سەرسەبای ئارۊ دوە شەممەی، بومەلەرزەێۋی گەورە کە هێزەکەش (7.4) پلۍ بەپیمانەو ڕیختەری بییەن، سەرنیشت، رۆچاڤا، پانیشتو کوردستانی، چنڎین شارۍ و ناوچۍ تورکیای و سوریاش لەرناوە. ناوەندو بومەلەرزەکەی شارەکڵەو پازارچخی سەر بە پارێزگاو مەرعەشی جە سەرنیشت (باکور)و کوردستانی بییەن.
بومەلەرزەکە بەشێۋی فرە جە پارێزگایەکۍ باکوری گێرتەنەوە و جە مەرعەش، عوسمانییە، دیلۆک، کلس و مەلاتیاوە تا ئورفا، ئامەد، سێرت، مێردین، شرناخ، سەمسور، سیواس و دەوروبەرشانە زیانی گیانی ماددی و فرەش شۆنیەرە ئاومان. بەپاو زانیارییە سەرەتاییەکان، هەزاران باڵاخانۍ، تەلارۍ و یانۍ زیانشان پنەیاۋان و نزیک بە ٣٠٠ کەسێ گیانشان جەدەستدان و هەزاران کەسێ بریندارۍ بیێنێ.
جە ڕۆچاڤاو کوردستانیچ بومەلەرزەکە جە عەفرین، شەهبا، باب، جەرابولس، کۆبانێش گێرتەنەوە و جە عەفرین و شەهبا فرەتەرین زیاش بییەن و ژمارێۋی فرۍ یانۍ وڕێنێرە و دەیان قۆربانیۍ هەنۍ.
جە پانیشتو کوردستانیچ بومەلەرزەکە شار و ناوچەکۍ پارێزگاکۍ دهۆک، هەولێر و موسلیش لەرێنێوە، بەڵام زیانی گیانیش نەبییەن و چنڎ باڵاخانۍ و تەلارۍ و یانۍ زیانی کەمشان دییەن.
جە شارەکۍ ئەدەنە، قەیسرییە و چنڎین شارێ تەرێ تورکیایچەنە بومەلەرزەکە زیانش بییەن و هەستش پنە کریان.
بەپاو ئاماری سەرەتایی کە جە تیمە فریاگوزارییەکانو تورکیای و باکورو کوردستانی هۆگیریان، جە تورکیا و باکورو کوردستانی تا ئیسە نزیکە بە ٣٠٠ کەسۍ گیانشان جەدەستدان و زیاتەر جە ٣ هەزار کەسێ بریندارێنۍ. هاموەخت هەزاران کەسێ تەرێ بیێنۍ چێرو یانە و باڵاخانە ئەرەوڕیایەکارە و هەوڵەکۍ پەی بەرئاوردیشان بەردەۋامەنۍ.
جە سوریاچ، بومەلەرزەکە کەوتەرین زیانش جە پارێزگانو حەلەبی و ئدلبی دان و سەدان یانۍ باڵاخانێش وڕنێنێرە و سەدان کەسێچ گیانشان جەدەستدان و هەزران کەسێچ بریندارێ بیێنۍ.