جولەمێرگەنە دما و ئانەی ناکۆکی بەینوو دەگانشینا و نوێنەرێ کۆمپانیاو عیسمەتی ئۆلمەز ئەندامو ئاکەپەی ڕووەشدا سەر و پنەنەرای کرێی هەرمانەکاشا، سەروازەکێ هورشاکوا سەرو دەگێکێ و حەوت هامووڵاتییشا باڵبەسێ کەردێ، کەسێوەش زینانی کریا.
ڕووەداکەی ڕۆو شەممەی ٥و تەممووزی ڕووەشدا کە بەشێ جە هامووڵاتیا دەگاکا ئاشوتی و چەمکاو ناوچەو چەلێ پەی هورگێرتە و زەڕەکاشا لوێنی کۆمپانیاو کانگاکانی عیسمەتی ئۆلمەز ئەندامی ئاکەپەی.
کۆمپانیاکە بە هامووڵاتیەکاش واتەن زەڕشا مەرۆ پنە. دماتەر هامووڵاتییەکێ ملانە مییانو شارو جولەمێرگی و دلێ هامووڵاتیا و برازی ئۆڵمەز ئەندامو ئاکەپەی ڕەحمی ئۆلمەز مشتومڕێوە ڕووەشدا. بانگەشەو ئانەی کریا چی مشتومڕەنە ڕەحمی ئۆلمەز دریانش وەنە.
دما و ئی مشتومڕەی سەروازەکێ هورکوا سەر و هەردووی دەگێ و حەوت کەسێ باڵبەس مکەرا. هەپاسە هامووڵاتیێش بە نامێ ن.ی. بە تۆمەتو "یارمەتیدای تاوانباری" زینانی کریا و ٦ هامووڵاتیێ تەرێچ ئینێ چێرو چەمدێرینە.
هەرپاسە ئانەیش زانیان داواکارو گرڏی بە شێوێ زارەکی قەراو باڵبەسکەردەی بە تیمەکا پۆلیسی ئەرەیاونان و پێشبینی کریۆ ئارۆ ئیفادەو هامووڵاتیاشا هورگێرۆ.
