كۆدار لە شرۆڤە هەڵسەنگاندنی خۆی لەمەڕ دواپەرەسەندنەكانی رۆژهەڵاتی كوردستان و ئێران رایگەیاندوە؛ ڕاپەڕینی ئەمجارە لەئێران و رۆژهەڵاتی كوردستان ئەوەندە ریشەیی و بەدیسپلینكراوە، کە ئێدی گەیشتووەتە قۆناخێك هیچ گەڕانەوە و پاشگەزبوونەوەیەكی نییە...
كۆدار لە شرۆڤە هەڵسەنگاندنی خۆی لەمەڕ دواپەرەسەندنەكانی رۆژهەڵاتی كوردستان و ئێران رایگەیاندوە؛ ڕاپەڕینی ئەمجارە لەئێران و رۆژهەڵاتی كوردستان ئەوەندە ریشەیی و بەدیسپلینكراوە، کە ئێدی گەیشتووەتە قۆناخێك هیچ گەڕانەوە و پاشگەزبوونەوەیەكی نییە، پێداگری و دەست هەڵنەگرتنیان لەداواكاریەكانیان گەیشتووەتە ئاست و پێگەی گۆڕانكاریخوازی.
كۆدار دەڵێت؛ ناوەند شارەكانی راپەڕیوو بەشێوەی هەرێمی و گەڕەك بەگەڕەك پێكهاتوون و هێزەكانی رژێمیان تا ئاستی زۆر بێكاریگەر كردوە و ئەمەش جیگای هیوایە. رژێم دەست و پێی خۆی ون كردوە و بەهەموو هێزیەوە هەوڵدەدات رێگری لەو رێ و رێبازانەی ناڕەزایەتی و مانگرتنانە بکات، كە داهاتووی رژێم بەرەو كۆتایی دەبەن و دەیخاتە مەترسیی لەناوچوونەوە. سەرهەڵدێرانیش بەبێ دەستێوەردانی هیچ هێزێكی بیانی، لەوەڵامی ئەم سەركۆتكردنەی رژێمی دژە كۆمەڵگەیە، لەهەوڵدان بۆ پێشخستنی شانەی ناوخۆیی گەڕەكەكان و لەشارەكاندا بە پێكهێنانی "ئەنجوومەنەكانی خۆبەرێوەبەری شار"بەرەو پێشەوە ببەن، كە بێگۆمان تاكە مەرج بەجێهێنانی ئەم هەڵوێستەی گەل، بەردەوامی راپەڕینە لەهەفتەكانی داهاتوودا.
لەبەشێكی تری هەڵسەنگاندنەكانی، كۆنگرەی كۆمەڵگەی دیموكراتیك و ئازادی رۆژهەڵاتی كوردستان "كۆدار"دا هاتووە؛ هەڵوێستی رژێم و دەوڵەتی ئێران لە قسە و هەڵوێستە سەركۆتكارییەكانی خامنەیدا ڕوونە و هەڵوێستی كۆمەڵگاش لە ڕاپەڕینە جدی و ڕادیكاڵ و ریشەیەكەیاندا ڕوونە. ئەم قسانەی خامنەیی بە مەبەستی كۆتاییهێنان بەو ئارگیومێنتە بوو بۆ خەڵكی ڕاپەڕیو و وەك دوا هۆشدارییەك بۆ سەركوتكردن. بۆیە بەرپرسیارێتی هەر سەركوتێكی خوێناوی لە ئەستۆی خامنەیی و دەسەڵاتە پاوانخوازەكەیدایە.
خامنەیی بە فەرمی شەڕی دژی كۆمەڵگا ڕاگەیاندووە. بە ڕوونی و ئاشكرا هەڕەشە دەكات. بانگەوازی لە ئەرتەش و سوپای پاسدارانی كردووە بۆ خوێنڕشتنی دڕندانە، كە بێگومان لە چەمكی ستەمكاری سیستەمی دەسەڵاتدار هەر ئەمە چاوەڕوان دەكرێت. سیناریۆی شەڕی سنووربەزاندنی ڕژیم تا ئێستا لە هەردوو ڕەهەندی ناوخۆیی و دەرەكیدا شكستی هێناوە، بەڵام ڕژیمی ئێران شەڕی ناوخۆیی و دەرەوەیی خۆی تێكهەڵكێشی یەكدی كردووە و خۆی بە ناچاری پەیڕەوكردنی ئەم ڕێبازە مەترسیدارە دەبینێتەوە، كە بە دڵنیاییەوە ڕۆژهەڵاتی ناوین لەناو دەبات و جارێكی تر لەتاریكیەكی تردا دەیخنكێنێت.
