ڕابەر ئاپۆ ماچۆ، هەرمانەکېش کە ئازادی ژەنێن و بە 'پرۆژەی نیمەو ناچڵ' نامېش ئاردەن و ئیتر دمایش ئامان و دەسنیشانش کەرد ئانەی پەنەوازا بکریۆ 'ئاردەی ئاراو ئی چێوەینە'. ڕابەر ئاپۆ پەی ژەنا واتش، 'حەرچڼە بە پەنەوازش بویندۍ چنیتا مژیوونەو هەنا."
ڕابەر ئاپۆ جە زینانو ئیمراڵییوە جە ٣٠ی ئایارینە نامێوەش پەی ئەکادیمیاو ژنۆلۆژی کیاست. ئێمە دەقو نامەکەو ڕابەر ئاپۆی وەڵا مکەرمېوە:
جە زاوڵەیمۆ کۊششم کەردەن بوو بە عالتەرین هەڤاڵ و هامبەشو ژەنا. تەنانەت جە پەیوەندیم چنی ئەڎێم شۊنەو ژەنۍ ئازادێرە گێڵانا. پېوەس بە وەرمەکامۆ ژیۋانا و کۊششو ئازادی ژەنێم وستەن ڕووە.
منیچ هەمیشە گەرەکم بیەن ڕۆڵێوە لایەق بە ژەنا بوو
یوەم جار کە بریانی پەی دوورگەو ئیمراڵی، واتم: " هەرمانەکېم پەی ژەنۍ پڕۆژێوە نیمەو ناچڵا." ئیساتۍ ئا هەرمانۍ تەمامیێنە و ئانەی مەنەنۆ جابەجێکەردەیشا. کۊششو ئازادی ژەنۍ میراتێوە فرە گرنگش وەشکەردەن. ئی میراتە تا ئارۆ بە قوربانیدای هەزاران گەشمەرڎا ئامان و قیمەتێوە گرنگش وەشکەردەن. پەنەوازا ئانە بزانیۆ کە من هەمیشە گەرەکم بیەن ژەنی بژیوا و بەزیڼەیی مەناوە، جە دەسدای هەر ژەنێوە عەزیەتش کەردەنا. جە بارەو منۆ واتەنشا "کوڕو خوڎاوەندیا". منیچ هەمیشە گەرەکم بیەن ڕۆڵێوە لایەق بە ژەنا بو. ئینە بنەماو بنەڕەتی کۊششەکەیمش دیاریکەردەن. پەرەم بە "پرەنسیپو هیوا"یدا پەی ژەنا. واتم گرڎ ژەنێوە مشۊم ئازادە بکریۆ. منیچ پېسە پیێوە ۋێم بە پیمەرەکا ئەخلاقی و زەریفی ئشناسا کە بە ئاستو ئازادی شێوە گێرۆ، پەروەردە کەردەن. واتم پرەنسیپو بنەڕەتی سۆسیالیزمی، ئازادی ژەنێن.
پیمەرو سۆسیالیستبیەو پیێوەیچ ئانەنە کە بزانۆ چنی چەنی ژەنۍ بە ڕاسی بژیۋۆ. ئینە پرەنسیپو بنەڕەتی سۆسیالیزمین. جە تەمامو ئەزموونە سۆسیالیستییەکا تاریخینە ئی بنەمایۍ هەمیشە کەم مەنەنۆ. ئەر پەیوەندی گرڎو ڕابەرە سەرمەشقەکا جە مارکسیوە پەی ستالینی و جە ماو-ۆ پەی لینینی چنی ژەنا بە عالی هۊرسەنگیۆ، ئی حەقەتینیە عالتەر میاومێنە.
پەنەوازا ئشناسنامە و بیەو ژەنۍ بە ڕێبازو هامتاکەردەی مامەڵەش چنی بکریۆ
پڕۆژە تەمام نەکریاکەم بە ژنۆلۆژی مەوداش بڕی. پی تیۆر و چەمکەیە گەرەکم بۍ کێشەو ژەنۍ بە ڕاسی بشناسو. پېسە بودا ماچۆ: "بەبێ بەرئاوردەی خەنجەرەکۍ جە مازی گلېرگەینە حیچ نمەکریۆ." بەڵێ گلېرگە کێشۍ فرێش هەنۍ، بەڵام خەنجەرەکۍ مازیش، کۆیلایەتی ژەنێن و بەبێ بەرئاوردەی ئی خەنجەرۍ حیچ کێشێوە چارەسەر نمەکریۆ.
