بە دەس ۋەڵێوستەو کۊلەکتېڤو " ژەنۍ ژېای ئازاڎی " پۍ جاری دووەمی جە لەندەن و پاېتەخت و بەرېتانېای ۋێنېشانداېۍ پۍ پەشتېوانی جە ئاخێزو " ژەنۍ ژېای ئازاڎی " لوا ڕاۋە .
دما نېمەڕۊو ھێزی سەرو چڕېەو کۊلەکتېڤو " ژەنۍ ژېای ئازاڎی " پۍ جاری دووەمی جە شارو لەندەن و پاېتەخت و بەرېتانېای ڕەوەنڎو کورڎی و دۊسا کورڎی بەشدارېشا جە ۋێنېشانداېۍ جەماوەرېنە کەرڎ ، پۍ پەشتېوانی جە ئاخێزو " ژەنۍ ژېای ئازاڎی " .
ۋێنېشاندەرەکۍ جە جادەکاو لەندەن-ی بە بەرزکەرڎەېۊ ژمارێۋە پۊستەرو لافېتۍ و واتەېۊ دروشمەکا پەشتېوانېشا جە ئاخێزو " ژەنۍ ژېای ئازاڎی " جە ۋەرکۊتو کورڎسانی و ئێرانی کەرڎ . ھام ۋەخت داواو ئازاڎی پۍ گېرېاېاو سېاسی کەرێنۍ و سەپناو سزاو جە دارداېشا سەرو ۋێنېشاندەرارە مەحکوم کەرڎ . ۋێنېشاندەرەکۍ جە ۋەربەرەو کەناڵ و بی بی سی تا سەنتەرو تەلەگراف سکوێری لۋۍ ، بە ۋەردەوامی جە جاڎەکانە دروشمەو " ژەنۍ ژېای ئازاڎی " واچێنێۋە .
نەتەوە جېاجېاکۍ ئێرانی پێسە " بەلوچ ، کورد ، فارس ، عەرەبۍ ئەھواز "ی بەشڎارېشا جە ۋێنېشانداکانە کەرڎ ، ئا نەتەۋۍ و چن چالاکۍ فېمېنېستۍ و مرۊڤۍ ئازاڎی وازۍ بە زۋانی ئېنگلېزی ، دژو سەرکوت کارېەکاو کۊمارو ئېسلامی ئێرانی ئەرەېاونێۋەشا ۋناۋە و واچێۋەشا پێشکەش کەرڎ و سېاسەت و نا دېموکراتېانەو ئێرانی- شا جە ۋەران ۋەرو کورڎی و گەلا تەرو ئێرانی شەرمەسار کەرڎ .
چالاکۍ بە دروشمەکاو " ژەنۍ ژېای ئازاڎی " ئازاڎېی پۍ گېرېاېاو سېاسی کورڎی جە ئێران " گەشمەرڎۍ مەمرا و بژېوۊ ڕابەر ئاپۊ " دماو ېەرۍ سەعاتا جە ۋێنېشانداېو گلێربېەېۊ دماېش بە چالاکېەکا ئارد .
ھ.ئ
