جە ۋەرکەوتوو کورڎسانېەنە کۊڵبەرێۋە گېانش جە دەسداو کۊڵبەرێۋە تەریچ زامڎار بی
بە مەڵامەتو تەقەو ڕاسەوخۊو ھێزەکا سەر بە دۊڵەتوو ئێرانی و، حەرپاسە ڕوۋەداو ئاماو لۋای ترۊمبێلیۊ، دوۋۍ کۊڵبەرۍ تەر جە ۋەرکەوتوو کورڎسانی گېانشا جە دەسدا.
بە مەڵامەتو تەقەو ڕاسەوخۊو ھێزەکا سەر بە دۊڵەتوو ئێرانی و، حەرپاسە ڕوۋەداو ئاماو لۋای ترۊمبێلیۊ، جە مەنتېقە مەرزیەکاو ۋەرکەوتوو کورڎسانی، چی ڕوۋە ۋیەرڎانە ڕوۋەش جە زیاڎ بېەی کەرڎەن و تەنیا جە ماۋەو حەفتێۋەنە، بە مەڵامەتوو ڕوۋەداو ئاماو لۋای ترۊمبێلیۊ سەرو ڕاو دەگاو شوانکارەو سەربە شارۊچکڵەو ڕەوانسەری، ١١ کۊڵبەرۍ گېانشا جە دەسداو زامڎارۍ بیۍ.
دماو ئانەی ڕۊو ٢٦و ئی مانگۍ، بە مەڵامەتوو ڕوۋەداو ئاماو لۋای ترۊمبێلیۊ جە مەنتېقەو'' شوانکارە''و سەربە شارۊچکڵەو ڕەوانسەری، ٦ کۊڵبەرۍ زامڎارۍ بیۍ، ھێزی یۊ چا کۊڵبەرا بەنامۍ" مێرساد دەروێشی" عومر ١٩ ساڵ و خەڵکو مەنتېقەو سەلاس و باوەجانی، بە مەڵامەتو قورسی زامەکەیشۊ جە نەۋەشخانەو تاڵەقانی کرماشانی، گېانش جە دەسدا.
جە لایۍ تەرۊ، ھێزی، کۊڵبەرێۋە عومر ٢٥ ساڵ بەنامۍ "فەردین ڕۊسەم نەژاد" جە ئاکامو تەقەو ڕاسەوخۊو ھێزەکاو سەر بە ئێرانېۊ، جە مەنتېقە و مەرزو کلەبەرد و سەر بە نەوسوڎی زامڎار بی و دماتەر پۍ ھۊرگێرتەو چارەسەری ڕەۋانەو نەۋەشخانەو قودس و پاۋەی کریا.
بەپاو ئامارێۋی ماڵپەڕو کۊڵبەر نېوزی، جە ماۋەو ساڵەو ٢٠٢٢ێنە، بە گرڎی ٢٥٨ کۊڵبەرۍ جە مەنتېقە مەرزیەکاو کورڎسانیەنە کوشیێنۍ و زامڎارۍ بیێنۍ، کە چا ژمارەیە ٤٣ کۊڵبەرۍ کوشیێنۍ و ٢١٥ کۊڵبەرێچ زامڎارۍ بیێنۍ.
حەر بەپاو ئامارەکۍ، ١٨٩ کۊڵبەرۍ بە تەقەو ڕاسەوخۊو ھێزەکا سەر بە دۊڵەتوو ئێرانې پێکیێنۍ.
ھ.ش
