بەدرێژایی سێزدە ساڵە دەوڵەتی تورك بەهەموو كەرەستەیەكی شەڕ، بەئاگر و ئاسن رووبەڕووی كوردانی رۆژئاوای كوردستان دەبێتەوە. گروپە چەتەكانی دنیا و ئەو تۆندئاژوانەی لەهەموو قۆژبنێكی سەر زەوی كۆكردەوە و بەریانی دادیە گیانی رۆژئاوای كوردستان بۆ كۆمەڵكۆژی و دژایەتی كردنی ئەزموونی گەلەكەمان لەرۆژئاوای كوردستان و باكوری سوریا. بەشێكی گەورەی لەخاكی رۆژئاوای كوردستان لەسەرێكانیەوە تا عەفرین بەخۆی و گروپە چەتە نیابەتیەكانیەوە داگیركردوە و موڵك و ماڵی كوردانیان بەتاڵان برد و سووتاندیان و زەوی، زار و رەز و باخی هاووڵاتیانیان لەڕیشە هەڵكەند و ئاگریان تێبەردان. بەفڕۆكەی شەڕكەر و سیخوڕی هەموو سەرخان و ژێرخانی رۆژئاوای كوردستانیان كردە ئامانج و لەناویان برد. ئێستاشی لەگەڵدا بێت، هەوڵدەدات بەڕێگەی حكومەت و دەوڵەتە راگوزەرەكەی جۆلانی كوردان بهێنێتە بەرامبەر بەیەك و هەموو دەستكەوت و ئەزموونی گەلەكەمان لەرۆژئاوای كوردستان پاكتاو بكات و گەلی كوردیش بەتەواوەتی كۆمەڵكوژ. ئەمە نیاز و مەرامی ئاكەپە و بەتایبەتی تەیب ئەردۆغانە. دیمۆگرافی عەفرین و سەرێكانی و عەزاز و زۆر هەرێمی تر كە لەژێر داگیركەری توركیان گۆڕا، خەڵكی ئەو ناوچانەی بەزۆرەملێ كۆچبەر كرد و بەهەزاران لەشەڕڤان و ژن ومنداڵ و گەنج و پیری گەلەكەمانیان كردە ق,ربانی و بەئاشكرا و بەشاراوە پاڵیان بەگروپە چەتەكانەوە نا؛ بۆ ئەوەی ئەو ناوچانەشی لەدەست خۆبەڕێوەبەری رۆژئاوا و باكوری سوریان بەنانەوەی فتنە و فەساد و دووبەرەكێ و ئاژاوەگێڕی گەلانی سوریا بەرداتە گیانی یەكتر. تەنانەت لەگەڵ ئەوەی بەسەدان جار بەرپرسانی خۆبەڕێوەبەری دیموكراتی رۆژئاوا داوای دانوستان و چارەسەری ئاشتیانە و دیموكراتیانەی كێشەكانی نێوانیان كرد؛ كەچی ئەو دەوڵەتە ئامادە نەبوو دان بەخۆبەرێوەبەری كورداندا بنێت. بۆیە ئەم گووتانەی كە كوردانی رۆژئاوا برامانن و ئەوان پارچەیەك لەكوردانی سوریان تەنیا بۆ فریودان و چەواشەكاری رای گشتی و نێوخۆی كوردانە. ئەردۆغان بەگرتنە بەری سیاسەتێكی بەو شێوەیە چۆن دەتوانێت برایەتی كورد و تورك پشتڕاست بكاتەوە، بەبێ ئەوەی دان بەراستینە كۆمەڵایەتی، رێوەبەری، سیاسی و چاندی و پاراستنی كوردان بنێت كە لەژێر چەپۆكی قڕكردنی هێزە تەكفیری و گروپە چەتەكانی داعش و هاوشێوەكانیان و دەوڵەتانی داگیركەر لەسەر كوردستان و گەلی كوردن، ئایە ئەم گووتنانە دەتوانێت هەڵگری چ پەیامێك بێت؟!. بۆیە گەر ئەردۆغان بەڕاستی شتانێك كە دەیڵێت باوەڕی پێی هەیە دەبێت دان بە سیاسەتی هەڵەی خۆیدا بنێت لەماوەی ئەم سێزدە ساڵەدا بەرامبەر رۆژئاوا و بۆ بونیادنان و پێشخستنی ئەو ناوچانە هەوڵ بدات و دان بە خۆبەڕێوەبەریدا بنێت و گروپە چەتەكانی لەو ناوچانە بكشێنێتەوە. كاتێكیش باس لەوە دەكات دەبێت كورد نەبێت بە داردەستی دەرەكی پێویستە لەباتی گروپە چەتەكان لەگەڵ هەسەدە و خۆبەڕێوەبەری رۆژئاوادا كاربكات و دان بەوەدابنێت كە سیاسەتی هێڵی سێیەم بوو نەیهێشت سوریا پارچە ببێت و پریشكی ئاگرەكە توركیاش بگرێتەوە.

