیێ کوردی جە لایەنو دادگاکا دۆڵەتو ئێرانیوە سزاو جە قەنارەدایشا سەرەرە سەپیان، ماچایچ، ئا هاموڵاتیۍ بە تۆمەتو فاڕایۆ کەلوپەلی بە مەبەسو کوشتەی موحسین فەخری زادەی زانای ئەتۆمی ئێرانی سزادریێنۍ.
تۆڕۆو ڕێکوزیاکا مافو مرۆڤو کوردەسانی سەبارەت بە ئاژەو یەرۍ هاموڵاتیا زینانییکریایا کوردی جە لایەنو ڕژێمو ئێرانیوە پی جۆرە زانیاریشا وست ڕووە.
جە هەواڵەکەنە ئامان، یەرۍ هاموڵاتیۍ کوردی بە نامەکا ئیدریس ئالی و ئازاد شوجاعی خەڵکو دەگاو دۆڵەگەرمی جە سەردەشت و ڕەسوڵ ئەحمەد محەمەد خەڵکو پانیشتوو کوردەسانی جە لایەنو لقو دووۍ دادگاو ئینقلابی ڕژێمو ئێرانی ورمێنە سزاو جە قەنارەدایشا سەرەرە سەپیا.
ئاماژە پانەیچ کریان، ئا یەرە كەسە بە تۆمەتۆو 'سیخوڕیکەردەی' پەی ئیسرائیلی و فاڕایۆ کەلوپەلی بە مەبەسو کوشتەی موحسین فەخری زادەی زاناو ئەتۆمی ئێرانی سزا دریێنۍ.
ماچایچ، ئی یەرە هاموڵاتییە جە ماوەو دەسبەسەرکەردەیشانە بە مەبەسو هۆرگێرتەی 'دڎاننیایپۆرەی زۆرەملێ' ئەشکەنجەی جەسەیی و دەروونی دریێنۍ.
هامكات، جە مانگۆو حوزەیرانو ٢٠٢٣، ئیدریس ئالی، ئازاد شوجاعی و ڕەسوڵ ئەحمەد محەمەد جە لایەنو دەزگا ئەمنییەکاو ئێرانیوە گیریۍ و ڕەوانەو زینانو ڕاوەبەرایەتی هەواڵگری ورمێ کریۍ.
یاگۍ ئاماژەیەنە، جە ٦و تشرینو دووەمو ئێساڵی ئەسغەر جەهانگیر واتەواچو ئەنجومەنو دادوەری ئێرانی ئەرەیاۋنابێش، سزاو جە قەنارەدای سەرو یەرۍ تۆمەتبارا بەشدار جە تیرۆرکەردەی موحسین فەخری زادەی زانای ئەتۆمی وڵاتەكەیمارە سەپیان، هەرپاسە هەشت کەسۍ سەرو ئا هەرمانە تیرۆرستیۍ گیریێنۍ و هەڵای کەیسو بەشێ چانیشا یەکلایی نەکریانۆ.
