بافڵ تاڵەبانی سەرۆکو یەنەکەی بۊنەو بینای دەیەم کۊنگرەو پەیەدەی پەیامېوەش وەڵاکەردۆ و ئەرەیاوناش، "جە گرڎ کاتېو زېیاتەر پەنەوازیما بە هامکاریی و هەرمانەی هامبەشێ هەن"، باسش چانەیچ کەرد، "تا پەرسو کورڎی چارەسەر نەکریۆ ئاشتیی جە وەرکۆتوو مېیامینینە نمۍ دی''.
بۊنەو بینای١٠یەمین کۊنگرەو پارتو یۊبییەی دیموکراتی-پەیەدەی، بافڵ تاڵەبانی، سەرۆکو یەنەکەی، پەیامېوەش ئاراسەو پەیەدەی کەرد.
جەسەرەتاو پەیامەکەینە بافڵ تاڵەبانی موبارەک بایش جە بینای کۊنگرەو پەیەدەی کەرد و ماچۊ: "بینای کۊنگرەکەیتا ئینا هەلومەرجێ هەستیارەنە کە ناوچەکەما و وەرکۊتوو مېیامینی توشو ئاڵنگاریی گۆرەی بېیەنۆ، کە جە گرڎ کاتېو زېیاتەر پەنەوازیما بە هامکاریی و هەرمانەی هامبەشۍ هەن پەی پارێزگاریکەرڎەی جە مافە نەتەوەییەکاما و ئا دەسکۆتا کە بەبەدەسئامێې."
سەرۆکو یەنەکەی ماچۆ: "ئێمە باوەڕیما پاسەن کە هیچ كێشە و ئاریشێوە نیا كە بە گفتوگۆ چارەسەر نەكریۆ، خاستەرین بژاردەیچ پەی ئی فاڕییایا کە ئامێنۍ وەڵێ چارەسەری ئاشتییانە و پەنابەردەین ۋەرو گفتوگۆی پێسە واتەنیچما هەتا پەرسو كوردی جە مەنتیقەکەنە چارەسەرنەكریۆ ئارامی جە وەرکەوتو مېیامینینە نمێ دی و هیواڎارەنا گرڎ لێوە گێڵاوە سەرو مێزەو گفتوگۆی باوەڕی تەماما پانەی هەن کە بە پێوەرە ژیوای و پێوەرە هەرمانکەردەی بیمۍ هامبەشۍ نەك دژمنۍ یۆترینی."
جە بەشێوە تەرو پەیامەکەیشەنە بافڵ تاڵەبانی ئەرەیاونانش: "دڵنیانا چی ئەزموونەیچتانە سەركۆتێ بیدێ، كە چەمەڕێنمێ ڕاسپاردە و بڕیارەكێتا جە خزمەتو زیاتەرو ئامانجە باڵاكا گەلو كوردی و پێوەرە ژیوای ئاشتییانەو گرڎو گەلانە بۆ".
جە ٢١ و ٢٢ ئەیلوولینە ١٠ەمین کۆنگرەو پارتو یۆبیەو دیموکراتی-پەیەدەی بە درووشمەو “پێوەرە پەی پێکئاردەی ئازادیی جەسەیی ڕابەر ئاپۆی، چەسپنای ئیدارەو وێڕاوەبەری و بنیاتنیای سووریایۍ دیموکراتی” جە هۆڵو سەردەمینە جە شارو حەسەکەی وەرنیشتو کوردسانی لوا ڕاوە، جە کۆنگرەکەنە هەریۆ جە “غەریب حەسۆ و پەروین یوسف”ۍ پێسەو هامسەرۆکا تازەو پەیەدەی هۆرۍ چنیۍ.
