بەئامادەبیەی نوێنەرا رێکوستەکاش چواردەهەمین کۆنگرەو مېیانو گلېرگەی دیموکراتیکی جە پایتەختو سویدی بە دەیەقێوە رێزگېرتەی جە یاڎو گەشمەرڎا ڕاو ئازادی دەسش پنەکەرڎ.

دماو دەسنیشانکەردەی دیوانو کۆنگرەی، وتارەو کەردەیۆ و گرنگی هەلومەرجو بەهێزکەردەی رێکوستەکا گلېرگەی مەدەنی جە ئۊروپانە وزیا رووە.

بەنامۍ دیوانیۆ ۋەرپەرسو مېیانو گلېرگەی دیموکراتیکی نەجەدەی جە ئەسکاندناڤیا، دۆغان .... جە قسەکاشەنە، سەرتا باسش جە پێڤاژۆی تازەو تورکیای کەرد و لایێش جە تاریخو تورکیای کەرڎۆ و واتش:

ئیساتۍ فاڕیایۍ تازە ئینا ئارانە سەرەڕاو ئانەی ئەمریکا و ئیسرائیل کاریگەریشا هەن، رابەر ئاپۆیچ جە هەر جۆرە فاڕیایێنە جە ۋەرکۊتوو مېیامینینە دەورش هەن، ئانەیچ بە ئاشکرا دیارا و پێگەو ۋەرنیشتی و ئاژەو ئی دماییە پەی کوردی و گەلا چەوەسیای نموونێوە دیارا.

دۆغان واتیچش دۊڵەتو تورکیای درکش بە دەور و قۆرسایی رابەرایەتی کەردەن و پۊکەی جە جبەرەو ئیمرالیش دا..

ئاماژەش پانەیچ دا کە هەنگامەکۍ ئی دماییە دووەلایەنەنە بەڵام جە لایەنو دۊڵەتیوە سېرکەر نەبیەن، بەڵام پێڤاژۆو ئیساتۍ کوردش جارێوەتەر کەرد بە رۆژەڤو جەهانی و پاڵپەشتی پرۆسەکەیش پەی کوردی چنی ۋێش ئاورد .

ئێمەیچ پېسە چالاکا سیاسی و رێکوزیاکا گلېرگەی مەدەنی هەوڵ مڎەیمۍ بیمۍ پاڵپەشتۍ پەی پڕۆسەکەی، جە کۆنگرەنە پېسە نەجەدەکەی ۋێما جە چوارچێوەو پڕۆسەکەینە تازە مکەرمېوە.

دماتەر وتارەو سەرۆکو پارتو چەپو سویدی کە رەوانەو کۆنگرەکەی کریابۍ پێشکەش کریا، نوشیدا دادگۆستەر سەرەڕاو پیرۆزبایی واتش پېسە پارتو چەپی پەشتیوانی هەوڵەکا چالاکا کوردی جە سویدەنە مکەرا.

وتارەو کۆمیتەو رێکوستەکا پەژاکی جە لایەنو ئەمیر بابەکرییوە پێشکەش کریا و واتش پێڤاژۆکە ئانەی نیشانە مڎۆ کە پەنەوازی هەرمانۍ و کۊششیما زیاتەر وەڵۍ وزمۍ پەی ئانەی بیمۍ بە پاڵپەشتۍ پەی پرۆسەی تازەی کە جە تورکیا و کوردەسانەنە دەسش پنەکەردەن .

جە درێژەو کۆنگرەینە وتارەو دەسوەڵێوستەی کوردا پانیشتوو کوردەسانی جە لایەنو نادیا کوردێوە پێشکەش کریا .

کاروان سەعید بە نامۍ کۆنگرەو نەتەوەی کوردەسانیچ وتارێوەش پێشکەش کەرڎە و ئەرەیاۋناش کە پێڤاژۆی تازە پانیشتوو کوردەسانی و ئێراقیچ گێرۊوە .

وتارەو کۆمیتەو کەژارو سویدی جە لایەنو شاناز ئەلیاسۍ و وتارەو ژەنا سارای جە سویدد جە لایەنو عایشە دیدارێوە پێشکەش کریا

دماو هۊرگێرتەی پەیلواو ژمارێوە جە بەشدارا ، گوزارشتەو ساڵانەو هەرمانە و کۊششو نەجەدەکەی ۋنیاوە

ئەنداماو دەسەو ڕاوەبەری دەسنیشان کریۍ و هامسەرۆکا نەجەدەکەی بە دەنگدای هۊرچنیۍ

یاگۍ ئاماژەینە مېیانو گلېرگەی دیموکراتیکی کوردی، مېیانێوە فەرمی و ڕاپنەدریان جە سکاندیناڤیانە کە تاوانش جە بوارەکا سیاسی،کۆمەڵایەتی و کەلتوورینە کوردۍ تاراوگەی پېوەرە گلێرۍ بکەرۆوە.