فێستیڤاڵو پاییزەی جە قەزاو کەلارینە کە ناوەندو ئیدارەو گەرمیانیا بەردەواما، کە چنەشەنە ٥٠ ورەشیارۍ بە بەرهەمە دەسکردەکا و واردە کوردەوارییەکا بەشدارێنۍ، هاموڵاتییا پێشوازیۍ گەرمشا ۋنە کەرڎەن فرەو بەشدارا فێستیڤاڵەکەیچ ژەنینۍ، چی بارۆ هەریۆ جە بەشدارا؛ گوڵناز ئەرجومەندە و چرا تاهیرە پەی ئاژانسوو هەواڵوو فوراتی (ANF)ی قسێشا کەرڎۍ.

جە سەرەتاو قسەکاشەنە گوڵناز ئەرجومەندە باسش چانەیە کەرڎ کە جە ۋەرکۊتوو کورڎەسانیوە ئامێنە پەی بەشداریکەردەی چی ڤیستیڤاڵەینە، واتش: "چی فیستیڤاڵەنە بە ئاردەی جلۍ کوردی و کاری دەسی، شیرینی کرماشانی بەشدارییم کەرڎەن، ئی فیستیڤاڵۍ فرە عالێنۍ کە جە کورڎەسانەنە کریاوە، بە تایبەت پەی ژەنا متاوا بەشداری بکەرا پەی نیشاندای هەرمانەکێشا و پەشتی بینا بە تواناکا ۋێشا جە پێڎاکەردەی بژێوی ژیۋایشانە پەی ئانەی پەنەوازشا بە کەسی تەری نەبۆ."

' ژەنی جە گرڎو بەشەکا کورڎەسانینە بەشداری فێستیڤاڵەکا بکەرا پەنەوازشا بە کەسی نمەبۆ'

جە دمادمایی قسەکاشەنە گوڵناز ئەرجومەندە باسش چانەیچ کەرد گەر جە هەر چوار پارچەو کوردەسانیوە ژەنی بەشداری فیستیڤاڵەکا بکەرا، ئانە حەجگیز پەنەوازشا بە کەسی نمەبۆ و پی جۆرە بەردەوامبیە: "وەڵتەر شیرینی فرە ئارێنا بەڵام بەمەڵامەتوە گەرمایۆ ئێساڵ ناردەنم چونکی خراپ بۍ. ئیساتۍ بەشداریم کەرڎەن بە ئارڎەی هێلەکا و سەرپۆشۍ بە دەس چنریای کە هەرمانۍ دەسیێنۍ."

دماتەر چرا تاهیرە ئاماژەش پانەیە کەرڎ پېسە گروپو چەما سلێمانی ئامێنۍ کەلار، پەی ئانەی بەرهەمەکا ۋێشا بشناسا و پی جۆرە دوا: "بەرهەمەکۍ ئێمە کارۍ دەسیۍ و چنیەی و جەمۍ واردۍ وشکەینۍ، چڼین نۆعۍ چێوما ئاورڎەن، ئانەما فرە پنە وەشا کە خەڵکی فرە بە گەرمیی پێشوازیما ۋنە مکەرا."

'گرنگا ژەنی هەرمانەکا ۋێشا نیشانە بڎا و پەشتی بە تواناکاو ۋیشا بینا'

جە دما دمایی قسەکاشەنە چرا تاهیرە باسش چانەیەکەرڎ کە گرنگا ژەنی کارەکاشا جە فێستیڤاڵەکانە نمایش بکەرا و نمەبۆ تواناکاشا بشاراوە، واتش: "فرە بە گرنگش مزانو ژەنی ئا هەرمانۍ کە جە یانەنە مکەراشا، کە هەرمانۍ فرە جیاواز و زەریفۍ مزانا متاوا چۍ پێشکەشش بکەرا، پەی ئانەی بتاوا سەرو پەیاو ۋێشاوە مردا و بژێویی ۋێشا پێڎا بکەرا گرنگا بەشداری بکەرا جە فیستیڤاڵێوە چی جۆرەنە. کەیف وەشەنا پانەی کە ئی ژەنا موینو چۍ کە هەرمانە مکەرمۍ پێوەرە."