کاکەییەکۍ ھەڵەبجەی و ھۊرامېەکۍ داوا کەرانۍ، جە پڕۊگرامەکا ۋەناینە ۋانێۋە بنریۊرە پۍ ئەدەب و ڕازۋانو شێۋەزارو گۊرانی (ھۊرامی)و حەرپاسە ئاین و یارسانیەکایچ کریۊنە دلۍ پڕۊگرامو ۋەنای، تا زارۊڵەکێشا بتاۋا ئاسانتەر جە دەقە پېرۊزیەکا بیاۋانەو ۋەناشاۋە.
ئارۊ دوۋەشەممە ۋەروبەرەو ھۊڵو کاکەییەکانە جە پارێزگاو ھەڵەبجەی، ڕێکوزیاو ژیۋای و ڕێکوزیاو شنرۋۍ کاکەیی جە ڕۊو جەھانی زۋانی ئەڎایی-نە، جە بەیاننامێۋە ھامبەشەنە کاکەییەکۍ و ھۊرامیەکۍ ئەرەیاۋنێۋەشا ۋەڵاو کەرڎۊ و جە مۍ(کۆمەڵێ) داوێشا ئاڕاسەو حکومەتی کەرڎۍ.
عېسا کاکەیی، جە کۊنگرێۋە ڕۊنامە ۋانېنە بەیاننامەو ڕێکوزیاو ژیۋای و ڕێکوزیاو شنرۋۍ کاکەییش ۋەناۋەو ۋاتش:'' ئێمە پێسە کاکەییەکا ھەڵەبجەی ژمارێۋی فرە ۋەنەرێما ھەنۍ جە دلۍ ناۋەنڎەکاو ۋەناینە، ھەرپاسە داواکەرمۍ شێۋەزارو گۊرانی (ھۊرامی) ۋنریۊ و پێشا فەراھەم بۊنە، چونکی شێۋەزارو گۊرانی زۋانو کتێب و پیرۊزو ئێمەن، ئەگەر مەنتېقەو ھۊرامانی زۋانو ئەڎایشا ھۊرامی بۊ ئانە ئێمەی یارسانی زۋانو گفتوگۊیمانە چنی خوڎای گۊرەی.
جەبەیاننامەکەنە ئامان، ئەگەر ھۊرامیەکۍ گرڎ ڕوۋۍ دلۍ ۋێشانە مامەڵە پی زۋانەیە کەرا، ئانە یارسانەکۍ گرڎ ڕوۋۍ مامەڵە چنی دەقە پېرۊزیەکا یارسانی کەرا، کە پی زۋانە پېرۊزەیە نۋیسیان، پۊکەی پەنەوازا پۍ ئێمەی یارسانیەکا جە ۋاننگەکانە ۋانێۋە بنریۊرە پۍ ئەدەب و ڕازۋانو شێۋەزارو گۊرانی (ھۊرامی) حەتا زارۊڵەکێما بتاۋا ئاسانتەر جە دەقە پېرۊزیەکا بیاۋانەو ۋەناشاۋە.
حەرپاسە داواشا کەرڎ، شێۋەزارو گۊرانی پۍ پڕۊگرامەکا ۋەنای زیاڎ کریۊ، خۊنڎکارەکۍ یارسانیچ جە ۋەنای شێۋەزارو گۊرانی (ھۊرامی) بێبەشۍ نەبا جە ناۋەنڎەکاو ۋەناینە.
ھ.ش
