فەد_کورد ئەرەیاۋناش هۆرکوای سەرو ناڤ_بەرلینی جەلایەنو پۆلیسیوە ڕاسەوخۆ بەئامانجگېرتەی ئەرەکۊشای دیموکراتیکی و مافو ڕێکوزیابیەی گەلوو کوردین، داواش جە حکومەت و ۋەرپەرسا ئەڵمانیای کەرڎ ڕێزبگېرۆ جە مافی ڕەوای دیموکراتیکی گەلوو کوردی.
فیدراسیۆنو کوردا ئازادی ئەڵمانیای ۋەرکۆتی (فەد_کورد) هرووژمو سەرو ناوەندو گلېرگەو کوردی دیموکراتیکیش جە بەرلینو پایتەختو ئەڵمانیاینە، بە ئەرەیاۋنێوە شەرمەزار کەرڎ.
ئەرەیاۋنۆش کە ئی هرووژمە چنی نزیکبیەیۆ ساڵیاڎو پیلانگێڵنیی مېیاننەتەوەیی ٩ و تشرینو یووەمی پێکئامان، هرووژمەکەی شەرمەزار مکەرۆ و ماچۆ: "ئی هرووژما دژو داواو ئازادی و ئاشتی و دیموکراسیی گەلوو کوردی قبووڵ نمەکەرمۍ، جەخت مکەرمېوە کە مشۆم ئەڵمانیا دەس جە سیاسەتو تاوانبارکەردەی گەلوو کوردی هۆربگێرۆ".
ئاماژە پانەی مکەرۆ، ئەڵمانیا ٣١ ساڵێن مافو ڕێکوزیابیەو گەلوو کوردی قەدەغە مکەرۆ و داواکارییە دیموکراتیکەکاو گەلوو کوردی بەشێوۍ سیستەماتیک تاوانبار مکەرۆ، ئەرەیاۋنۆش ئینە لکەدریان بە سیاسەتو فشاری و گۆشەگیری دۆڵەتو تورکی سەرو گەلوو کوردی و ئینەیچ قبووڵ نمەکریۆ.
هەرپاسە ئەرەیاۋنۆش کە ئی هرووژمە بناغەی یاساییش نییا و ماچۆ: "ڕاسەوخۆ ئەرەکۊشای دیموکراتیکی گەلوو کوردی و مافو ڕێکوستەیش کەرڎەن ئامانج. پۆلیسو ئەڵمانیای پی هەرمانە میزاجییاشە مافە دیموکراتیکەکێشا پاشێلۍ کەرڎۍ و هەڵوێسی ستەمکاریشا نیشانەدا".
هەرپاسە ئاماژە پانەی مکەرۆ کە بێدەنگی یۆبیەی ئۆروپای و هەڵوێسو فشارو ئەڵمانیای ۋەرا ۋەر بە گەلوو کوردی، خزمەت بە سیاسەتو گۆشەگیری دۆڵەتو تورکی مکەرۆ.
داوا جە حکومەت و ۋەرپەرسا ئەڵمانیای مکەرۆ بەپاو بەها گەردوونی و دیموکراتیکەکا مامەڵە بکەرا و ڕێز جە مافە ڕەوا و دیموکراتیکەکا گەلوو کوردی بگېرا و دمایی بە هرووژمە نایاساییەکا پەی سەرو ئەرەمەرزیا کوردییەکا بارانۍ.
