یەکەمین بەش:

هەر ڕێکۋستێوی سیاسی، سەربازی و جڤاکی، ئەگەر گەرەکش بۆنە بە ئامانج و سەرکۆتە بیاوۆنە، مشیۆم پاڵپەشتی فکری و فەلەسەفی و بناغەی پەتەوش بۆنە. ئەگەر پارتو کارکەرانو کوردستان - (پەکەکە)ی وەرچەم بگێرمێنە کە جە ٤۱ساڵێ ۋریەدێنە هەم ئامانجش پێکان هەم سەرکۆتەیش مسۆگەر کەردەن، هۆکارەکەش فکر و فەلسەفە و ڕێکۋستەی و پەروەردێۋە بییەن کە عەبدوڵا ئۆجالان ڕابەڕو گەلو کوردی سەرچەمەشن و ئاڎی خۆڵقنان. بەڵام ئۆجەڵان چەنی ئانەش خوڵقنان و جە کۆگەۋە دەستش پنەکەرد؟ ئایا بە ڕاگایێۋی ئاسان و سانا یان سەخت دژوارەنە دەربازی بییەن و کوشان تا بە ئامانجەکەیش یاۋان و پەکەکە و جمیەری ئازادی کوردیش بەئارۆ یاۋنان؟

عەبدوڵڵا عومەر عەبدوڵڵا کە جە ٤ نیسانو ١٩٤٩ زاینی ۋەرانۋەر بە ١٣ نەورۆزوو ١٤/١/١٣٢٨ رۆجیاری جە دەگاو ئامارا (ئۆمرەلی) سەر بە شارو خەلەفەتی پارێزگاو ئورفای جە ئەڎێ بییەن .نامێ ئەڎێش عایشێ-نە، باباش جە تیرەو بەرازییان کە تیرێۋی گەورێنێ و جە سەرنیشت و ڕۆژاڤاو کوردستانی نیشتەجانێ و جە دێرزەمانەۋە هەمیشە چەنی دەوڵەتو عوثمانی جەنگەنە بیێنێ.  بۆنەو ئانەی کە دەگاو ئامارای فرە کەلتوورێ و خەڵکێ جیاۋزێش دلێنە ژێۋێنێ. سەرجەم ئینێ کاریگەریشان ۋیر ودنیاۋینی ئۆجالانی کەردەن. ئۆجلان وانای وێش جە دەگێوە نزیکوو دەگاکێشان بە نامێ جەبینی دەست پەنە مەکەرۆن. جە دەورەو هەرزەکارییەنە دینداری و نماکەردەی بییەن بەشێۋە گرنگ جە ژیۋایش و فرە جاراێچ ۋەرنماییش پەی هاۋەڵ و هامڕاکانش کەردەن. دورەو وانای ڕانماییش جە شارچەو نیزیپ-ی تەمامنان. دماتەر جە ساڵەو ١٩٦٥ قۆناخەو واناو وەڵێ زانشتگایش بەدمایی ئاۋردەن و پەی ماوەو ساڵێۋی جە هەرمانگەو کاروبارو شناسنامەی و باری شارستای مەرزیۆرە. دماو ئانەیە جە ساڵەکێ ١٩٧٠ تا ١٩٧١ی جە بەشو حقوقو زانشتگایەنە قبوڵ مەکریۆنە و ساڵێۋە شۆنیەرە واناکەیش پەی بەشو سیاسی ( رامیاری) مەوارۆۋە و پەی درێژەدای بە وانای ئاست بەزری مشۆنە ئەستەنبوڵ.

