شۆڕشی كوردستان به پێشه‌نگایه‌تی په‌كه‌كه - پاژك، له تێكۆشان به‌رده‌وامه و زۆر ده‌سكه‌وتی نیشتیمانی و دیموكراتی له مه‌یدانی تێكۆشاندا به‌ده‌ست خستووه، هه‌مانكات وه‌ك پارتی شه‌هیدان به‌ناو ده‌كرێت...
به‌شی پێنجه‌م و كۆتای
• دوای شه‌هیدبوونی هه‌ڤاڵ دكتۆر سیروان:
شۆڕشی كوردستان به پێشه‌نگایه‌تی په‌كه‌كه - پاژك، له تێكۆشان به‌رده‌وامه و زۆر ده‌سكه‌وتی نیشتیمانی و دیموكراتی له مه‌یدانی تێكۆشاندا به‌ده‌ست خستووه، هه‌مانكات وه‌ك پارتی شه‌هیدان به‌ناو ده‌كرێت. تایبه‌تمه‌ندی و كه‌سێتی و ژیانیان وه‌ك فه‌لسه‌فه‌ی تێكۆشان به‌ناو ده‌كرێت. په‌یوه‌ست بوون به رێبازی شه‌هیدان، هه‌مانكات په‌یوه‌ست بوونه به فه‌لسه‌ف و رۆح و ژیانی هه‌ڤاڵایه‌تی په‌كه‌كه - پاژك "پارتی ئازادی ژنانی كوردستان".
هه‌ڤاڵ دكتۆر سیروان، راسته وه‌ك پێشه‌نگێك له خه‌باتی باشووری كوردستان به‌ده‌ستی خیانتكاران شه‌هید كه‌وت، به‌ڵام له‌بنه‌مادا هه‌ڤاڵ دكتۆر یه‌كێكه له پێشه‌نگانی شۆڕشی كوردستان. بۆیه‌ش په‌كه‌كه له شه‌شه‌مین كۆنگره‌ی خۆی له 1999 وه‌ك ئه‌ندامی كۆمیته‌ی ناوه‌ندی ناساند. واتا هه‌ڤاڵ دكتۆر تایبه‌تمه‌ندی له خه‌بات و تێكۆشاندا، جا له بواری له‌شكری ده‌بێ، یان خه‌باتی جه‌ماوه‌ری، تێكۆشانی ئایدیۆلۆژی ده‌بێ وه‌ك " راگه‌یاندن و په‌روه‌رده و ئه‌ده‌بیات" یان خه‌باته‌كانی تر، به‌بێ جیاوازی هه‌ڤاڵ دكتۆر شه‌ونخونی بۆ كردووه و ئه‌وه‌ش له پراكتیكی هه‌ڤاڵدا ده‌بینین. له خه‌باتی له‌شكری وه‌ك گه‌ریلایه‌كی ئازادی سه‌ركه‌وتوو رۆڵی خۆی بینیوه، له‌وانه‌یه ئه‌گه‌ر كه‌م ئه‌ندام نه‌ببووایه، چ كاتێك له گۆڕه‌پانی شه‌ڕ دوور نه‌كه‌وتبووایه‌ته‌وه. له‌خه‌باتی جه‌ماوه‌ری له ئه‌وروپا و له كوردستان پێشه‌نگایه‌تی بۆ كۆمه‌ڵگه‌یه‌كی ئازاد و خۆبه‌ڕێوه‌به‌ر و دیموكرات كردووه. له خه‌باتی ئایدیۆلۆژیش چ له په‌ره‌وه‌رده و چ له راگه‌یاندن، دیسان پێشه‌نگایه‌تی فیكری و ئایدیۆلۆژی كردووه، نووسین و بابه‌ته‌كانی، هه‌مانكات كۆڕ و كۆبوونه‌وه‌و سمینار و خوله‌كانی په‌روه‌رده‌ی، سه‌لمێنه‌ری ئه‌و راستیه‌ن. واتا ئێمه هیچی زیادمان بۆ شه‌هید دكتۆر نه‌گووتووه، به‌ڵكو هێشتا زۆر لایه‌نی كه‌م ماوه كه پێویسته راوه‌سته‌ی له‌سه‌ر بكرێت و لێكۆڵینه‌وه‌و به‌دواداچوونی زیاتری بۆ بكرێت.
