بە سەرمەشقایەتی جەمەو پەشتیوانی جە بنەیانەو زینانیا (TUAY-DER)ی ئامەدەنە بە دروشمۊو 'کیانای زەڕی پەی زینانیا تاوانە نیەنە' هەڵمەتەو کیانای زەڕی پەی زینانیا دەسشپنەکەرڎ.

پێوەس بە هەڵمەتەکۍ وەردەمو لقو پۆستەی و یاونای ئامەدینە ئەرەیاونێوە ونریاوە. نوێنەرا پارتە سیاسیەکا و ڕێکوزیا مەدەنییەکا بەشدارۍ هەڵمەتەکۍ بێنۍ.

ئەرەل توما هامسەرۆکو ئامەدو TUAY-DER ی قسێش کەردۍ و ئاماژەش پانەیەدا کە پاشێلکەردەی جە زینانەکانە بەردەواما و ئاشکراش کەرد گۆشەگیری سەرو ڕابەر ئاپۆی جە گردو زینانەکا تورکیاینە وەڵابیەنۆ.

جە درێژەنە ئەرەل ئاماژەش پانەیەدا کە ئاستەنگی جەکیاناو زەڕو قۆمو کەسا زینانیا مکریۆنە پەی زینانیەکا و ئینەیچش وات: "ئینە قبوڵکریا نیا و پاشێلکاریی مافو زینانیان. پەی ئاستەنگیکەردەی مافو زینانیا ئی هەرمانێ مکریۆنە."

جە دماو ئەرەیاوناکەی جە لقو پۆستەی و یاونای ئامەدینە زەڕ وزیا سەرو هەژمار بانکی زینانیا.

قەرارا هەڵمەتەکۍ هەر حەفتێوە جە شارێ جیاوازەنە بە کیاناو زەڕی پەی زینانیا بەردەوام بۆنە.