دماو ئانەی عەلی خامنەیی، ڕابەروو كۊماری ئیسلامی، چەنەویەرڎەی گرڎینش پەی بەشۍ جە وێنیشاندەرە گیریایەکا بەر کەرد، بڕیارەكەش كاردایۊیۍ فرەش جە دلۍ و بەروو ئێرانیچنە شۊنەو وێشرە ئارد.
ڕۊو یەکشەممەی عەلی خامنەیی، ڕابەروو باڵاوو ئایینی كۊماروو ئیسلامی، چەنەویەرڎەی گرڎینش پەی بەشۍ جە وێنیشاندەرە گیریایەکا بەر کەرد.
جە بڕیارەكەنە چنڎین شەرتۍ پەی ئا کەسا کە چەنەویەرڎەی گێرۊشاوە نریێنێرە، پێسە تۊمەتبار نەبییەی بە جاسووسی و پەیوەنڎیی چەنی وڵاتاو بەری، یان گرووپە وەرهەڵێسکارەکا، تۊمەتبارنەبییەی بە بەشداری جە كوشتەی یان برینداركەردەی هێزەكاو دەوڵەتی، چۊوەنەتلیای جە سۊچنای مڵك و ماڵی تایبەتی و گرڎی و نەبییەی سكاڵای تایبەتۍ سەرشاوە.
ئا قەرارەو خامنەیی جە تۊڕە كۊمەڵایەتییەكانە، كاردایۊیۍ فرەش شۊنەو وێشرە ئارد و بڕێوە جە بەكارئاوەرا باس چانەیە كەرا، دماو جەداردای چوار كەسا و كوشتەی نزیكەو ٥٠٠ كەسا، چەنەویەرڎەی گرڎین هیچ بەهاێوەش نییەنە. هامكات بڕێوە تەر جەختشا چانەیە کەردۊ، کە ئا چەنەوەشبییەیە حیچ جە بارەو وەرپەرسبییەی خامنەیی جە سەركوتی وناڵینوو وێنیشاندەراوە سووك مەکەرۊ.
حەرپاسە ڕێكوزیاو مافوو مرۊڤوو ئێرانیچ ئەرەیاونانش، ئاهەنگامۍ خامنەیی خەڵەتنەرانێنە و تەنیا پەی هاشووهووشین.
جە لایۍ تەرۊ، ژمارێوە پارێزەرۍ، چالاكاو مافوو مرۊڤی، وێنیشاندەرۍ زیندانیكریۍ و زیندانییە سیاسییە وەڵینەکا، چەنەویەرڎەی گرڎینوو خامنەیی-یشا بە بانگەشە و بە ئامانجوو سەپنای وانایۊی درۊیینەودەسەڵاتی و یاگەفاڕای بێشەرمانەو شۊنەو سكاڵاكاری و تۊمەتباری نامۍ نیان.
هەمان وەختنە ژمارێوە بەكارئاوەراو تویتەری جە هەڵمەتێوە ناڕەزایەتینە بە هاشتاگوو #جەویرێش مەکەرمۍ (#یادموننمیرە) كاردایۊشا وەراوەروو ئا چەنەویەرڎەیە نیشانە دا و كوشتەی و ناڕازییشا و وەرهەڵێسكاری دەسەڵاتوو كۊماری ئیسلامیشا ویر ئاردۊ.
چەنەوییەرڎە گرڎینەکەو خامنەیی ئینا وەختێوەنە کە تا ئیسە، دەسەڵاتوو داڎوەریی ئێرانی، ژمارەو گیریایا وێنیشاندایەکا و ناڕەزایەتییەکا ئا وڵاتەیشە بەر نەوستەن.
بە پاو دمایین ئاماروو كۊمەڵەو چالاكا مافوو مرۊڤوو ئێرانی –هەرانا، "مەزندە کریۊ لە ماوەو وێنیشاندانەكانە، لای كەمیوە ١٩ هەزار و ٦٢٣ كەسۍ گیریێنۍ، حەرپاسە چوار كەسۍ بۊنەو بەشداریكەردەیشاوە جە ناڕەزایەتییەکانە دریێنۍ دار و ١٠٩ كەسۍ تەرێچ ترەسەو سەپنای و جابەجاکەردەی سزاو جەداردای هەنە.
