ڕابەروو گەلوو کورڎی "عەبدوڵڵا ئۊجەلان" جە ١٥ی شوباتوو ١٩٩٩ بە هامکاریی ژمارەێو فرە جە هێزە میاننەتەوەیی و هەرێمییەکا، کینیاوە ڕادەسوو دەوڵەتی تورکی ئەرەگیری کریا و دیل کریا، پیلانگێڵنای میاننەتەوەیی ١٥و شوباتی کە جە کەسایەتیی "عەبدوڵڵا ئۊجالەن"ینە دژوو گەلوو کورڎی کریا، جە ساڵیاڎوو ٢٤ەمین ساڵڕۊو ئا ڕوە سیاوەینە، هاموەڵاتاو شاروو کەرکووکوو پانیشتوو کورڎسانی، جە ڕاو ئاژانسوو هەواڵوو فوراتیوە، داواو ئازاڎیی ڕابەروو گەلوو کورڎی "ڕابەر ئۊجەلان"ی کەرا و ئا پیلانە میاننەتەوەییۍ ئیدانە و شەرمەزار کەرا.

ئێمە پێسە ژەنان داواو ئازاڎیی ڕابەر ئۊجەلانی کەرمێ

خەیرییە حەسەنە، ژنێوە شاروو کەرکووکینە و چالاکێوە بواروو ژەنانە شارەکەنە، سەبارەت پیلانگێڵنای ١٥و شوباتی واتش: "پێسە ژەناو  شاروو کەرکووکی پیلانگێڵنای ١٥و شوباتی ئیدانە و شەرمەزار کەرمێ، کە ماوەو ٢٤ ساڵان "ڕابەر ئۊجەلان" بۊنەو ئا پیلانگێڵییە میاندەوڵەتینە ئینا زینڎانداننە، ئێمە-ژەناو کەرکووکی داواو ئازاڎیی ڕابەر ئۊجەلانی کەرمێ، ئا گۊشەگیرییە نائینسانانە کە دەوڵەتوو فاشستوو تورکی دوور  جە گرڎ بەهاکاو مافوو ئینسانی "ڕابەر ئاپۊ"ش وستەننە، ئیدانە و شەرمەزار کەرمێ.

ئازاڎیی "ڕابەر ئاپۊ"ی ئازاڎیی ژەنان

حەرپاسە خەیرییە حەسەنە درێژەو قسەکاشنە  جەختش کەردۊ جە ئازاڎکەردەی "ڕابەر ئۊجەلان"ی و واتش:  "ئێمە پێسە ژەناو شاروو کەرکووکوو باشووروو کورڎستانی داواو ئازاڎیی ڕابەر "عەبدوڵڵا ئۊجەلان"ی کەرمۍ چوونکە ئازاڎیی ڕابەر "ئاپۊ"ی ئازاڎیی ژەنان، پێویسا ڕێکوزیۍ و ناوەندە میاندەوڵەتییەکۍ ئیتر بێدەنگۍ نەبا و وەراوەروو ئا ستەمی جە "ڕابەر ئۊجەلان"ی کریۊ و بە پاو یاسۍ میاندەوڵەتیۍ پێویسا "ڕابەر ئۊجەلان" ئازاڎ کریۊ، بەتایبەتی کە عومرش یاون حەددێوە کە بە پاو یاساو میاندەوڵەتی مەبۊ زینڎاننە بۊ.

دوژمناو گەلوو کورڎی چەمێشا بە ئازاڎی ور نمەیا

گۊران محەمەد هاموەڵاتێوە شاروو کەرکووکین، سەبارەت بە پلانگێڵیی ١٥و شوباتی واتش: "من پێسە هاموەڵاتێوە شاروو کەرکووکی ئا پیلانۍ شەرمەزار کەروو، کە دژوو بەڕێز "ئۊجەلان" گێڵیێنە، بەڕێز "ئۊجەلان" ورگێروو فەلسەفەو ژیواین، وەلێم دوژمناو گەلوو کورڎی چەمێشا بە ئازاڎی ور نمەیا، ئینە پاسەش کەردەن دوژمناو کورڎی ماوەو ٢٤ ساڵان بەرێز "ئۊجەلان"شا زینڎانی کەردەن، منیچ پێسە تاکێوە کورڎی زینڎانی و گۊشەگیری سەروو ڕابەر ئۊجەلانی ئیدانە کەروو، و داواکاریچنا کە زووتەرین وەختنە ئازاڎ کریۊ.

