پلاتفۆرمو هۆرام-ی بە بۆنەو ڕۊو جەھانیی زۋانی ئەڎایی و ٨ هەمین ساڵیادو ئەڕەمەڕزنایرەی پلاتفۆرمەکەی ئەرەیاۋنایێۋەش ۋەڵاو کەرڎۋە و جە میاشەنە ئاماژەش بە مەترسییەکاو سەرو زۋانی هۆرامی کەردەن. پلاتفۆرمەکە ستاییشو ئاخێز و سەرهۆردای ژەنی ژیوای ئازادیش کەردەن و ئەرەیاونانش: سەرکەوتەی ئاخێزەکەی مافە زۋانیێ، فەرەنگیێ و ئینسانییەکا مسۆگەرێ ببانێ.
پلاتفۆرموو هۆرام-ی ئاشکراش کەردەن: زوان پێسەنە گیاندارێ کە ئەگەر خزمەت نەکریۆ، بمرۆنە.

تەمامی ئەرەیاۋناکەی...

خەڵکو وەشەویسو هۆرامانی، جە ئاژێوەنە یادو ڕۊو جەھانیی زۋانی ئەڎایی ( ٢١-٢ ) و ٨ هەمین ساڵڕۊ ئەڕەمەڕزنایرەو پلاتفۆرموو هۆرام-ی کەرمێوە کە ئاخێزو ژەنی ژیوای ئازادی بیەن بە هیوایە پەی یاوای بە ئازادی. ئاخێزێ کە سەرکەوتەیش زامنو پارێزناو بەها ئینسانیی و سرووشتیەکاو نەتەوەکەیمانە.
زۋانیچ پێسەو یۆ جە بەشە گرنگەکاو ئەژناسای هەر میللەتێ، بەشێن جە خەزێنەو فەرهەنگ ئینسانیەتیی بە گردی. زوان پێسەو گیاندارێن کە ئەگەر خزمەت نەکریۆ ، بمرۆنە و جە بەین مشۆنە. ئاڕۊ ئەرەگێرێ ئاو و خاکی و هەر پاسە دەسەڵاتدارە ملهۆڕەکێ پەی مەنەیۆ وێشا بە گرد شێوازێ دەسشا دان فۆتنای و ئەوەتاونایۆ زوان و فەرهەنگ و میللەتە چێر دەسەکا .

ئێمەیچ پێسەو هۆرامی و بەشێ جە نەتەوەو کوردی کە ساحێبو زوان ، فەرهەنگ و شانسی تایبەت بە وێمانمێ و زوانەکەیچما بە هۆکارو  سیستمە نادموکراتیکەکاو هەرێمەکەیەوە ڕووە دلێنەشیەیەن. جە ئاژەو ئارۊ ئێرانیەنە وینمێ کە ئاخێزو ژەنی ژیوای ئازادی چنڎە یاگێ هیوا و ئۆمێدینە پەی یاوای بە مافە ئینسانی و سرووشتیەکاما. جە ئەگەرو سەرنەکەوتەیشەنە دوێ ئانڎەی تەر تەرسە سەرو جە بەینشیەو زوان، فەرهەنگو شناسەکەیما دروس کەرۆنە. چوونکی ئەگە بەیۆنە دەسەڵات سەربگنۆ بە خراپتەر جە جارانی دەس مڎۆ سەرکوتکەردەی و وەرگیریکەردەی جە گرد چالاکیە مەدەنی و فەرهەنگی.

پەوچی یاگێ وێشەنە کە خەڵکەکەما بە ویری کریاوە و ژیرانە پەی سەر وستەو ئاخێزو (ژەنی ، ژیوای ، ئازادی) هەر هەنگامێش پەنە منریۆ، درێخی نەکەرۆ. ئاخێزێ کە پاسەش کەردەن کە ژەنی جە وەرانوەرو پیاسالاری، نایەکسانی و بنەبییەی ئازادی و جە وەرانوەرو چێردەسەیی وێشا ڕێکوزا. جە گەرماوگەرمو ئاژەو ئارۆینە وینمێ کە کەسانێ و لایەنێ هەێ کە پەی یاوای بە دەسەڵاتی گەرەکشانە زەحمەتو ڕەنجو فیپسگای مجارە کیسەو دەسەڵاتدارا. سەرو ئا ئەساسەیە، ئێمە پێسەو پلاتفۆرمو هۆرام-ی جە ڕۊێ پێسەو زۋانی ئەڎاییـەنە سەڕەڕاو موبارەکبایی کەردەو ئی ڕۊەیە، ٨ هەمین ساڵڕۊ ئەرەمەرزنایرەی پڵاتفۆڕمەکەیما رموو هۆرام-ی پیرۆز کەمێنە.

هەر پاسە سەڕەڕاو ڕەخنە گێرتەی جە کەمکاریەکاو وێما، تا یاوای بە مافە ئینسانیێ و سروشتیەکاما پەی یاوای بە فیپسگایە ئازاد و دیموکراتیکی جە وەرانوەرو سیستمە ملهۆر و دیکتاتورەکا کە ئەساسشا سەروو یەک زوان، یەک پەرچەم، یەک دین و یەک ڕەنگیا مدرمێوە. پەوچی گرد جارێ ماچمێ ژیوای مدرامانا و مدرامان ژیوایا.

دەسەو ڕاوەبەریی پلاتفۆرمو هۆرام-ی