جە ساڵەو ١٩٧٢ بە بۆنەو بەشداربییەیش جە ناڕەزایەتی لایەنە چەپەکان جە زانشتگانە کە دژ بە جەداردای  کەسایەتی کۆشەر “ده‌نیز گه‌زمیش”ی و دووێ جە هامڕاکانش، رێبەر ئاپۆ دەستگیر مەکریۆنە و چەنڎین مانگێ جە زیندانەنە مەنۆۋە.
دمای ئازادبییەیش جە نەورۆزو ١٩٧٣نە ئانکارانە جە قەراخو ڕوودخانە (ڕۋار)و چووبوکدای جە ئانکاری پایتەختەنە چەنی ٦ جە هاۋەڵەکانش پەی یۆهومین جاری سەرو ئانەی کە کوردستان داگیرکریان و ئیمپریالیزمی جیهانی سەرو داگیرکەردەیش رێککەوتن، گلێرێ مەبانێۋە و  یەکەمین هەنگامە پەی وێڕێکۋستەی منیانە و ئیتر هەسارێ ڕابەرایەتیش گەشیۆۋە و هەر زوو جە وانکارێۋی چەپ و کەسێۋی نەئەشناسیاۋە بەزوویی مەبۆنە بەکەسایەتیێۋی دیار و نامی و حساب پەیکریا. ئۆجەڵان تەنیا ڕابەرێ بییەن کە جە خانەوادێۋی هەژار نەک دەوڵەمەند و دەرەبەگ و فوئوداڵ تەنیا بە رێکۋستەی دەوروبەرەکەیش و گەلی تاوانش گەرەتەرین رێکۋزیایی کوردیبمەرزنۆرە و بیانۆنەش بە ئارۆ.
ئۆجەڵان جە باسەکانشەنە فرە جارێ ۋاتەنش : پەکەکە سەرو هەڵەکانو ٢٧ ئاخێز و سەرهۆردای ویەردێ کوردی جە ۋەڵێ وێشەنە مەرزیانەرە و پەشتیش ڕاستەڕاست بە گەلی بەستەن، هەر پەوکەی شکستدایش ئاستەم و مەحاڵەن.
  . 
جە سەرەتاکانو ساڵەو ١٩٧٦ گەرەکەو (دیکمان)ی سەر بە ئانکارای  ییوهۆمین گلێرەبیەی فراۋانش پەی گفتوگۆکەردەی ڕێکۋزیێۋی سیاسی ئەنجام دان و جە میانشەنە ژمارێۋی فرێ کەسایەتیێ کۆشەرێ و چەپێ تورکیای بەشدارێش بیێنێ جەئانیشاچە حەقی قەرار. 
دمابەدمای ئانەیە بەردەۋام بییەن جەکۆبییەو گلێرەکانش و هەمشە گیان و ورە و هێزی نۊگەرایانەش بەخشان بە هاۋەڵ و هامڕاکانش و بە جۆرێ کە جە ٢٧/١١/١٩٧٨ی جە دەگاو فیس-ی سەر بە ئامەدو سەرنیشتو کوردستانی جە کۆبیێۋەنە ئۆجالان و هامڕاکێش پارتو کارکەرانو کوردستان (پە کە کە)ی مەرزنارە.
جە مانگەو تەموزو ١٩٧٩ی ڕابەر ئاپۆ و هاۋەڵەکێشمەتەرسی دەستگیرکەردەیشان بییەن، پەوکەی ڕووە منیانە ڕۆژاڤاو کوردستانی و سوریا. جە میانو ساڵەکانو ١٩٨٠ تا ١٩٩٨ جە ئاکادیمیاو مەعسووم قۆرقمناز جە دۆڵو بیقاع-ی نزیکەو ٢٠ بیست هەزار کەسێ جە بوارەکێ سیاسی، کۆمەڵایەتی، سەربازی و ڕێکۋزیایی پەرۋەردێ و ئامادێ مەکەرۆنە و پەی دەستپنەکەردەی شۆڕشی هەمەلایەنەی مەکیانۆشانەۋە پەی کوردستانی.
 
هامتەریب چەنی پەرۋەردەکەردەی، ئۆجالان دەستش بە نۋیستەی کەردەن و تا بە ئارۆچ زیاتەر جە ٢٥٠ پەرتووکێ قەبارە گەورێ و ۋیچۆکلێش نۋیستێنێ کە تەنها پارێزنامەکێش جە ٥ بەشێ جیاوازەنە نۋیستێنێ و جایگای تایبەتشان جە ئاشکراکەردەی و گوزارەکەدەی جە ۋیر و فەلسەفە و پەیلۋای ئۆجالان-یەنە هەن.
 پەرتووکەکێ فرتەرشان چاپێ ۋەڵاۋێ کریێنێۋە و تمارێ کریێنێ و بە زۋانە زیندەکانو جیانی چوون: ئینگلیزی، فرانسەوی، ئیسپانی، فارسی، عەرەبی، تورکی، یونانی، ڕووسی و ئالمانی هۆرگڵیایشان پەی کریان.