هونەرمەندو کوردی شیخموس دەمیر ئشناسیا بە 'ئاپێ شێخموس'  دماو تەمەنێ پەڕ جە خزمەتکەردەی هونەر و کلتووری کوردی، جە دوورە وڵاتینە و جە شارو گیسنی ئەڵمانیای بەمەڵامەتو نەوەشیێ سەختی عەمرەوخوڎایش کەردە و میراتێ گۆرەی هونەریش جە دماو وێشۆ جیائاست.

شێخموس دەمیر جە ساڵۆو ١٩٥٣ جە لادەگاو تاقای مەنتێقەو میدیاتی مێردینی ئامان دنیاوە، بە مەڵامەتو فشارو فاشیستی دۆڵەتو تورکیۆ جە ساڵەو ١٩٩٣ێنە بە ناچاری بەرەو ئەڵمانیا کۆچش کەردەن. ئاپێ شێخموس بە چنین گۆرانیۍ پێسەو 'شەنگال'، 'بارمەکە'، 'گەشمەرڏە مەمە' و 'دێرسیم'ی بە ژەنیەو سازەکەیش خزمەتێ فرەش بە کلتوور و هونەری کوردی کەرد.

هەرپاسە پەی خزمەتکەردەی کلتووری و هونەرو کوردی، ئاپێ شێخموس جە ساڵۊو ١٩٩٤ینە جەمەو هونەری 'زەردەشتو کاڵ'یش ئەرەمەرزنارە و چا ڕێوە چڼین هونەرمەنڎۍ خزمەتو هونەری کوردییشا کەردەن.

قەرارا بە مەراسیمێ تەرمو شێخموس دەمیری جە قەبرسانو خالبوبی لادەگاو تاقای ئسپەردەو خاکی بکریۆنە.