دۆڵەتو تورکی ئەرەگیری بەردەواما جە هرووژمەکاش پەی سەرو پانیشتوو کورڎەسانی، ئارۊیچ تۆپبۋارانو سنوورو دهۆکیش کەرڎ و گولـلە تۆپێوە جە دەگاو گوهەرزێنە کۆتە یانەو هاموڵاتیێوە، زەرەری ماددیش شۊنەو ۋێشەرە ئاورڎ.
ئارۆ، جارێوەتەر دۆڵەتو تورکی ئەرەگیری، تۆپبۋارانو دەگاو گوهەرزێش جە سنوورو ئامێدی پارێزگاو دهۆکینە کەرڎ.
کامەران عوسمان ئەندامو ڕێکوزیاو سی پی تی ئەمریکیی چا بارۆ ئەرەیاۋناش، جە سەعات ٠٢:٣٠ دەیەقۍ دمانیمەڕۆو ئارۆینە، تۆپێوە دلۍ یانەکا دەگاو گوهەرزێنە کۊتەرە واری.
ئاماژەش پانەیچ دان، هیچ زەرەرۍ گیانیی نەبیەن، زەرەر ۋەرو یانەو ئا هاموڵاتییە مەدەنییە کۊتەن کە تۆپەکێش ۋەرکۊتێنە.
ئا ئەندامەو سی پی تی ئانەیچش ئاشکرا کەرد، کە جە سەرەتاو ئێساڵیوە، ١١ جارۍ، تۆپە کۊتێنە دلۍ یانەکاو دەگاو گوهەرزێ جە ناوچەو ئامێدینە.
جە دما دمایچەنە ئەرەیاۋنانش، سوپاو تورکیای جە ١٥و حوزەیرانو ئێساڵیوە، دووۍ بارەگۍ سەروازیێش جە پەشتەو دەگاو گوهەرزێوە وەشکەرڎێنۍ و بەشێوە هرووژمەکا ئێساڵی کۊتێنۍ سنوورو دەگێکێوە.
