هرووژمە ئەرەگیریەکۍ دۆڵەتو تورکی بە هامکاری خیانەتەکا پەدەکەی سەرو خاکو کوردەسانی بەردەواما. ئی هرووژمۍ دماو ئیمزاکەرڎەی 'ڕێککەوتنامەی ئەمنی'ی ١٥و ئابی جە مابەینو بەغڎای و ئەنقەرەینە زیاتەرۍ بیێنۍ. بە پاو داتاو بڕۍ جە ئەرەمەرزیاکا مافو مرۆڤی جە سەرەتاو ساڵێوە تا مانگەو حوزەیرانی دۆڵەتو تورکی زیاتەر جە ٨٣٣ کەڕەتا بۆمبۋارانو خاکو پانیشتوو کورڎەسانیش کەرڎەن. جە دەرەنجامو ئا هرووژمانە زیاتەر جە ٥٠٠ دەگایا چۆڵکریێنۍ و بەدەیان هاموڵاتیۍ کوشیێنۍ و هرووژمەکۍ سەرو کەسایەتییە وڵاتپارێزنو، ڕۆشنۋیر، سیاسەتمەدار، چالاکا و ڕۆنامەوانا ئەرەیاۋنای ئازاڎی بەردەواما. جە دما هرووژمیچەنە پەی سەرو ئەرەیاۋنای ئازاڎیی ، دۆڵەتو تورکی ئەرەگیر جە ٢٣ۍ ئابو ٢٠٢٤ینە جە قەزاو سەیسایەقینە جە ڕاو فرۆکەی بێفڕۆکانیوە بۍ پەی سەرو ترۆمبێلۍ ڕۆنامەوانا، کە بی بە مەڵامەتوو گەشمەرڎە بیەو هەردووە ژەنە ڕۆنامەوانا گوڵستان تارا و هێرۆ بەهادینی. ئی هرووژمۍ بیێنۍ بە مەڵامەتوو کاروەدای کورد زۋانا، چا بارۆ زەینەب مورادە هامسەرۆکەو کۆنگرەو نەتەوەیی کورڎەسانی (کەنەکە)ی دەربارەو ڕووەدایەکا سەرو پانیشتوو کورڎەسانی پەی ئاژانسیما قسێش کەردۍ.

جە سەرەتاو قسەکاشەنە زەینەب مورادە هامسەرۆکەو کۆنگرەو نەتەوەیی کورڎەسانی (کەنەکە)ی باسش جە هەستیاری ئی قۆناغۍ هرووژمەکا سەرو خاکو کورڎەسانی کەرد و واتش: "دژمنا کوردی جە گرڎ ڕوانگێوە هرووژم مکەرا سەرو بەها کولتورییەکا گەلوو کوردی، بە سیستەمو ئەشکەنجەو ئیمراڵی جە کەسایەتی ڕابەر ئاپۆینە و بە هرووژشم و سەرو کەشە ئازاڎەکا کورڎەسانی گەرەکشا ئیراڎەو گەلوو کوردی بماڕۆ. دژمنا گەلوو کوردی تواناو قبوڵکەردەی ئانەیشا نیا کە جوانێوە کورد بە کولتور و شوناسی کوردیۆ بەرگنۆ، بەڵام ئینە جە زهنیەتو دۆڵەتو تورکینە زیاتەر رەنگش دانۆ، ئاڎیچ پەی درێژ کەردەیۆ تەمەنی فاشیستیانەو ۋێشا. گرڎ جۆرە هرووژمێوە بە یاردەی ناتۆی ڕاوەبەر مکەرۆ بەڵام نمەتاوۆ ئەنجامۍ گێرۆ، چی؟ چونکی گەلوو کوردی خاوەن ئیراڎەن، خاوەنو تاریخو ئەرەکۊشایا و جە کەسایەتی مڎرامانوو ئیمراڵینە درێژە پا ئیراڎەو ۋێش مڎۆ کە جە لایەنو ڕابەر عەبدوڵا ئۆجالانیوەن. هەرپۊکەی ماڕای ئیراڎەو کوردی هیچ نیا بێجگە جە خیاڵێوە پوچی."

