ڕاپیمای ستراسبورگی: ئیمراڵی ناوەندو سیستەمو ئەشکەنجەی و قڕکەردەین
دژو گۆشەگیری ئیمراڵی ستراسبورگەنە ڕاپیمای کریا و پەیامو ۋەرفراوانکەردەی ئەرەکۊشای جە دژو گۆشەگیری ئیمراڵی دریا.
بە دیمەن
ستراسبورگەنە بۆنەو یوەمین ساڵوەگەڕو هەڵمەتەو جەهانی "ئازادی پەی عەبدوڵا ئۆجالانی، چارەسەری سیاسی پەی پەرسەکا کورد'ی جە لایەنو کۆمون و ژەنا زینی و ناوەندو گلېرگەو دیموکراتیکی ستراسبورگیۆ ڕاپیمایۍ ئەنجامدریا و لافیتۍ "گۆشەگیری ٢٥ ساڵە، بە ماناو ئەشکەنجەی ٢٥ ساڵەی مۍ؛ دمایی بە ئەشکەنجەو سەرو عەبدوڵا ئۆجالانی مارمۍ" و ئاڵاو پەکەکەی بەرزۍ کریێوە. دروشمەکۍ "بژیۋۆ سەرۆک ئاپۆ"ی و "ژەنی ژیۋای ئازاڎی"... وچیێوە.
جە ڕاپیماکەینە ئەندامەو کۆمۆنو ژەنا زینی، هێلین دێرسیمە، چالاکە جانیا و سیاسەتمەدارو کوردی جومعە تاک قسێشا کەرڎۍ و ئاماژەشا بە پلانگێڵنی مېیاننەتەوەیی کەرڎ و باسشا چانەی کەرڎ کە سیستەمو ئیمراڵی بە ماناو سیستەمو پاشێلکەردەی مافەکا مرۆڤی مۍ.
هەڵوێس دژو هەمکارا خیانەتی
جە قسەکاشانە هامکارییەکاو پەدەکەی، بنەیانەو بارزانیشا شەرمەزارکەردۍ. داواکریا حکومەتو عێراقی دەس جە پەیماننامەکاش چنی دۆڵەتو تورکی هۆرگێرۆ.
بانگەواز پەی ئەرەکۊشای مېیاننەتەوەیی و پەشتیوانی
جە بەردەوامی قسەکانە بانگەواز ئاراسەو ئازادیوازا کریا کە پەشتیوانی جە ئەرەکۊشای مېیاننەتەوەیی بکەرا. گرڎو گەلا چێر دەسی، کرێکارا، دیموکرسیوازا دژو سیستەمو سەرمایەداری مرداوە.
جە دمادماینە سیاسەتمەدارو کوردی جومعە تاک ئاماژەش بە بەردەوامی جەنگو یەرەمو جەهانی کەرڎ کە چوارچێوەو مەسڵەحەتەکا سیستەمو سەرمایەدارینە جە ۋەرکۊتوو مېیامینینە و بە پەنەوازش زانا گەلا ۋێشا بەڕێکوستەی بکەرا و ۋێڕاگرێبا.