بۆ ئەردۆغان هەرجارە كە لەپیلانێك شكست دەهێنێت دەست بۆ كارتێكی تر دەبات؛ ئەم ئاخر و ئۆخرانەش كە نەیانتوانی بەهۆی ئەو كۆمەڵكوژی و هاندانەی گروپە چەتەكان بۆ سەر درووزەكان لەسوریا و رووبەڕوو كردنەوەی شەڕڤانان و هێزەكانی پاراستنی كورد"هەسەدە" بهێنن بەرامبەر بەیەكتر و ئاگری شەڕیان لەنێواندا هەڵگیرسێنێت؛ دەستی بەرەوزە خوێندنەوە و هاش و هووشی بێ نرخ كردوە. برایەتیەكی بەبێ ماف هاوشێوەی سیاسەتی دەوڵەت و رژێمەكەی ئێرانە؛ بەساڵانە ئەو رژێم و دەوڵەتەش باس لەوە دەكەن كە كورد و فارس بران، كورد یەك لەبنەڕەتی ترین بەردەكانی بناخەدانانی ئێران و سیستەمەكەیە كەچی تەنیا بەشی ئەو برا؛ كوشت و بڕ و بێ مافی و لەسێدارەدان و سیاسەتی برسی كردن و تیرۆر و كوشتن و دزینی سەرخان و ژێرخانی رۆژهەڵاتی كوردستانە و رۆژانە گەنجانی كوردی برای لەسێدارە دەدات. ئەمە براتیەكەی كورد و فارسە. كە ئەوە برایەتیەكە تەنیا بۆ خۆ گەورەكردن و ژێردەست كردنی ئەوی تر. ئێستاش دەبێت گومان لەو ووتانەی ئەردۆغان بكرێت كە باس لەبرایەتیەك دەكات كە هیچ بناخەیەكی یاسایی، حقوقی، پاراستنی، بەڕێوەبەرایەتی نییە.

ئێستاشی لەگەڵدا بێت كە سێزدە ساڵ بەسەر شۆڕشی رۆژئاوای كوردستاندا تێپەڕ دەبێت و گەلی كورد ئەزموونێكی بێ وێنەیان لەئاستی سوریا و رۆژهەڵاتی ناوین پێشكەش كرد بەتایبەتی لەبواری مافی مرۆڤ، ئازادی ژن و دیموكراسی و بەڕێوەبردندا كەچی ئەردۆغان و دەوڵەتەكەی لەهەڵپەی ئەوەدان رۆژێك بەر لەرۆژێك كۆتایی بەو سیستەمە بهێنن و كوردان بەتەواوەتی رادەستی گروپە چەتەكانی داعش و بەكرێگیراوە نێودەوڵەتیەكان بكەن. ئیدی نازانم بەچە روویەكەوە ئەو ووتانە باس دەكات. ئەگەر بەڕاستی ئەردۆغان خاوەن كەرامەتە، خاوەن ویژدان و ئەخلاقە، دەبێت دەستخۆشی لەكوردان لەرۆژئاوای كوردستان و سوریا بكردبایا كە سەرەڕای ئەو هەموو دوژمنایەتی و داژیەتیەی لەبەرامبەریان بەرێوەی بردوە؛ ئەوان هیچ كاردانەوەیەكی نەرێنیان لەدژی توركیا و دەوڵەتەكەی نیشان نەدا و پێداگر بوون لەسەر گووتاری خۆیانی برایەتی و پێكەوەژیانی ئازادانە و دیموكراسیانەی گەلان، بەتایبەتی گەلی كورد لەهەمانكاتدا بە گرتنە بەری سیاسەتی هێڵی سێیەم رێگری كرد لەپارچەكردن و یەكپارچەیی خاكی سوریا و دووبەرەكی نانەوە لەنێو پێكهاتەكانی سوریا. دەبوایە ئەردۆغان لەشوێن ئەو قسانەی؛ بیگوتبایا پەشیمانم لەو سیاسەتەی لەبەرامبەر بەكوردان لەسوریا گرتمانە بەر بەدرێژایی ئەم سێزدە ساڵە و بەفەرمی رێوەبەری خۆسەری كوردانی لەسوریا و رۆژئاوای كوردستان و دان بەو رێوەبەریە دەهێنین و لەمەوبەدوای بەشێوەیەكی هاوسەنگ و پێكەوەیی كار بۆ پێشخستنی ئەزموون و بونیادنانەوە و گەشەپێدانی هەرێمەكەمان و سوریا و رۆژهەڵاتی ناوین دەكەین و دەتوانین بەیەكەوە لەبەرامبەر بە گروپە چەتەكان تێكۆشان بكەین وەگەر نا تەنیا بەقسەی رووت و بێ ناوەڕۆك و بێ پشتیوانی یاسایی هیچ كێشە و گرفتێك چارەسەر نابێت و برایەتی وەهاش مۆممكن نییە پێكبێت.