'پەیامو گەلوو کوردی ڕۆشنا؛ ئازاڎیی پەی ئۆجالانی، ئازاڎیی کورڎەسانیا'

جە بەردەوامینە زەینەب مورادە باسش چانەیە کەرڎ کە جە فێستیڤاڵی تاریخی فرانکفۆرتینە کورد پەیامێوە قەوەتش دا و پی جۆرە بەردەوام بۍ جە قسەکاش: "موینمۍ جە هەر چوار لاو کورڎەسانیوە کوردۍ هاوار مکەرا؛ 'ئازادی پەی ئۆجالانی، ئازادیی کورڎەسانیا' ئی پەیامە جە لایەنو دۆسا کوردیچۆ بۍ، پۊکەی گرڎو هیواکا سەرو ئازادی عەبدوڵا ئۆجالانی هۆرچنیێنۍ. چونکی مزانا ئازادی عەبدوڵا ئۆجالانی، چارەسەرو پەرسەکا کوردین، وە چارەسەریین پەی ۋەرکۆتوو مېیامینی و جەهانیچ. پەیامو ئێمە پېسە کەنەکەی ئانەنە گرڎو گەلەکەیما و ڕێکوستە سیاسیەکا بە ئەرکی نەتەوەیی ۋێشا هۊربێزا و یۆبیەی نەتەوەیی بارانە ئاراوە  و ئی قۆناغە هەستیارۍ ۋییەرنمۍ. شەرمازارییا خاکو کورڎەسانی ئەرەگیر بکریۆ و هیچ هەڵوێسۍ نەبۆ."

"ئینەی ڕووە مڎۆ مەترسیێوە فرە گۆرەن سەرو خاکو پانیشتوو کورڎەسانی"

جە دما دمایی قسەکاشەنە زەینەب مورادە سەرنجش وست سەرو هرووژمەکا دۆڵەتو تورکی فاشیستی سەرو کەسایەتیە وڵاتپارێز، ڕۆشنۋیر، سیاسەتمەدار، چالاکا و ڕۆنامەوانا ئەرەیاۋنای ئازاڎی و پی جۆرە دمایش بە قسەکاش ئاورڎ: "غیرەتو دۆڵەتو تورکی جە کوشتەی کوردانە سەرو خاکو پانیشتوو کورڎەسانیۆ گێڵۆوە پەی بێدەنگی و بێ هەڵوێسی گرڎ لێوە. ئی زنجیرە تاوانکارییۍ دۆڵەتو تورکی بەردەوامێنۍ، چی دماییانە هەردووە ژەنە ڕۆنامەوانۍ ئەرەیاۋنای ئازادی گوڵستان تارا و هێرۆ بەهادینەش تیرۆرۍ کەرڎۍ. ئەندامو کەنەکەی گەشمەرڎە دەنیز جەودەت هەولێرەنە جە لایەنو میتیوە تیرۆرکریا، کە تەنیا ئاواتش ئانەبۍ کە یۆبیەی نەتەوەیی وەش بۆ. بەڕاسی کارەساتێوە گۆرەن ڕۆڵەکۍ کوردی سەرو خاکو ۋێشاوە تیرۆرۍ بکریا. هەرچڼە هەڵوێس هەن بەڵام پېسە پەنەوازی نیا، پەنەوازا بە ڕۆحێوە گرڎینۆ دژوو ئی هرووژما مردمێوە ڕا نەڎەیمۍ جارێوەتەر ڕۆڵێوە کورد کوشیۆنە. چێیچەنە ۋەرپەرسی هەرە گۆرە گنۆ ئەستۆو حکومەتوو هەرێمو کورڎەسانی، سەرەڕاو گرڎو پاشێلکارییەکا دۆڵەتو تورکی بەڵام بە شێوێوە ڕسمی هیچ هەڵوێسێوە نیا. ئینەیچ یاگۍ شەرمەزاریینە و پاسە مکەرۆ کە غیرەتی زیاتەر بەخشۆ بە دۆڵەتو تورکی کە مەرامش دلێنەبەردەی گرڎو دەسکۊتەکا گەلوو کوردین بە سیستەمو فیدراڵی پانیشتوو کورڎەسانیچۆ. ئینەی ڕووە مڎۆ مەترسیێوە فرە گۆرەن سەرو خاکو پانیشتوو کورڎەسانی."