٢ی کانوونوو دووەمی جە ناحیەو تەل عوزێروو شەنگالینە جە ئەنجاموو هجوومێوە دەوڵەتوو تورکی و پەدەکەینە شۊڕشگێڵن و ڕۊشنویر مەنال مێردین گەشمەرڎە بی.

جەنازەو گەشمەرڎە مەنالی بە کارەوانێ وەردەموو خەسەخانەو گەشمەرڎاو خانەسووریوە بەرەو قەبرسانوو گەشمەرڎە دڵگەشەکاو بەرخۊدانی فاڕیاوە. جەنازەو گەشمەرڎە مەنالی بە ڕاوڕەسمێوە جە قەبرسانەکەنە بە خاکی ئسپاریا.

جە ڕاوڕەسمەکەنە بە دەیا کەسۍ لە پێکئامایەکاو شارەکەی بەشڎاریشا کەرد. حەرپاسە سەرۊک هۊزۍ، نوێنەراو رێکوستەیەکا و دەزگاکاو شەنگالی ئاماڎۍ بێنۍ.

ڕاوڕەسمەکە بە دەیەقۍ ڕێزگرتەی جەگەشمەرڎا دەسش پەنە کەرد و دماتەر پەیاموو بنەیانەو گەشمەرڎە مەنالی ونیاوە.

پەیامەکەنە سەرەوەشی جە گرڎوو گەلوو کورڎی و گلێرگەو ئێزدی کریا و ئاماژە پانەی کریا، " جە وەختوو گەشمەرڎەبییەی مەنالیوە گلێرگەو ئێزدی ئینا سەروو پایاوە. سپاسوو گرڎوو خەڵکوو شەنگالی کەرمۍ، کە پەی ئاشکراکەرڎەی ئی قۊمیایە گرد وەختۍ سەروو پایاوە بێنۍ.

سەروو نامۍ دەزگاو بنەیانەو گەشمەرڎە حەمەد بشار قسێش کەرڎۍ و واتش، " جە کەسایەتیی گەشمەرڎە مەنالی و گەشمەرڎا تەروو کۊکوشیی پاریسینە یاڎوو گرڎوو گەشمەرڎا کەرمێوە و جە وەراوەروو یاڎەوەرییشاوە سەرەما نامنمێرە. گەشمەرڎە مەنال چندین ساڵێن دلۍ ئی تەڤگەرینە پەی گرڎوو گەلاو کورڎستانی کۊشیۊ و بە گرد نۊعێوە خزمەتش کردەن. چی ئاخیرۊ دماو ٣ ئابوو ٢٠١٤ ڕووەش کەرڎە شەنگالی و پێسە مامۊسایۍ پەی گلێرگەکەیما هەرمانەش کەرڎە.

سەروو نامۍ تاژۍ  خۊخۍ جندی قسێش کەردڎۍ و واتش، " ئێمە پێسە بنەیانەو گەشمەرڎا بە  حەرگەشمەرڎێوە کە خزمەتوو ئی گەلی کەرۊ، ئازادۍ بیمۍ. وەلێ جە لایۍ تەرۊ وەشحاڵنا کە گەلەکەما مڵکڎاریی گەشمەرڎا کەرۊ. شەنگال یاگۍ کەسە وێورەشا نییەنە، یاگۍ ئا کەسانە کە وەعدشا نەماڕان. ئا کەسۍ کە خیانەتکارێنۍ و خیانەت جە ئاینوو وێشا کەرا جە ئێمە نییەنۍ، وەروو ئانەی جە ئاینمانە خیانەت نییا. هەڤاڵ مەنالیچ پەی ئێزیدییەکا هەرمانە کەرۍ، ڕۊڵەو یانەو ئێزدییەکان. چڕمۍ وەنەو گرڎوو گەلەکەیما کە دەس جە خیانەتی ور گێرا چوون خیانەت هەرمانەو ئێمە نییەنە.

حسێن سەعدون یاگەڎاروو هامسەرۊکایەتیی ئەنجوومەنوو وێڕاوەبەریی شەنگالی واتش، ئا گەشمەرڎێ ئەرکێوە گەورەشا بەیاگێ ئارد و واتش، " ئێمە پێسە ئێزدییەکا پێویسا بەرخۊدان کەرمۍ و نازمۍ ڕاو ئا گەشمەرڎا کۊرە بۊوە. بەتایبەتی گەشمەرڎە مەنال جە ئاستێوە زانایینە بۍ، کە زاناییش بە قسۍ تاریف مەکریۊ. ئێمەیچ پێسە خەڵکوو شەنگالی جە پراکتیکنە وێما بە ساعیبش مزانمۍ. شەنگالێوە وێڕاوەبەر و ئازاڎ بە ڕەنجوو گەشمەرڎەکاما درووس کەرمۍ و کەس مەتاوۊ چی ڕۍ دوورێما وزۊوە.

دماتەر ڕاوڕەسمەکە بە هەلهەلەدایوەنەو ئەڎایا دماییش ئاما.