جە سنە و پاوە بە بەشداری ژەنێ هۆرامانی زاگــرۆسانە بریاڕاوە
جە شارەکێ سنەی و پاوەی، پڕۆژەو زاگرۆسانەی کە وێش جە نەما نیایەنە مەوێنۆنەوا، بریاڕاوە و هەزاران نەمامێ نریێ.
جە بەردەوامی پڕۆژو زاگرۆسانەی کە وێش جە نەما نیای جە کەش و کۆکێ کوردستان، لوڕستان و هەورامانی و پارێزنای و سەرسەوزکەردەی ژیوگەی مەوینۆنەوە، بە بەشداری چەنڎین ڕێکوزیێ مەدەنیێ و ژیوگەدۆسێ و هەرپاسە یانەو ژەناو هەورامانی، بریاڕاوە.
جە ئی چوارچوەنە، ئارۆ ٣ شەممە، جە سنە بە دروشمەو "چنی باڵاو زاگرۆسی زەریفا"، ڕێکوزیاو یانەو ژەناو هەورامانی لقو سنەی و چەنڎین ژیوگەدوسێ شارەکەی، بەرنامەو زاگرۆسانەی لواڕاوە و هەزاران نەمامێ و بەلوێ جە کەشو ئاویەری نریێ.
ڕێکوزێ بەرنامەکەی ئاشکراشان کەرد: "قەرار بێ ئی بەرنامە چنی گردوو ڕێکوزیاکێ شاروو سنەی جە یەک ڕۆونە بلۆنە ڕاوە بەڵام بە داخەوە بە هۆکارو نەوەشی کۆرۆنای و بەیاگێ ئاردەی ئەرکی بێهداشتیێ، نەکریا و هەر کام جە ڕێکوزیاکان بە جیا زاگرۆسانەشان بەردڕاوە.
جەلاێ تەرەوە هەر ئارۆ ٣ شەممە، ڕێکوزیاو یانەو ژەناو هەورامانی لقو پاوەی، بەشداریش کەرد جە هەڵمەتو ژیوگەپارێزی "زاگرۆسانە"ی کە ژمارێوی تەرێ ڕێکوزیێ مەدەنیێ و ژیوگەپارێزێ شارەکەی ئامادێش بیێ کە پێکئامێێ بێنێ جە "بنکەو ژیوای، قەڵەمو هامچەرخو کوردی، شاخەوانی پاوەی".
سەرجەم ڕێکوزیاکێ و چەنڎین ژیوگەپارێزێ تەرێ پێوەرە دارستانو ڕاگای جە هامنە هەوارو ویمیری بە بەلوێ نریا.
جە سەروەختو بەلو نیایەکەیەنە، ئەختەر ڕەزایی، ئەندامەی کاراو لقو پاوەو ژەناو هەورامانی جە پەیامێوی کورتەنە ڕوو بە بەشداربییەکان، سپاسگوزاری وێش و یانەو ژەناو هەورامانیش پەی بەشداربییەکان نیشانەدا و تەئکیدش کەرد سەرو ئانەی کە پارێزنای و ئەوەژیونای کەشو کۆ و دارستانەکێ هەورامانی ئەرکی نیشتمانییەن و ڕێزمان هەن پەی هەر هەوڵێوی کە جە ئی بارەوە مدریۆنە و ئێمەیچ پەشتیوانێشەنمێ.