ژنۆلۆژی چی مەبەسەنە گەشتێوە گرنگش کەردەن. ڕەنجێوە بەقیمەت خەرج کریان. ئی مانیایە چنی پڕۆسە تازەکەی مانای زیاتەر بەدەس مارۆ. پەنەوازا بیەو ژەنۍ بە ڕاسی بشناسیۆ و ئشناسنامە و بیەو ژەنۍ بە ڕێبازو هامتاکەردەی مامەڵەش چنی بکریۆ.
پەی ئانەی ژەنی بتاوۆ ئازادانە بژیۋۆ، مژیوونە
سیمۆن دی بۆڤواریچ ماچۆ: " ئینسان پېسە ژەنۍ جە ئەڎۍ نمەبۆ، کریۆ بە ژەنی." پەنەوازا ئشناسنامەی بنیاڎنریاو ژەنۍ جە توخمەکا ڕەگەزگەرایی-سێکسیزمی پاک بکریۆوە. ژەنی مشۊم سەرو ئانەی قاڵۍ باوە. پېسە ڤیرجینیا وۆلف ماچۆ: " ژەنی مشۊم ژوورێوە تایبەت بە ۋێش بۆ". مشۊم ژەنی ویر جە ۋێش بکەرۊوە و بتاوۆ ۋێش بنیاڎ بنیۊوە. بە زانای ئانەی کە ژەنبیەی چڼە سەختا، ئینەی ماچو. جە کاتێنە پیا چێرو کەلتوورو بەردەوامی دەستدرێژینە مژیۋۆ، ۋۍ بنیاڎنیایۆ ئازادانە پەی ژەنۍ سەختا. بەڵام نمەزانو ئایا ژەنۍ ئی حەقەتینە سۊچنەرەیە پېسە من بە ئێش و تووڕەییوە درک پنە مکەرا یان نا. من پی تووڕەییۆ گرڎ ڕوۍ ۋێم جە ڕوو ویرکەردەیۆ تازە مکەرووە، چارەسەر وزو ڕووە و پەی ئانەی ژەنی بتاوۆ ئازادانە بژیۋۆ، مژیوو. ماناو ژیۋای جە لاو منۆ پی جۊرە ڕاسی موینۆوە.
هەوڵم دان پیای فاڕ و گلېرگەی چنی ژەنۍ ئازاد بکەرو
فێمینیستەکۍ پرسیار مکەرا کە چی پیێوە سەرۆکو جمېیەرو ژەنا کوردین. ڕاس ماچا، وەشڵەی ژەنی تاوابیێشا ئی سەرمەشقیە بکەرا. منیچ پەڕ بەدڵ ئینەم گەرەک بۍ. داخەم نمەشۆ جە جبەرو جمېیەرو کوردیچ بە گرڎیی هەڵای ئی سەرمەشقایەتیە نامان ئاراوە. من بەردەوام بە واتەی پەنەوازا ژەنی ئازادە چنینە بۆ، پڕۆژە و تیۆریم وستەن ڕووە؛ ئایدیۆلۆژیاو ئازادیی ژەنۍ و ژنۆلۆژیم پەرەپنەدا، ئینەم کەردەن بە هێزێوە ڕێکوزیا. هەوڵم دان پیای فار و گلېرگەی چنی ژەنا ئازاد بکەرو. پەی ئانەی کوڕێوە لایەق بە خوڎاوەندەکا بوو ئینەم کەردەن. چەمەڕاتانا کە پی حەقەتینەمۆ، بە عالی جە من بیاودێنە.
مزانو ژەنی سەرمەشقایەتی پڕۆسەو "ئاشتی و دیموکراسی" مکەرا کە هەوڵو پەرەپنەدایش مڎەیمۍ. ئاڎۍ داراو زیاتەر جە نیمەو ئا سەرکۊتانۍ کە تا ئیساتۍ بەدەسئامېنۍ. جە ئیساتێچۆ باوەڕم پانەینە کە سەرمەشقایەتی مکەرا و ماچو پا ئاستەی پەنەوازتانە، چنیتا ژیۋای و چنیتا بیەی درێژە پنە مڎەو.
هەرپاسە ڕابەر ئاپۆ چڵە دارێوەش بە سەوقاتی پەی ژەنا کیاستەن کە جە گێرتەخانەو ئیمراڵینە سەوز بیەن.