بەهەمانشێوە لێدوانەكانی باخچەلیش كەمتر نییە لەو بەیاننانەی ئەردۆغان؛ پارچەكردنی كوردان بەشێك لەسیاسەتی دانەبڕاوی هێز و دەوڵەتە داگیركەرەكانی سەر كوردستان و بەو سیاسەتەش هەمیشە كوردانیان هێناوەتە بەرامبەر بەیەكتر و بەدەستی كوردان بەخۆیان یەكتریان لەناوبردوە، لە مانیفێستی ئاشتی و بونیادنانی كۆمەڵگەی دیموكراتیكدا رێبەر ئۆجەلان سەرنجی راكێشابووە سەر چینێك لەناو كوردان كە هاوشێوەی چەند كۆمیتەیەكی یەهودیەكان بەناوی یودنرات(Jûdenrat) ئەوانەی لەكاتی كۆمەڵكۆژی یەهودیەكان سیخوڕی و بەكرێگیراویان بۆ ئەڵمانیا دەكرد، بۆ ئەوەی كەمێك تەمەنی خۆیان درێژ بكەنەوە؛ ئەو خیتابەی ئەردۆغان و باخچەلی بۆ ئەو چینەی نێو كۆمەڵگەی كوردیە. وەگەر نا بۆ ئەو بەیانەی باخچەلیش كە باسی دانانی دوو وەزیری كورد و عەلەوی دەكات هەر پارچەكردنە چونكە دەبێت یاسای بنەڕەتی توركیا هەموار بكرێتەوە و كورد وەك یەك لەپێكهاتە سەرەكی و بناغەدانەرەكانی كۆماری دیموكراتیكی توركیا بەناو بكرێت، ئەو كاتە هەم دەبێتە خاوەن بەش و هەم دەتوانێت بەشێوەی هاوبەشێكی راستەقینە لەبەڕێوەبردنی كۆماردا رۆڵی خۆی بگێڕێت. گەلی كورد خەمی پێدانی پۆست و پلە و پایەی نییە بەڵكو خەمی گەلی كورد دیموكراسی و پێكەوەژیانە و دووەمیش لەچوارچێوەی یاسادا دان بەمافەكانیدا بنرێت نەك ببێت بە جێگر و كارمەندی دەوڵەت خۆ لە عێراقیش ئەوانە كران و كەچی دواتر هەركات دەوڵەت بەهێز بووە هێرش و پەلاماری گەلی كوردی داوە چونكە بە یاسایی نەبووە تەنیا بەقسە و بەڵێنی سەر مێز و گوتنەوەی یەك ووشەیە بەناوی كورد برامانن، ئێستایش ئەو پەیامانە گەلی كورد وا دەیبینێت كە دیسان فێڵێكی تر لە پشتی ئەو قسانەوە لەسەری دەكرێت. وەگەرنا، كورد برامانن بەڵام بێ بەش، نە واتای برایەتی دەدات و نە واتای هاوبەشی، تەنیا هاوشێوە بوونە و هاوبەشبوونە لەسیاسەتی رژێمی ئێراندا.