• فەرمان کەریم "مەسعوود ئەرەن"‌‌ کە جە گەشمەرڎە خورسیی-نە گەشمەرڎە بی، جە وەرنیشتنە دژوو داعشی جەنگش کەرڎە بۍ. جە خواکورکۊ پڕابێوە بەرەو زاپ. پەروەرڎەو هێزی تایبەتیش دییەبۍ و پێسە گیانبازێوە یەرۍ مانگۍ وێگێرتەییش کەرد.

"فەرمان کەریم"  گەشمەرڎە خورسی-ینە کە قەڵاو مدرامانوو زاپی-ینە دماو یەرۍ مانگا مدرامانی، ٥وو تشرینوو دووەموو ٢٠٢٢ی چەنی ١٠ هەڤاڵە گەریلایاو وێش بە چەکی کیمیایی گەشمەرڎە بی. "فەرمان کەریم" شڕناخ-نە پەیدا بییەبۍ. جە عومروو گەنجیشنە هاگاداروو سیاسەتە چەپەڵەکاو دەوڵەتی تورکی بۍ سەروو گەنجاوە. حەر پا بۊنەوە جە ساڵەو ٢٠١٣ یاوا دلۍ ڕیزەکاو جمیەروو ئازاڎی.

گرد چێوۍ پەی کورڎستانین

بە دڵسۊزیی وێش بی بە نموونێوە پەی گردوو هامڕایا و هەڤاڵەکاش. وەراوەروو خیانەتیوە فرە تووڕە بۍ. ئامانجش کە بریتی بۍ چانەی کە بۊ بە گەریلێوە سەرەبەرز، جە ژیوای وێشنە یاواش پەنە و بڕواو وێش بە سەرکەوتەی پی کەلیما بەر وزێ: "جە ئەوەڵوو درووسبییەی گەردوونیوە تا ئیساتۍ ئێمە شکۊمەندانە مدرامان کەرمۍ. تارێخ، کولتوور و ڕاسیی ئێمە، میراتوو گردوو گەلاو دنیێن. جەنگ و مدرامان و ئاویروو ئێمە گەشنۊوە، بۊ بە گڕکان. با دەنگوو من بیاوۊ ئاڎیشا، یاوۊ بکوشا! گرد چێوۍ پەی سۊسیالیزمین، گرد چێوۍ پەی کورڎستانین".

وەراوەروو داعشیوە جەنگشا کەرد

"فەرمان کەریم" حەرگیز کۊکوشییش سەروو گەلوو کوردیوە قبووڵ نەکەرد و بە بەشداربییەی وێش جە شۊڕشوو وەرنیشتینە دژوو داعشی گژیا. دماتەر گێڵاوە کەشەکا، وەروو ئانەی ئامانجوو کۊشای پەی ژیوایۍ ئازاڎی و دماییئارڎەی بە کۊلۊنیالیزمیش کورڎستاننە بە بنەما گێرتەبۍ.

ئەوەڵ خواکورک، دماتەر زاپ

فەرمان کە بەقووڵی ورد بییۊ، جە ساڵەو ٢٠١٧ بەشدارییش هێزە تایبەتەکانە کەرد. هەوڵۍ دۍ پێسە فەرماندێوە وەڵێکەوتەی دەوروو وێش جە شۊڕشوو کورڎستانینە گیانبازانە یاونۊ یاگۍ. "فەرمان" سەروو بنەماو چەنییەتیی جەنگوو سەرڎەمی تازەی بەشداری چا هەڵمەتانە کەرۍ، کە دژوو هجووموو ئەرەگیرکارییەکا دەوڵەتوو تورکی دەسش پەنە کریا بۍ. ئەوەڵ خواکورک-نە و دماتەریچ هەڵمەتەو هەڵۊکاو زاگرۊسینە بەشدارییش جە یەکینە گێڵیەرەکانە کەرڎەبۍ. تا گەشمەرڎەبییەیش جە سەنگەرەکاو وەڵێوە دەوری کاراش گێڵنا. "فەرمان کەریم" کە نامۍ وێش جە تاریخوو کورڎستانینە نویستۊ، جە ٥و تشرینوو دووەموو ٢٠٢٢ێنە بە هجوومی کیمیاوی چەنی ١٠ هەڤاڵاو وێش تونێلەکاو گەشمەرڎە خورسی-ینە سەر بە هەرێموو ساجای زاپی-نە گەشمەرڎە بی.

س.ز