بەلەبەرچاوگرتنی هەڕەشە بەردەوامەكانی سۆپای پاسداران بۆ دەست پێكردنی شەڕی دەرەوەی سنور لەدژی ئۆپۆزسیۆنی كوردی. دیارە كە هەڕەشەی وەها لەم كاتەدا لەدژی هیچ كام لەگەلانی دیكەی ناو ئێران نییە و قورسایی بارەكە لەسەر شانی گەلی كوردە. لەشوێنێك وەكو بەلووچستان بەكۆمەڵكۆژكردنی خۆپیشاندەران كۆتایی پێكهێنا و بەسی بینی، بەڵام لەدژی گەلی كورد و رۆژهەڵاتی كوردستان خۆی بەناچار دەزانی كە دەست بەهێرشی سەربازی لەدەرەوەی سنورەكان بدات. لەكاتی شۆڕشی ١٣٥٧ی هەتاوی (١٩٧٩) رۆژهەڵاتی كوردستان جیاواز لەهەموو گەلان، گۆڕەپانی شەڕ و پێكدادان لەدژی ئۆپۆزسیۆنی كوردی و سەركۆتی گەلی كورد بوو. تەنیا جیاوازی كە ئەمڕۆكە دەبینین ئەوەیە كە رەتكردنەوەی رژێم لەلایەن هەموو گەلانی ئێرانەوەیە و لاوازبوونیەتی لەهێرش كردن بۆ سەر گەلی كورد و هاوكات بزوتنەوەی ئازادیخوازی گەلی كورد لەرۆژهەڵاتی كوردستان بەرێكخستنكراوتر و بەهێزترە لە كاتی شۆڕشی ٥٧ی هەتاوی (١٩٧٩) و بەبەهێزی پاراستنی رەوا و سرۆشتی خۆی و گەلەكەی دەكات.
كۆنگرەی كۆمەڵگەی دیموكراتیك و ئازادی رۆژهەڵاتی كوردستان لەكۆتاییدا دەڵێت؛ بە هەر شێوە و واتایەكەوە، هەموو گەلانی ئێران و رۆژهەڵاتی كوردستان راپەڕینێكیان دەست پێكردوە كە هیچ كەس و رێكخستنێك مافی گەڕانەوەی لەسەر ئەو رێبازەی نییە، چونكە خۆی و گەلەكە رووبەرووی مەترسیەكی گەورەتر دەكاتەوە و لەهەمانكاتدا، هەموو زەمینە و دەرفەتێك لەهەر بوارێكدا بۆ بەرەوپێشبردنی سەرهەڵدان تا گەیشتن بەلووتكەی شۆڕشێكی راستەقینە لەبەردەستە و هیچ كەسێك بیانۆیەكی بۆ خۆدوورخستن لەو ئەركە مرۆڤیی و ئەخلاقی و سیاسییە لەدەستدا نییە.
سەرهەڵدانی گەلان بۆ دواوە ناگەڕێتەوە و پێویستی بەپێكهێنانی خۆبەرێوەبەرایەتی گەل لەشارەكانە. بۆیەش پێویستە خەڵكی راپەڕیوو لەهەموو شارەكان دەست بەرێكخستنكردنی بەهێز و پێكهێنانی خۆبەرێوەبەری هەرێمی و گەرەك و كۆڵان و شارەكان بكەن و هەموو چین و توێژەكان، چالاكوانان و رۆشنبیران و پێكهاتەكان لەو رێكخستنانەدا جێگای خۆیان بگرن. بۆیەش دەبێت داواكاریەكانیان، بەهێزتر، كردەیی تر، بەجەسارەتتر و ئازایانەتر و ئاشكراتر بهێننە زمان، چونكە ئەمە تاكە رێگەیە لەبەردەماندا.
ژ.ت