هه‌ڤاڵ دكتۆر وه‌ك چۆن له خه‌باتی گشتیدا خاوه‌ن رۆڵێكی به‌رچاو و له‌خۆبردوانه‌بوو، به‌هه‌مانشێوه له خه‌باتی هێڵی ئازادی ژنیشدا، به‌تایبه‌تمه‌ندی كه‌سایه‌تی خۆی، توانیبوی باوه‌ڕیه‌كی زۆر دروست بكات. بۆیه به‌ده‌یان له هه‌ڤاڵانی ژن، له رێگه‌ی هه‌ڤاڵ دكتۆره‌وه به‌شداری ناو شۆڕش بوون، هه‌مانكات هه‌ڤاڵانی ژن به‌رده‌وام هه‌ڤاڵ دكتۆریان وه‌ك هێزیك له‌پشت خۆیان ده‌دیت. به‌واتایه‌كیتر هه‌ڤاڵ دكتۆر تا ئاستێكی زۆر تایبه‌تمه‌ندی پیاوسالاری له‌خۆیدا نه‌هێشبوو و وه‌ك پێاویكی شۆڕشگێڕ به‌رئه‌ندام بوو بۆ كوشتنی پیاویه‌تی كلاسیك و كۆنه‌په‌رست، له‌كه‌سایه‌تی خۆیدا. بۆیه‌ش ئه‌گه‌ر سه‌یركه‌ین، هه‌ڤاڵ دكتۆر ئاستی مۆڕالی له‌گه‌ڵ هه‌ڤاڵانی ژن و پێكه‌وه خزمه‌ت كردنی له ئاستێكی بڵندایه. هه‌موو هه‌ڤاڵانی ژن، حه‌زیان ده‌كرد له‌وشوێنه‌كاربكه‌ن كه هه‌ڤاڵ دكتۆر خه‌باتی لێ ده‌كات. مرۆڤی ره‌نجده‌ر و تێكۆشه‌ر و خه‌باتكار و له‌خۆبردوو، بێگومان له شه‌ڕێكی بێوچاندایه به‌رامبه‌ر كۆنه‌په‌رستی و سیسته‌می ده‌سه‌ڵاتداریه‌تی پیاوسالار. بۆ ئه‌وه‌ی شۆڕشی ئازادی له‌كوردستان به‌رهه‌مبێت، پێویسته كه‌سایه‌تی پیاوسالاری كۆنه‌په‌رستی پاشڤه‌ڕۆ ژێر خاك بنرێت. بۆ ئه‌مه‌شه رێبه‌ر ئاپۆ ده‌ڵێت "شۆڕشی باشوور شۆڕشی ژنه"، واتا شۆڕشی ئازادیه، چونكه به‌بێ ئازادبوونی ژن، بێگومان مه‌حاڵه شۆڕش بگاته ئه‌نجام.
له‌باشوور داگیركه‌ری دوور خراوه‌ته‌وه، ده‌سه‌ڵاتێكی هه‌رێمیش هه‌یه، به‌ڵام له‌لایه‌ك دیموكرات نییه، له‌لای دووه‌میش پێوانه و پره‌نسیبی ئازادی نییه. به‌تایبه‌ت باشووری كوردستان دوای ساڵی 1991 بۆته گۆڕستان بۆ ژنان. هێشتا یاسای باری كه‌سێتی هه‌موار نه‌كراوه‌ته‌وه، هێشتا پیاوی ده‌سه‌ڵاتداری كۆنه‌په‌رست، ده‌توانێ چوار ژن بێنێ و سه‌رۆكی هه‌رێمیش پیرۆزبای لێ ده‌كات!!! بۆیه هه‌موو تێكۆشه‌رێكی پیاو، ئه‌گه‌ر له رێگای شه‌هید دكتۆر سیروان له رێبازی ئازادی ژندا قوڵبێته‌وه، بێگومان شۆڕشی باشوور كه شۆڕشی ژنه، به‌سه‌ر ده‌خات.
بابه‌تێك كه له‌باشوور به‌تایبه‌ت له دوای 2003 له رۆژه‌ڤدایه، ئه‌ویش پرسی گه‌نده‌ڵی و به دامه‌زراوه كردن و به‌ڕۆڵ كردنی حكومه‌ت و په‌رله‌مانی هه‌رێمه، هه‌روه‌ها ده‌ستی حیزب له‌ناو داموده‌زگاكان كشاندنه‌وه‌یه. هه‌ڤاڵ دكتۆر له چه‌ند بابه‌تێكدا له ساڵی 1994 به‌ڕوونی راوه‌سته‌ی له‌سه‌ر كردووه، وه‌ك له‌م گوتاره‌ی ده‌ڵێت " پەیوەندیەکان پێویستە لە خزمەتی ئەزموونی فیدراڵی دا بن، نەک ئەزموونەکە بکرێتە قوربانی پەیوەندیەکان". ده‌سه‌ڵاتدارانی هه‌رێم دوای 30 ساڵ له حوكمڕانی، هێشتا ناتوانن وه‌ك هه‌ڤاڵ دكتۆر بۆ به‌رژه‌وه‌ندیه‌كانی هه‌رێم بیربكه‌نه‌وه. ئه‌وانه فه‌رمانڕه‌وایه‌تی هه‌رێمیان پێویسته بۆ ئه‌وه‌ی خۆیانی له‌سه‌ر ده‌وڵه‌مه‌ند بكه‌ن و سه‌روه‌ت و سامانی پێ كۆبكه‌نه‌وه‌و به‌رده‌وامی به ده‌سه‌ڵاته نادیموكرات و گه‌نده‌ڵه‌كه‌ی خۆیان بده‌ن. هێشتا په‌یوه‌ندیه‌كانی ده‌سه‌ڵاتدارانی هه‌رێم حیزبین و رێكه‌وتنه‌كان له ژووره تاریكه‌كان ئه‌نجامده‌درێن و سه‌روه‌ت و سامان و نه‌وت و گاز ده‌چێته بانكی داگیركه‌ری تورك. بۆیه ئه‌وه‌ی ئێستا بڕیار له‌سه‌ر هه‌رێمی كوردستان ده‌دات ده‌وڵه‌تی توركه نه‌ك ده‌سه‌ڵاتی هه‌رێمی كوردستان، حكومه‌ت بۆته یاری پێكردن بۆ مه‌رامه گڵاوه‌كانی په‌ده‌كه و په‌رله‌مانیش هه‌ر به‌كارتۆنی هێشتراوه‌ته‌وه.
