ئۆزگور ئەرۆڵ، یۆ جە پارێزنەرا نووسینگەو یاسایی سەدەی، یاڎش ئارڎۆ کە تورکیا ماوەو ١٠ ساڵان قەرارەکەو دادگاو مافو مرۆڤو ئۆروپایش جابەجێ نەکەردەن و واتش: "سیستەمو ئیمرالی کە ٢٦ ساڵێن بەردەواما، ئیتر مشۆم قبوڵ نەکریۆ."

 ئۆزگور ئەرۆڵ، یۆ جە پارێزنەراو نووسینگەو یاسایی سەدەی، چنی ئاژانسوو هەواڵوو فوراتی قسێش کەرڎۍ و ئەرەیاۋناش، هەر چێوۍ جە ئیمرالینە ڕووەبڎۆ کاریگەریی جددی سەرو سیاسەتو تورکیای و کوردەسانی مکەرۆ و یەکسەری بۆ بە ڕۆژەڤ و بۆ بە مەڵامەتوو قسەوباسی سیاسی و کۆمەڵایەتی، بێگومان ئانەیچ عیلاقەش بە پێگەو ۋێشۆ هەن."

پارێزنەر ئەرۆل سەرنجش وست سەرو دیڎارەکەو عومەر ئۆجالانی جە ئیمرالینە و واتش: "دماو چوار ساڵا پەی یوەمجاری دیڎار ئەنجامدریا، دمایین جار کە بنەیانەو ئێژا ئۆجالانی چنیش دیڎارشا ئەنجامدا، ساڵۆو ٢٠٢٠ ی بۍ، دماو چوار ساڵا بنەیانەکەش تاواشا جارێوەتەر چنیش دیڎار ئەنجام نڎا چا کاتۆ تا ئیساتۍ پارێزنەرەکێش نەتاوانشا دیڎار ئەنجام بڎا، هامکات زینانیا تەری چا ڕوۆن بریێنۍ ئیمرالی، ڕا نەڎریێنە چەمشا بە پارێزنەرەکاشا گنۆ."

دووۍ خاڵۍ سەرەکیۍ کە دەس نیشانکریۍ گرنگێنۍ

 ئۆزگور ئەرۆڵ ئا دووە خاڵە سەرەکیۍ کە چی دیڎارەنە ئاماژەشا پنەکریان یاڎۍ ئاوردۍ و واتش: "بەتایبەت ئا ئاماژە پنەدایەی کە ئێژا ئۆجالان واتەبێش 'من هەرەکەتی کردەیی و تیۆری ئانەیم هەن کە پرسو کوردی چارەسەر بکەرو، گرنگا، جوابێوە جدییا پەی گفتوگۆیەکا ئیساتۍ. بێگومان ئەگەر هەلومەرج بڕەخسیۆ. دووەم ئاماژە ئانە بۍ کە واتەبێش گۆشەگیری بەردەواما.

دیڎارو بنەیانەی پا مەعنۍ نمۍ کە گۆشەگیری هۆرگیریان، ئشیۍ دیڎارو پارێزنەرا ڕاش ۋنە نەگیریێبیۍ، بەڵام دیارا چی سیستەمەنە هیچ فاڕیایۍ نەکریان. بە پاو بڕۍ ئاژەی سیاسی و ئۆتۆنۆمی، ئێمە نمەزانمۍ ئا شەرتۍ کە زینانیێش چا چنە مژیۋا چنینا، پۊکەی نمەتاومۍ جوابێوە ڕاس پەی ڕای گرڎیی وەڵا بکەرمێوە. سەرو ئی بنەمایۍ گۆشەگیری بەردەواما، گرنگا چانەی بیاومێنە کە هەڵای هیچ فاڕیایۍ ڕووەش نەڎان. ئێمە مزانمۍ ئی سزۍ هەوڵێوە یاساییا پەی پاساو ئاردەیۆ قەرارێوە ئیداریی، بەڵام جە لایەنی سیاسیوە کۆمەڵایەتی نییا."

مافو هیوای ١٠ ساڵێن ڕۆژەڤەنە نەبیەن

پارێزنەر ئەرۆل یاڎش ئاوردۆ کە قەرارو 'مافو هیوا'ی جە ساڵۆو ٢٠١٤یۆ جە لایەنو DMME بەرشیەن، ماوەو ١٠ ساڵان جابەجێ نەکریان و واتش: "جە ساڵۆو ١٩٩٩، دماو ئانەی ئێژا ئۆجالان سزاش سەرەرە سەپیا، دماتەر سزاو جە قەنارەدای هۆرشێویاوە و زینانی هەتاهەتایی سەپیا سەرشەرە ئانۍ چا کاتەنە ئی قەراریە گێرتێنۍ پا ڕژێمەیە نمەتاوا ئازادۍ با، نمەتاوا ئیسفاڎە جە ئەگەرو پارێزبەندی و مافو هیوای هۆرگێرا. دژو ئا قەراریە جە ساڵۆو ٢٠٠٠ ینە داواکاریێوە پێشکەش بە DMME کریا، ساڵۆو ٢٠١٤، DMME قەرارشدا کە قەڎەغەکەردەی ئەشکەنجەی بە شێوێوە ناڕەوا بەکار بریان واتە پاشێل کاری کریان، پۆکەی جە ساڵۆو ٢٠١٤بە دمایۆ ماوەو ١٠ساڵان قەرارو مافو هیوای کە جە لایەنو DMME یۆ ئەرەیاۋییان جە لایەنو حکومەتو تورکیایۆ جە یاگۍ ۋێشەنە جابەجێ نەکریان.

ئیتر هۆرگێرتەی گۆشەگیری وەسۍ نییا

سیستەمو ئیمرالی کە نزیکەو ٢٦ ساڵان بەردەواما، ئیتر قبوڵکریا نییا. چی هەلومەرجەنە پەنەوازا زەرەرە جەسەیی و تەندروسییەکۍ سەپنای زینانی جە ماوەو ئا ٢٦ ساڵەینە ۋەروچەما بگیریۆ. کاتێ ئینۍ گرڎ ۋەرچەم گیریا، کریۆ سیستەمو گۆشەگیری ئیمرالی هۆرشێویۆوە. لابەردەی سیستەمو گۆشەگیریی ئیمرالی بە ئەنجامدای دووۍ دیڎارا چنی پارێزنەرا یان یەرۍ دیڎارۍ چنی بنەیانەکەی نمەیاوۆ ئەنجام. هەنگامەی سەرەکیە ئانێنە کە چی کاتەنە کە گنمۍ دلۍ  ٢٦ەمین ساڵۆو بەدیل گێرتەیۆ، مشۆم ئازادی جەسەیی ئێژا عەبدوڵا ئۆجالانی جە ڕۆژەڤەنە بۆ. مافو هیوای پېسە یۆ جە بنەما یاساییەکا ئی مژاریە هەمان دەرەنجامش هەن. هامکات پەی ئانەی بتاوۆ جە چارەسەرکەردەی پرسو کوردینە دەورۍ عال گێڵنۆ مشۆم هەلومەرجی ئازادییش پەی مەیسەر بکریۆ."