بەڕێز ئۊجەلان پەی ئازاڎیی گرڎوو نەتەوەکا کۊشیان

حەرپاسە سەبارەت بە گرنگیی ئازاڎیی "ڕابەر ئۊجەلان" واتش: "بەرێز ئۊجەلان چارەسەروو کێشە و قەیرانەکاو مەنتێقەکەی بییەن، متاومۍ واچمۍ کرێڵوو کەردەیۊ پەرسەی ڕەواو کورڎی و گەلاو مەنتێقەکەی بییەن، بەڕێز ئۊجەلان چونکووم وێش کەسێوە ئازاڎیوازا پەی ئازاڎیی گرڎ تاکێوە کۊشیان و بۍ جیاوازی بەینوو نەتەوەکانە.

پەیاموو "ڕابەر ئۊجەلان"ی گرڎوو دنیێرە وەڵا بییەنۊ

سەربارەت بە ئازاڎیی ژەنا جە ویر و مەنەیرەی "ڕابەر ئۊجەلان"ینە "گۊران محەمەد" واتش: "یۊتەر جە تێزەکاو بەرێز "ئۊجەلان"ی ئازاڎیی ژەنێن، کە جە ئیسەنە شۊڕشوو (ژەن، ژیوای، ئازاڎی)، بەتەمامی مەنتێقەکەنە وەڵا بییەنۊ، کە ئینەیچ بەشێن جە کۊشیای بەڕێز ئۊجەلانی، کە پەیاموو ژەنی، ژیوای، ئازاڎی.. پەیاموو ڕابەر ئۊجەلانین، کە تا ژەنی ئازاڎە نەبۊ، گلێرگەیچ ئازاڎ مەبۊ.

بەڕێز ئۊجەلان، کە نوێنەرایەتیی گەلێوە کەرۊ، مەبۊ زینڎاننە بۊ

حەرپاسە نامەبریا واتیچش: "بەداخۊ وڵاتاو مەنتێقەکەی چەمێشا بەئازاڎی گەلوو کورڎی ور نمەیا و بەرژەوەندیی ولاتا پاسەش کەردەن، کە پەرسەی ڕەواو کورڎی کەرا قوربانەو بەرژەوەندییەکاشا، پەوکای داوا جە نەتەوە یۊگێرتەکا کەرمێ، کە هەوڵۍ ئازاڎکەردەی بەرێز ئۊجەلانی بدا، چونکوم ئینسانۍ کە نوێنەرایەتیی گەلێوە کەرۊ پا عومرە گەورەوە مەکریۊ زینڎاننە بۊ.

بەڕێز ئۊجەلان پەیاموو ئاشتی و پێوەرەژیوایش پەنەن

جە دمادمایینە سەربارەت بە گۊشەگیری سەروو "ڕابەر ئۊجەلان"ی ئا هاموەڵاتەو شاروو کەرکووکی واتش: "دەوڵەتوو فاشستوو تورکی سەرەمڕ هەوڵۍ سڕیەیۊ ناسنامەو گەلوو کورڎی مدۊ و ئیسەیچنە بە سەپنای گۊشەگیری سەروو بەڕێز "ئۊجەلان"یرە دەوڵەتوو تورکیای هەوڵۍ مدۊ گەلوو کورڎی جە ڕابەرەکەیش بڕۊرە، پێویسا گلێرگەی  میاندەوڵەتی بۍ سەروو خەتۍ و حدوودێوە پەی پاشێلکارییەکاو دەوڵەتوو تورکی بنیۊرە، داواکارێنمۍ زووتەرین وەختنە "ڕابەر ئۊجەلان" ئازاڎ کریۊ  چونکووم تەرسیش سەروو حیچ لایەنێوە نییەنە بەڵکوم ورگێروو فەلسەفەو ژیواین و پەیاموو ئاشتی و پێوەژیوایش پەنەن پەی ئینسانیەتی. ".

س.ز