دماو گلېرۊبیەو شاندو دەم پارتی چنی پارتو دەڤای و سەعادەتی، دەم پارتی ئەرەیاۋنێوەش وەڵاکەرڎۆ و ئەرەیاۋناش مشۊم کۆمیسیۆنێوە بە دەسەڵاتی تەمامەتیوە چێرو چەمڎاری پەرلەمانینە پێکبۍ.
شاندێوە کە پێکئامابۍ جە هامسەرۆکا گرڎی پارتو یەکسانی و دیموکراسیی گەلا (دەم پارتی) تولای حاتەم ئۆغۆللاریە و تونجەر باقرخان و هامسەرۆکا فراکسیۆنو دەم پارتی سەزای تەمەلی و گوڵستان کیلیچ کۆچیگیتە، ئارۊ چنی پارتو سەعادەتی و پارتو دەڤای گلېرۍ بیێوە.
نووسینگەو ئەرەیاۋنای دەم پارتی دماو گلېرۊبیەکا، ئەرەیاۋنێوەش وەڵاکەرڎۆ.
جە ئەرەیاۋناکەینە ئامان: "چی سەرۋنەداینە مژاری گرنگ دەربارەو ئایندەو دیموکراتیکی تورکیای تاوتوێ کریا. دماین دیدار چنی ئېژا عەبدوڵا ئۆجالانی و قەرارەکا کۆنگرەو ١٢ هەمینو پەکەکەی، بەشێوێوە ۋەرفراوان هۊرسەنگنایشا پەی کریا. چی چوارچێوەنە، ئەرکو پارتە سیاسییەکا و پەرلەمان گفتوگۆشا سەر کریا. شاندەکەما پێشنیارش کەرڎ کە چېرو چەمڎاری پەرلەمانینە کۆمیسیۆنێوە بە دەسەڵاتی تەمامەتیوە پێکبۍ کە نوێنەرایەتی گرڎو لایەنە سیاسییەکا بکەرۆ و هەوڵەکا پەی ڕێککەوتەی دیموکراتیکی ئاسانتەر بکەرۆ".
جە ئەرەیاۋناکەینە جەختکریانۆ، جە ڕوانی ئایندەنە شاندو دەم پارتی چنی ئاکەپەی و مەهەپەی و پارتە سیاسییەکا تەریچ گلېر بۆوە.
