کۆمیتەو ئیکۆلۆژیی و کۆنفیدرالیزموو گلېرگەو کوردسانی (کەجەکە) ئەرەیاۋناش، دلېنەبەردەی ۋەرافراوانوو ژیۋگەیی جەتەرەفوو حکومەتوو ئاکەپە-مەهەپەی، درێژەپنەدەرو اکاولکارییە فیزیکی و کولتوورییەینە کە سەرو گەلو کوردیرە سەپیان، کە بە مەڵامەتوو ستراتیجوو جەنگیوە زیاتەر پەرەش ئەسان. حەرپاسە ئەرەیاۋناش که پی عەقڵیەتەیە گەرەکشانە کوردسانی چۆڵ بکەرا و پێکئامای ئەرەنیشتەکەیش فاڕانە.

ساڵەو ١٩٧٢، ٥و حوزەیرانی پېسە ڕۊو جەهانی ژیۋگەی ئەرەیاۋییا. حەرچڼە ئی ڕووە بەمەڵامەتوو ئا گرنگییەی کە بە ئیکۆلۆژی دریان ئەرەیاۋییان و ماوەو ٥٢ ساڵی ۋییەردەی ئیکۆلۆژی فرەتەرین باسش چۊوە کریان، بەڵام فرەتەرین زەرەرش پنەیاوان. چنی زیاڎبیەی مەترسییەکا سەرو مرۆڤایەتی و ئیکۆلۆژی، تێکشیەی ژیۋگەیچ پەرەش ئەسان. جیای ئانەی دژ بە قەیرانەو ژیۋگەی هەنگامە بنیەیمۍ، دەرفەتی زیاتەر پەی کارەساتی ژیۋگەیی کریانۆ. ئا قەولۍ جە کۆنفرانسەکا کەشوهەواینە کە تا ئیساتۍ دریێنۍ، جابەجێ نەکریێنۍ. کۆمیتەو ئیکۆلۆژی کەجەکەی بۆنەو ڕۊو جەهانی ژیۋگەیۆ ئەرەیاۋنېوەش ۋەڵاکەردۆ و ئەرەیاۋناش، هێزە هەژموونوازەکۍ سەرمایەداری پا ڕاوجا ۋەر وەڵاوە دژە ئیکۆلۆژییەکاشا هەڕەشۍ جە ئایندەو ژیۋگەی مکەرا و ڕا پەی کارەساتی تازەی وەش مکەرا. حەرپاسە کەجەکە بە ئاماژەدای پانەی کە بەها مبارەکەکۍ ئیکۆسیستەمی و مرۆڤایەتی بە ڕاو تاڵانکەردەی بەردەوامی و ۋەر وەڵاویۆ دلېنە مشا پەی مەسڵەحەتوو کەمینېوە کە سەڎەنە یەک و ئەرەنیشتا جەهانی پێکمارا، حەرپاسە جەختش چانەی کەردۆ کە ۋییەرنای ژمارەی پێوانەیی پلەی گەرمی و کارەساتوو کەشوهەوای گرڎ ساڵێ سەبارەت بە ۋەرفراوانی و دەرئەنجامەکا ئی کاولکارییە ئاگاڎیی مڎا.

دلېنەبەردەی ژیۋگەی پېسە چەکێوە بەکارمۍ

کۆمیتەو ئیکۆلۆژی کەجەکەی بە ئاماژەدای پانەی کە دلېنەبەردەی ۋەرفراوانوو ئیکۆلۆژی جە تەرەفوو حکوومەتوو ئاکەپە-مەهەپەیۆ جە کوردسان و تورکیانە پېسە ئامرازێوە پەی سیاسەتی فاشیستی و میلیتاریستی جابەجێ مکریۆ، جەختش چانەی کەردۆ کە ئا کاولکاریە ئیکۆلۆژییەی کە کاریگەریش سەرو جوگرافیاو گرڎوو کوردسانی کەردەنۆ جە عەفرین تا بادینان، جە بۆتان تا سەرحەد و ۋەرکەوت ۋەر وەڵا بیەنۆ، جە چوارچێوەو درێژەدای بە کاولکاریی فیزیکی و کولتووریی کە سەروو گەلو کوردیرە سەپیان و کۆمكوژی کۆمەڵایەتی کە بە ستراتیجوو جەنگی پەرەش پنەدریان، جابەجێ مکریۆ. کۆمیتەو ئیکۆلۆژی کەجەکەی جە درێژەو ئەرەیاۋناکەیشەنە ماچۆ: "ئا دەگایۍ کوردسانی کە وەڵتەر سۆتۍ و چۆڵېکریۍ، ئارۆ چېروو ئاوەو بەحرەکانە نریۍ چاڵی". هەژاری، کۆچکەردەی و دوور وستەیۆ مرۆڤەکا جە دەگا و یانەو مەنزڵ و ۋێشا، دلېنەبەردەی دەرفەتەکاو ژیۋای بە ڕاو کۆمکوژی دارسانەکا و وەشکەردەی دەیان بەحرا، هۊرکەڼەی هەزاران کانا و وەشکەردەی وێستگەی کارەبایی و دلېنەبەردەی ژیۋگەی و سیاسەتی دژە کشتوکاڵی مسەپنۆ. گەرەکشانە بەهەشتوو کوردسانی کە گەلو کوردی، ۋەرا ۋەر بە گرڎ هجوومېوە مردێنێوە چۆڵ بکەرا و ئەرەنیشتەکاش فاڕا. ئی کاولکاریە کە چېروو نامونیشانوو ئارامینە هەوڵوو بەڕەوا بیەیش مڎریۆ، ئارۆ نەک هەر کوردسان و گەلو کوردی، بەڵکم بیەن بە هەڕەشۍ پەی گەلا مەنتیقەکەیچ بە جەنگ، وشکەساڵی و ئاسەوارەکاش. دەوڵەتوو تورکی پلانە کاولکارییەکاش دژ بە ژیۋگەی پېسە چەکێوە جە پیلانە ئەرەگیریە فاشیستیەکاش بەکارمارۆ.

ئیدامەش هەن.........