هه‌ڤاڵ دكتۆر سیروان، هه‌موو تێكۆشان و ماندوبوونی له‌پێناو ئه‌وه بوو ئه‌و ده‌سكه‌وته‌ی باشوور، ببێته ده‌سكه‌وتێكی نشتیمانی – دیموكراتی و خزمه‌ت به سه‌رجه‌م نه‌ته‌وه‌ی كورد بكات. تاكو له رێگای ئه‌م ده‌رفه‌ته، هه‌موو كوردستان بتوانێ به‌ره‌و ئازادی هه‌نگاو بنێت. پێچه‌وانه ده‌سه‌ڵاتدارانی هه‌رێم به‌تایبه‌تیش په‌ده‌كه، پیلانی كوشتن و له‌ناوبردنی دكتۆر سیروان، به‌رنامه‌ڕێژی بۆ ده‌كات، جاری یه‌كه‌م بریندار ده‌كات له 1992و جاری دووه‌میش له 1996 شه‌هیدی ده‌خات. ئه‌وكات راستی ئه‌و ده‌سه‌ڵاته باشتر ده‌رده‌كه‌وێت كه 30 ساڵه به یه‌ك شێوه بیرده‌كاته‌وه، ئه‌ویش چۆن زیاتر بكه‌وێته خزمه‌ت داگیركه‌ران و له‌باوه‌شی ئه‌واندا شه‌و و رۆژی بكاته‌وه.
بۆیه رێبازه‌كه‌ی شه‌هید دكتۆر سیروان، بێ هیچ گومانێك له‌گه‌ڵ ئه‌وه‌ی له‌سه‌ر بنه‌مای نه‌ته‌وه‌یی دیموكراتیه، هه‌مانكات پاراستنی ده‌سكه‌وته‌كان و فره‌وان كردن و پێشخستن و به ده‌زگا كردنیه‌تی. له‌لایه‌كیتریش ده‌ستی حیزب و گه‌نده‌ڵ و تاڵانچیه‌كان، نه‌هێشتنه له‌ناو به‌ڕێوه‌به‌رایه‌تی و په‌رله‌ماندا. هه‌مانكات سه‌روه‌ت و سامانی خه‌ڵك به ژێرزه‌ویی و سه‌ر زه‌وی خستنه خزمه‌ت كۆمه‌ڵگه‌یه، به‌بێ ئه‌وه‌ی هه‌ڤاڵ دكتۆر و هه‌ڤاڵانی ئه‌وسا و ئێستاش، چاویان له هیچ سه‌رمایه‌یه‌كی گه‌ل بێت. پێچه‌وانه له‌پێناو ئه‌وه‌ی ده‌رفه‌ت و ده‌رامه‌تێك بۆ كۆمه‌ڵگه زیاد بكه‌ن، شه‌و و رۆژی خۆیان ده‌خه‌نه سه‌ریه‌ك و خۆیان له پێناودا فیدا ده‌كه‌ن. ئه‌وا ئێستاش له شه‌ڕ و رووبه‌ڕوو بوونه‌وه‌كانی زاپ و ئاڤه‌شین و مه‌تینان و رۆژئاواو باكوور و رۆژهه‌ڵاتی سووریا گیانبه‌ختكردن و فیداكاریه‌كانیان ده‌بینین. واتا فه‌لسه‌فه‌ی رێبه‌ر ئاپۆ كه ده‌ڵێت، به ده‌رزی بیرم لێداوه، هێشتا هه‌ڤاڵان و رێبوارانی رێگای رێبه‌ر ئاپۆ، دیسان به ره‌نج و ماندوبوونی بێ وچان، له بیرلێدان به‌رده‌وامن، واتا به‌بێ ئه‌وه‌ی بزانن ماندوبوون چییه، خزمه‌ت كردن و ئارق رشتن و شه‌ونخونیان كردۆته پیشه‌ی به‌رده‌وامی خۆیان.
له‌كۆتایدا جارێكیتر نه‌مری و سه‌ربه‌رزی بۆ شه‌هید دكتۆر سیروان و هه‌ڤاڵانی، ئێمه قه‌رزاری شه‌هید دكتۆر سیروان و هه‌موو شه‌هیدانی كوردستانین، بۆیه به‌جێهێنانی ئامانجه‌كه‌یان له كوردستانێكی ئازاد و خۆبه‌ڕێوه‌به‌ر و دیموكرات، تاكه ئاواتیانه كه مسۆگه‌ر ده‌بێ به‌دیبێ.
كۆتایی
ژ.ت
