دما بە دماو ۋەرفراوانتەربیەی هجوومە ئەرەگیریەکا دەوڵەتوو ئەرەگیرو تورکی سەروو ۋەرنیشتوو کوردسانی، وە دەسپنەکەردەیۆ ئۆپراسیۆنە سەروازییە ئەرەگیریەکا سەروو پانیشتوو کوردسانی و هەوڵدای پەی هۊرگیسناو جەنگی جە ۋەرا ۋەروو گەریلاکاو ئازاڎیی کوردسانینە. تا مۍ هەڵوێس و ناڕەزاییەکۍ سەروو ئاستی سیاسی و خەڵکوو پانیشتوو کوردسانی ۋەرفراوانتەر بۆنە، پەی ئینەیچ گرڎ هەوڵێوە ئەرەگیری و هامکاریکەردەی دەوڵەتوو تورکی شەرمەزار مکریا و گرڎوو ڕوانگەکا پەی ئانەینە کە دژوو ئی ئەرەگیریا پێکئاوردەی 'یەک دەنگی و ستراتیجی نەتەوەیی' پەنەوازیێوە ئی قۆناغەینە.

پەیوەس پی پێشئامایاوە هامسەرۆکەو کۆنگرەو نەتەوەیی کوردسانی (کەنەکە) زەینەب مورادە پەی ئاژانسوو هەواڵوو فوراتی (ANF)ی قسێش کەردۍ و ئاماژەش بە هەستیاری ئی قۆناغە تاریخیۍ گەلو کوردی کەرد و واتش: "موینمۍ هێزە هەرێمی و میان نەتەوەییەکۍ بە گرڎ شێوێوە ئینۍ پیلانگێڵنینە پەی دلێنەبەردەی دەسەکەوتەکا گەلو کوردی و ئاستەنگکەردەی ئا دەرفەتە تاریخیا کە مەیانە ڕاو گەلو کوردی."

مورادە جە قسەکاشەنە ئاماژەش بە ئۆپراسیۆنە ئەرەگیریەکا دەوڵەتوو ئەرەگیری تورکی کەردو  واتش: "تۆپراسیۆنە ئەرەگیریەکۍ دەوڵەتوو تورکی ڕۆ بە ڕۆ ۋەرفراوانتەرۍ با. دەوڵەتوو تورکی تەنیا بە ئۆپراسیۆنی سەروازیی نەمردانۆ، بەڵکم هجوومەکێش سەروو ئاستوو چاندی و زۋانی کوردیچ هەنۍ."

مورادە بانگەوازش پەی پەنەوازی پێکئاوردەی هەڵوێسی نەتەوەیی کەرد جە ۋەرا ۋەروو ئی ئەرەگیریانە و پی جۆرە بەردەوامە بیە: "پێویسا گرڎ پارت و لایەنە سیاسیەکا بە هەڵوێسێوە نەتەوەییۆ ۋەرپەرچوو ئا هجووم  و پیلانگێڵنیا بڎاوە و نە بانۍ بە یاردیدەروو ئەرەگیرکاری."

جە دمادمایی قسەکاشەنە هامسەرۆکەو کەنەکەی زەینەب مورادە ئاماژەش بە نایاسایی دۆزو کۆبانێ کەرد و واتش: "ئامانجوو دەوڵەتوو تورکی قڕکەردەی سیاسییا، دۆزو کۆبانێچ ئینا قاڵب و ئا چوارچێوەینە، پۊکەی ڕا جە گرڎ کار و خەباتێوە سیاسی کوردی مگێرۆ. تاریخ ئانەش بەروستەن هیچ وەختۍ ئەرەگیراو کوردسانی بە کوشتەی و قڕکەردەی مەتاوا گەلو کوردی سەرکوت بکەرا. پۊکەی هەڵوێس ئەرمانایۍ نەتەوەیی ۋەرا ۋەر پی سیاسەتە ئەرەگیریا پێویسی ئی قۆناغەینە."

'فشارێوە فرە سەروو ئا پارتا هەن کە ئینۍ قۆناغوو خەباتی و مدرامانینە'

چەمڎاری سیاسی فەلاح سڵاح قسێش پەی ئاژانسیما کەردۍ و باسش جە گرنگیدای بە خەتەو نەتەوەیی گەلو کوردی کەرد و ئانەش دەسنیشانکەرد: "جە ئیساتێنە بە حوکموو ملەملانێیە میان دەوڵەتیی و هەرێمییەکا فشارێوە فرە سەروو پانیشتوو کوردسانی و ئا پارتا هەن کە ئینۍ قۆناغوو خەباتی و مدرامانینە، پۊکەی گێرتەی ۋەروو هامهەڵوێسیێوە نەتەوەی جە ۋەرا ۋەروو ئەرەگیرا کوردسانینە جە هەر بەشێوە کوردسانی و بەتایبەت جە پانیشتوو کوردسانینە فرە گرنگ و پێویسا."

