لە شاری لیڤەرپوولی بەریتانیا، ئەندامانی ناوەندی کۆمەڵگەی کوردی دیموکراتیک بۆ شەرمەزارکردنی هێرشەکانی دەوڵەتی تورک بۆ سەر شەنگال و هەرێمەکانی پاراستنی مەدیا و ڕۆژئاوا لەبەردەم وێستگەی شەمەندەفەری لیم کۆبوونەوە، چالاکییەکە بە خولەکێک ڕێزگرتن شەهیدان دەستی پێ کرد و درووشمی "بژی بەرخۆدانی ڕۆژئاوا" و "تیرۆریست تورکیا" و "شەهید نامرن" و "قڕکردنی کورد بوەستێنن" بەرزکرایەوە.

چالاکوانان پانکارتی "کورد بپارێزە، تورکیا بوەستێنە" و ئاڵای یەپەگە و یەپەژە و ئاڵایان بە وێنەی ڕێبەر ئاپۆ بەرزکردەوە.

لە وتەکاندا جەختکرایەوە هێرشەکانی دەوڵەتی داگیرکەری تورک لە ٢٣ ی تشرینی یەکەمەوە بۆ سەر شەنگال و هەرێمەکانی پاراستنی مەدیا و ڕۆژئاوا بووەتە هۆی شەهیدکردنی ژمارەیەک خەڵکی سڤیل و گوترا: "ئەم هێرشە نامەردانە دژی گەلی کورد شەرمەزار دەکەین".

چالاکوانان بانگەوازیان لە حکومەتی بەریتانیا کرد فرۆشتنی چەک بە تورکیا بوەستێنێت و دژی ئەم تاوانانە هەڵوێست نیشان بدات.

چالاکییەکە بە چەپڵە و درووشم بەردەوام بوو، دواتر برۆشور دەربارەی تاوانەکانی دەوڵەتی تورک دابەشکران.