ڕابەرو گەلوو کوردی عەبدوڵا ئۆجالان جە ساڵەو ١٩٩٩یۆ بە پیلانگێڵنیۍ مېیاننەتەوەیی باڵبەس کریا و جە زینانو ئیمراڵینە زینانی کریان. جە ٢٥و ئادارو ٢٠٢١یوە ئینا چێرو سیستەمو ئەشکەنجەی و گۆشەگیری ئیمراڵیینە، هیچ جۆرە زانیاریێوەش جە بارۆ نیا. چا کاتۆ بە بەهانۍ بیەو یاساو دیسپلینی نمازا چەمش بە پارێزنەر و بنەیانەکەیش گنۆ. تورکیا کە ئەنداما جە کۆنسەو ئەوروپاینە، پەیماننامەو مافەکا مرۆڤو ئەوروپایش ئیمزاکەردەن، بەڵام بەردەوامە جە پاشێلکەردەی قەرارو دادگاو مافەکا مرۆڤو ئەوروپای سەبارەت بە مافەکا ڕابەرو گەلوو کوردی عەبدوڵا ئۆجالانی.

تا مۍ سەرو ئاستی نەتەوەیی و مېیاننەتەوەیی دواکاری پەی ئازادی جەسەیی ڕابەرو گەلوو کوردی زیاتەر بۆنە، هەر چا چوارچێوەنە ئەوەکۆڵیەری یاسایی مېیاننەتەوەی و ڕاوەبەرو (سی ئێن ئاڕ)ی پارێزنەر فابیۆ مارسیلی کە وەڵتەر سەردای تورکیایش کەرڎەن پێوەس بە جابەجێنەکەردەی قەرارەکا دادگاو مافەکا مرۆڤو ئۆروپای ( DMME) دەربارەو مافەکاو ڕابەرو گەلوو کوردی عەبدوڵا ئۆجالانی و سەختکەردەی گۆشەگیری قسێش کەردۍ و واتش: "جە ۋەرا ۋەرو ئانەینە کە مافەکۍ ئێژا ئۆجالانی جابەجۍ نمەکریا، مشۆم وڵاتا مېیاننەتەوەیی، ئەرەمەرزیا مېیاننەتەوەییەکۍ، ئەکادیمیۍ، ڕۆشنۋیرۍ و جمېیەرە کۆمەڵایەتییەکۍ سەرو ئاستی مېیاننەتەوەی فشار سەرو تورکیای وەش بکەرا پەی جابەجێکەردەی مافەکا ئێژا ئۆجالانی."

پارێزنەر فابیۆ مارسیلی سەرنجش وست سەرو قەرارو ٢٠١٤و دادگاو مافەکا ئەوروپای سەبارەت بە مافو زینانیا سیاسی جە تورکیانە و ئاماژەش پانەی دا کە تورکیا بە پاشێلکەردەی ئا قەرارا گرڎو یاساکا ئا ئەرەمەرزیایشە پاشێلێ کەردێنۍ و سەختکەردەی گۆشەگیری سەرو ڕابەرو گەلوو کوردی عەبدوڵا ئۆجالانی کارێوە نامرۆڤانەن. پۊکەی پەنەوازا چا بارۆ کار و کۆششما ۋەرفراوانتەربکەرمۍ.

بانگەواز پەی فشاری مېیاننەتەوەیی

مارسیلی یاڎش ئاردۆ کە جە ٢٥و ئادارو ٢٠٢١یوە هیچ زانیاریێوە جە بارەو گۆشەگیری ئیمراڵییوە نیا و بە مەڵامەتوو جوابدایۆ نەرێنی دۆڵەتو تورکی دەربارەو داواکاری بنەیانەی و پارێزنەرا پەنەوازا سەرو ئاستی مېیاننەتەوەیی فشار سەرو دۆڵەتو تورکی وەشبکریۆ و واتش: "پەی جا بەجێکەردەو قەرارەکا دادگاو مافەکا مرۆڤو ئۆروپای پێوەس بە مافەکا ئێژا ئۆجالانی، مشۆم فشاری مېیاننەتەوەی سەرو تورکیای وەشبکریۆ. قەناعەتم پاسەن کە ئاژێوە لەباری یاسایی هەن پەی جابەجێکەردەی ئا قەرارا، بەڵام پەنەوازا چی مژارەنە حکومەتی مېیاننەتەوەی، ئەرەمەرزیا مېیاننەتەوەییەکۍ، ئەکادیمیۍ، ڕۆشنۋیرۍ و جمېیەرە کۆمەڵایەتییەکۍ سەرو ئاستی مېیاننەتەوەی فشار سەرو تورکیای وەشبکەرا پەی جابەجێکەردەی مافەکاو بەڕێز ئۆجالانی."