'هامکارینەکەردەی و دەست تێکەڵنەکەردەی چنی خەتەو خیانەتی'

فەلاح سڵاح ئاماژەش پانەی کەرد تاریخ ئانەش پەی بەروستێنمۍ کە گەلو کوردی گەلێوە ئاشتیوازا و واتش: "گەلو کوردی گرڎ وەختۍ پەی بەرپابیەی ئاشتی و چارەسەریی قوربانیش دان. دماین قوربانیچ جە سەرنیشتوو کوردسانی ئینا دۆزو کۆبانێنە، کە پەرلەمانتار سەڵاحەدین دەمیرتاش و هامڕێکێش جە ۋەرا ۋەروو پاڵپەشتی کەردەیشا جە دۆزی ڕەواو گەلو کوردینە سزادریۍ. پۊکاتی هێزە ئەرەگیرەکۍ کوردسانی بەردەوامێنۍ جە پاشێل کاری کوردسانی. پۊکەی ئانەی پێویسی و داواکارییا جەگەلو کوردسانی و بەتایبەت جە خەڵکوو پانیشتوو کوردسانی و پارتە سیاسیەکا؛ دەس تێکەڵ نەکەردەی و پەشتیوانی نەکەردەین بە خەتەو خیانەتی، حەرپاسە جە خەتەو خەباتی و بەرەی نیشتیمان پەرەوەرینە مەنۆوە."

'دەوڵەتوو تورکی دژوو بیەی و ستاتۆی کوردین'

ئەنداموو کۆنگرەو نەتەوەیی کوردسانی (کەنەکە) د. شێرۆکۆ حەمە ئەمین قسێش پەی ئاژانسوو هەواڵوو فوراتی (ANF)ی کەردۍ و ئاماژەش پانەی کەرد پانیشتوو کوردسانی ئینا چێروو ئاژەو ئەرەگیری و پەلامارداینە و پی جۆرە بەردەوام بۍ جە قسەکاش: "ئەرکوو گرڎوو لایەنە سیاسیەکان ستراتیجێوە هامبەشی نەتەوەیشا بۆ. جە ئەساسەنە کەنەکەیچ هەر پەی ئی ئامانجیە ئەرەمەرزیان  و هەرمانە مکەرۆ پەی ئانەی گرڎوو لایەنەکا چێروو چەترەو کەنەکەینە کوۍ باوە پەی ئانەی ڕووبەڕوو ئاڵەنگارییەکا باوە. داوا جە گرڎوو پارتەکا مکەرمۍ بەهیچ جۆرێوە نەلانە دلۍ پیلانێوە کە دژوو پارچێوە جە پارچەکا تەروو کوردسانی گیریۆنە ۋەر. پېسە مزانمۍ دەوڵەتا ئەرەگیری و بەتایبەت تورکیای بە گرڎ جۆرۍ هجووم و ئەرەگیری مکەرۆ سەروو پانیشتی و ۋەرنیشتوو کوردسانی، دیارا ئامانجوو دەوڵەتوو تورکیای دژوو بیەی و ستاتۆی کوردین. پۊکەی چێگۆ ماچوو هەرلایەنێوە سیاسی بلۊنە دلۍ پیلانەکا دەوڵەتوو تورکی بەدڵنیایوە جە زەرەروو دەسکەوتەکا گەلو کوردی و ئا لایەنەیە مەڕیۆوە. هەر لایەنێوە دەسبار و هامکارو ئا پلانە ئەرەگیریۍ سەروو کوردسانی بۆ، بۆ بە خیانەت و پێویسا خیانەتیچ بە نەفرەت کریۆ."

'ئامانجی سیاسی دەوڵەتوو تورکیای، نکۆڵیکەردەی و ئەسڕیەیۆ کوردین'

د. شێرکۆ حەمە ئەمین ئاماژەش بە دۆزو کۆبانێ کەرد و ئانەش دیاریکەرد، دۆزو کۆبانێ جە سەرنیشتوو کوردسانینە درێژەپنەدەروو سیاسەتوو قڕکاری دەوڵەتوو تورکین ۋەرا ۋەر بە گەلو کوردی و واتش: "تاریخوو دەوڵەتوو تورکی جە ئەرەمەرزنایشۆ پەی پاکتاوو گەلو کوردی و نکۆڵیکەردەی وەشبیەن. بەهانە ئاەردەیۆ یاسایچ پەی دۆزو کۆبانێ درێژەداین بە فرت و فێڵەکا دەسەڵاتداری تورکیای پەی ڕزگاربیەی چا قەیرانۍ کە چنەشەنە مژیۋۆ. پۊکەی عالتەرین چارەسەر پەی تورکیای، بریتییا جە چارەسەری سیاسی.  تاریخ ئانەش بەروستەن کورد دلێنە مەشۆ، بە گرڎوو تاریخیش دەوڵەتوو تورکی هەمیشە خجڵوو قڕکەردەی گەلو کوردینە بیەن، بەڵام موینمۍ دۆزو ڕەواو کوردی نەک دلێنە نەشیەن بەڵکم وەڵێکۊتەن. پۊکەی چارەسەری  قۊرتەو کوردی بە دماییئاردەی بە سیاسەتوو گۆشەگیری و گیریایا دۆزو کۆبانێ چارەسەر بۆ، چارەسەری ئاشتیانە و ئازادکەردەی جەستەیی بەڕێز ئۆجالانی کرێڵوو چارەسەرکەردەی قۆرتەکان."