لە شاری کۆڵنی ئەڵمانیا بە چالاکیەک تیشکخرایەسەر زیندانیانی نەخۆش و داوای ئازادی جەستەیی ڕێبەری گەلی کورد عەبدوڵا ئۆجالان کرا.

لە چالاکییەکەدا لەسەر ناوی پلاتفۆرمی دەنگی زیندانیان (تەسەپە) قسە کرا و ئاماژە بەوە کرا لە تورکیا زیاتر لە هەزار و ٥٠٠ زیندانی نەخۆش هەن و ئازاد ناکرێن، هەندێکیشیان کاتێک ئازاد دەکرێن کە دەزانرێت نزیکی مردنن، پاش چەند هەفتە و مانگێک لە ئازادبوونیان گیان لەدەست دەدەن.

هەروەها تیشخرایەسەر گۆشەگیری و پچڕانی پەیوەندی زیندانیان بە ئامانجی نامۆکردنیان لە ناسنامە و کەسێتییان، دووپاتکرایەوە گۆشەگیری سەر ڕێبەری گەلی کورد عەبدوڵا ئۆجالان چەند هێندە زیاترە.

هەروەها ئاماژەکرا بەوە لە دۆزی کۆبانێدا ٤٠٧ ساڵ سزای زیندانی سەپێنراوە و گوترا: "دۆزی کۆبانێ بۆ ئێمە بانگەوازی مەزنکردنی تێکۆشانی یەکگرتووە دژی فاشیزم".

هاوسەرۆکایەتی مەدکۆم ئاماژەی بەوە کرد گۆشەگیری سەر ڕێبەری گەلی کورد عەبدوڵا ئۆجالان سیاسەتی قڕکردن و پاکتاوە بۆ سەر چوار پارچەی کوردستان و تورکیا.

نوێنەری زۆرا ئاماژەی کرد بە هێرش و فشارەکانی سەر گەلی کورد و تەڤگەری ئازادیی کورد، هەروەها بەرخۆدانی کوردان بەرامبەر فشار و هێرشەکان، گوتی: "لە تورکیا و لە هەموو جێگەیەک شەڕ دژی فاشیزم ڕادەگەیەنین، بۆ ئازادکردنی خۆمان و ڕزگارکردنی هەموو مرۆڤایەتی لە کۆتوبەند".

چالاکییەکە بە درووشـمی "با زیندانیانی نەخۆش ئازاد بکرێن" و "ئازادی بۆ زیندانیانی سیاسی" و "ئازادی بۆ زیندانیانی کۆبانێ و گەزی و ١ ی ئایار" کۆتایی هات.