دماو بوومەلەرزە ٧.٨ و ٧.٧ پلەیەکەو سەرنیشتوو کوردسانی، ملیۆنەها کەسۍ بۍ یانەولانۍ بییۍ و بەتەنیێنۍ و تا مۍ ئامارۍ زەرەرەکاو بوومەلەرزەکەی زیاڎتەرۍ و قورستەرۍ با، بەڵام دەوڵەتوو تورکی بە سەرۆکایەتیی ئەردۆغانی ئینا چانەینە بوومەلەرزەکەی پەی وێش بەکار بارۆ.
بوومەلەرزەکەو سەرنیشتوو کورڎسانی، کە جە مەنتێقەو بازارجخی و ئەلبیستان-وو سەر بە مەرەشی دلێنەکەش بۍ، زەرەر بە ١٠ پارێزگایا و گەورە شارا و شارۊچکا و دەگایا یاوان. هەزاران کەسۍ گیانشاجە دەس دان و ژمارەو ئا کەسایچە ئینێچێروو وێرانەکانە هەڵای دیار نییا. حەرچنڎە زیاڎتەر جە ٤٨ سەعاتا لوان سەروو کەوتەیشرە ، بەڵام تا ئیساتۍ تیمە فریاگوزارەکۍ دەوڵەتی نەیاوێنۍ فرەو یاگەکا و هاموەڵاتیۍ بە تواناو وێشا هەوڵۍ ڕزگارکەرڎەی ئا کەسا مڎا کە بیێنۍ چێرۊ. دماو دووۍ ڕووا جە بومەلەرزەکە ی حوکمەتوو تورکیای قەراروو ئەرەیاونای باری نائاساییش بەر کەرڎ.
ڕەجەبی تەیب ئەردۊغان سەرۊککۊماروو تورکیای ئەرەیاوناش، بە پاو ماددەو ١١٩ی دەستووری قەرارما دان باری نائاسایی ئەرەیاونمۍ. ئەردۊغان ٢٤ سەعاتۍ دماو بوومەلەرزەکە ی پەی یووەم جاری سەروو ئی بابەتەی قسێش کەرڎۍ، پەوکای بێتاقەتیی ئانەی هەن قەراروو باری نائاسایی بومەلەرزەکەی وەروو وێشا بۊ و سەبەبەکێچش ئینێنێ:
- ڕێکوزیایەکاو گلێرگەی مەدەنی و لایەنە سیاسییەکا و ئۊپۊزسیۊنی جە پڕۊسەو هامکاریکەرڎەی و بەدەمۊلای کریێنۍ بەرۊ. ئینە جە وەختێوەنە مەرەش، ئامەد، دیلۊک، ئەدەنە، عوسمانییە، ڕحا، سەمسور، مەلەتی و هاتاینە ڕێکوزیایەکاو گلێرگەی مەدەنی و نوێنەراو پارتە سیاسییەکا و خەڵکی مەدەنی هەر جە ئەوەڵۊ بە تەقەلا و تواناو وێشا جیاتیی هێزە پەیوەندیدارەکاو دەوڵەتی لوێنۍ دەموو خەڵکیوە و دەسشا کەرڎەن بە ڕزگارکەرڎەی خەڵکی و هامکارییشا، بەڵام بە ئەرەیاونای باری نائاسایی، ڕاگێری جە هەڵمەتەو هامکاریی ڕێکوزیایەکاو گلێرگەی مەدەنی و لایەنە سیاسییە ئۊپۊزسیۊنەکا و کارە جەماوەرییە وێزیایەکا(خۊڕسک)او خەڵكی کریان.
- جە چەنەدوایەکاشانە ژمارەی هەقەتینوو مەردا و بریندارەکا شاراوە، چونکوم ژمارەو مەردەکا و بریندارەکا و زەرەرەکایچ فرە جە چەنەدوایە فەرمییەکا زیاتەرێنۍ و پەی شارتەیۊ ئانەیچ، گەرەکشانە ڕا جە هاموەڵاتیییە مەدەنییەکا، ڕێکوزیایەکاو گلێرگەی مەدەنی، نوێنەراو لایەنە سیاسییەکا گێرا و تا ڕسمی هەقەتینوو کارەساتەکەی شاراوە.
- موراد کورووم وەزیرو فاڕیای کەشوهەوای و شارەوانی و ژیوگەی واتش: "ئێمە جگە جە دەسەو هەماهەنگیی ئافادی ڕا بە حیچ دەسێوە تەری مەدەیمۍ. ئانەیچش بەر وست، هامکارییەکۍ جە ڕاو ئافاد-یوە کووۍ کریاوە، پانەیچە دەسۍ گێرا ملوو ئا هامکارییارە، کە جە لاو ڕیکوزیایەکا گلێرگەی مەدەنیوە پەی پەترۊکبەستەی زەخماو بوومەلەرزەکەی کووۍ کریاوە.
- هامکارییەکاو بەروو وڵاتی جە سەرەتاو شارەکانە جە لاو دەوڵەتیوە دەسشا ملەرە گیریۊ.
- دەسەڵاتوو ئاکەپە - مەهەپە ی گەرەکشا ئا بارودۊخەیە پەی ورچنیایەکا مسڵەحەتوو وێشنە بەکار بارۊ، پەوکای بەئاشکرا ئاشکرا پێسە 'بەخشیشوو خودای' چا مسیبەتی نزیکۍ باوە، کە ملوو گلێرگەیرە ئامان.
بەپاو دماین زانیارییەکا، کە وەرپەرسا دەوڵەتوو تورکی وەڵاشا کەرڎێنۍ، بۊنەو بوومەلەرزەکاو ٦ی شوباتیوە، تا ئیساتۍ ٥ هەزارۍ و ٨٩٤ کەسۍ مەردێنۍ، بەڵام سەرچەمە هەرێمی و وێمانەکۍ ماچا، ژمارەی هەقەتین دووۍ ئاندە زیاڎتەرا، کە تا ئیساتۍ وەڵا کریانۊ.
جە دەورووبەروو یاگۍ بوومەلەرزەکەینە زەرەرۍ فرە وەروو خەسەخانەکا کەوتەن، مشکیلەو داوودەرمانی و خزمەتی پزیشکیی سەرەش وردان. ژوورۍ عەمەلیاتەکا بڕێشا وڕێنۍ، کەرەسۍ و پێویسییەکا و عەمەلیاتی کەمێنۍ. ئینە جگە ئانەی سۊچەمەنیی ئەمبوڵانسەکا کەما و مەتاوا سۊچەمەنیی تەمام ور گێرا.
