فێستیڤاڵو مېیاننەتەوەیی کلتوری کوردی گرد ساڵێ جە لایەنو کوردەسانیاوە ئەنجام مڎریۆنە، ٣٢ەمین فێستیڤاڵو ئێساڵیچ جە ٢١و ئەیلولینە بە درووشمەو "ئەرەگیری و گۆشەگیری ماڕمێ، ڕابەر ئاپۆی ئازاد مکەرمێ" بە بەشداری دەیان هەزار کەسا جە کوردسانیا دۆسەکاشا جە شارو فرانکفۆرتو ئەڵمانیاینە ئەنجامدریا. گرڎو بەشدارا فیسیتڤاڵەکەی بە جۆشێوە فرۆ جە پەیامەکاشانە سڵامشا جە مدرامانو گەریلای جە دژو ئەرەگیرا کەرد و بانگەوازو ئەرەکۆشایشا پەی ئازادی جەسەیی ڕابەرو گەلو کوردی عەبدوڵا ئۆجالانی کەرد. هەردووە هونەرمەندێ شەهریبانا کوردیە و فەرزاد مورادی جە گرووپو ڕەستاکی کە بەشدارۍ فیستیڤاڵەکەی بێنێ  پی جۆرە پەیامو وێشا دەربارەو فیستیڤاڵەکەی بەربڕی.

هونەرمەندە شەهریبانا کوردیە سەرەتاو قسەکاش بە موبارەکبایی فێستیڤاڵەکەی دەسپنە کەردۍ و واتش: "هیواڎارەنا بتاومێ چی فیستیڤاڵەنە یۆبیەو وێما پێکبارمێ، موینمێ جە گرد یاگێنە سیاسەتو قڕکەردەی سەرو کلتوری کوردی ئەنجام مڎریۆ، گردو ئا سیاسەتا شەرمەزار مکەرو. پێسەو هونەرمەندێوە کە عەیامێوەن دلێ کایەو هونەرینە هەرمانە مکەرو، تەنیا ئاواتم پێک ئاردەو یۆبیەی کوردان. ٣٢ ەمین فیستیڤاڵی کلتوری کوردی ئەنجام مڎریۆ و گرد کەسێوە بەشدار جە فیستیڤاڵەکەینە خاوەنداری جە کلتور و زوانی کوردی مکەرۆ. پەنەوازا شان بە شانو یۆترینی پەی یۆبیەو بیەو وێما ئەرەکۊشمۍ."

'جەنگو و پارچەبییەی خزمەتما نمەکەرۆ'

جە بەردەوامی قسەکاشەنە شەهریبانا کوردیە باسش جە جەنگو بیرۆکراسی کەرد و ئی پەیامشە دا: "ساڵانێوەن بیرۆکراسیما دلێنە وەش بیەن، پۆکەی ئینە یاگێ شەرمەزارییا. دووژمن ملو چوار پارچارە بەشێش کەردێنمێ. پۆکەی چی مشۆم ئێمەیچ دلێ وێمانە یۆگێرتۍ نەبیمۍ! گەلەنمێ و خاوەنوکلتور و زوانو وێمانێ، پۆکەی هیوڎارەنا ئی قسێمە بیاوا بە گردو سەرۆکەکاما، ئیتر وەسێن، جەنگو و پارچەبیەی هیچ خزمەتێما نمەکەرۆ. پەیامم پەی گلێرکەی ئانەن پەشتگیرۍ سەرۆکی و ڕێکوستەی وێشا بانە. بژیۋۆ یۆبیەی گەلا، بژیۋۆ ئازادی و گەلوو کوردی و کوردسانی."

'فیستیڤاڵ کلتوریە کوردییەکا جە یۆترینی نزیکۍ مکەرۆوە'

فەرزاد مورادی جە گرووپو هونەری رەستاکی وەشحاڵی وێش جە بەشداربیەی فێستیڤاڵەکەینە بەربڕی و واتش: "بەڕاسی پێشوازیێوە نمونەیی جە فیستیڤاڵەکەی کریا، یاگێ فەخرینە کە دەورو یۆینە گلێرێ بییەیمێ، هیواڎارەنا فێستیڤاڵی پی جۆرە بەردەوام بۆ پەی جە یۆ نزیک بیەیۆ کلتورە کوردییەکا، هونەر بۆنە بە مەڵامەتۍ پەی ئانەی بتاومێ گەل زیاتەر جە یۆی نزیک بۆوە. هەر پۆکەی فێستیڤاڵ پەی کلتورە کوردییەکا سردێوەنە."

*فێستیڤاڵو مېیاننەتەوەیی کوردی پەی ئەوەڵجاری جە  ساحەو بۆخۆمی روهەری ئەڵمانیاینە جە ساڵەو ١٩٩٢ ئەنجامدریا. چا کاتۆ گرڎ ساڵێ ئەنجام مڎریۆ، تەنیا ساڵەو ٢٠٢٠ نەبۆ کە مەڵامەتوو کۆرۆنایۆ ئەنجام نەڎریا.