بە پاو میدیاکا ۋەرکۆتوو کورڎەسانی دۊڵەتو ئێرانی سەیاد دەروێش براو فەرجاد دەروێشی یۆ جە گیانبەخشایا سەرهۆرداو ژەنی، ژیۋای، ئازاڎی بە مەبەسو ۋییەرنای ماوەو سزاکێش رەوانەو زیڼانی ورمێ کەرڎەن.

فشارەکۍ دۊڵەتو ئێرانی پەی سەرو کەسوکارو گیانبەخشایا سەرهۆرداو ژەنی، ژیۋای، ئازاڎی بەردەواما. چا چوارچێوەیچەنە سەیاد دەروێشی کە بە تۆمەتەو 'پروپاگەنڎەی دژو دۆڵەتی' سزاو ٨ مانگا زیڼانیش سەرەرە سەپیا بۍ، پەی جابەجێکەرڎەی ماوەو سزاکێش فاڕیانۆ پەی زیڼانو ورمێ.

شایەنو باسیا ٢٩و ئەیلولو ٢٠٢٢ فەرجاد دەروێشی تەمەن ٢٣ ساڵ خەڵکو دەگاو بالوی جە ۋێنیشاندایەکا سەرهۆرداو ژەنی، ژیۋای، ئازاڎی جە ناوچەو وەلیعەسرو ورمێ بە گولـلۍ راسەوخۆو هێزەکاو دۊڵەتو ئێرانی تیرۆر کریابۍ.

هەر جە چوارچێوەو فشارەکا سەرو بنەیانەو گیانبەخشایا سەرهۆرداکەینە مینا سوڵتانیە ئەڎاو شەهریار محەمەدی کە جە کاتو سەرهۊرداکەینە بۆکانەنە کوڕەکەش گیانشا بەخشا بۍ نزیکەو ١٠ ڕووان ئینا زیڼانەنە و رووبەڕوو ئەشکەنجەی دەرونی بیێنۆ.

هامکات جە سەحنەیچەنە ئەمیر حسێن حەقجویان کوڕە لالۆ و هەمڕای نزیکو رەزا رەسایی ۋێنیشاندەری جە قەنارەدریاو سەرهۊرداکەی، گیریا و ڕەوانەو ناوەندە ئەمنییەکا کریا.

جە ئەیلولو ٢٠٢٢ ێنە دماو تیرۆرکەرڎەی ژینا ئەمینیۍ جە لایەنو پۆلیسو ئەخلاقیوە، سەرهۆردایۍ گۆرە جە ۋەرکۊتوو کورڎەسانی و ئێرانی دەسشپنە کەرڎ.

جە سەرهۆرداکەینە سەڎان کەسۍ تیرۆرۍ کریۍ، بە هەزاران کەسێچ گیریۍ و چڼین کەسێچ دریۍ قەنارە.