بە گوێرەی ماڵپەڕی دەنگی دەستگیرکراوانی کورد و ئێران بە تەنها لە مانگی حوزەیراندا لە لایەن دەوڵەتی ئێرانەوە ١٠٨ هاوڵاتی لە سێدارەدراون و ٩٠٠ هاوڵاتی دیکەش لە سەرانسەری ئێران و ڕۆژهەڵاتی کوردستان دەستگیرکراون.
ماڵپەری دەنگی دەستگیرکراوەکانی کورد و ئێران لە ڕاگەیاندراوێکدا ئاماری پێشێلکارییەکانی مافی مرۆڤی لە ڕۆژهەڵاتی کوردستان و سەرانسەری ئێران بڵاوکردەوە کە لەلایەن دەوڵەتی ئێرانەوە ئەنجام دراون.
لە ڕاگەیاندراوەکەدا هاتووە، لە مانگی حوزەیرانی ئەمساڵدا لە ڕۆژهەڵاتی کوردستان و ئێران ١٠٨ زیندانی لەسێدارە دراون، کە لەو ژمارەیە سێ کەسیان ژن بوون، هەروەها لەو ژمارەیەدا ١١ کەسیان بەلووچی، حەوت کەسیان کورد و شەش کەسی دیكەیان خەڵکی ئەفغانستان بوون.
ئاماژە بەوەشکراوە، هەر لە ماوەی ئەو مانگەدا ٩٠٠ کەس لە ڕۆژهەڵاتی کوردستان و ئێران بە تۆمەتی ئەمنی و بە بێ فەرمانی دادوەر دەستگیر کراون.
باس لەوەشکراوە، هەر لە ماوەی مانگی حوزەیرانی ئەمساڵدا لە شارە جیاجیاکانی ڕۆژهەڵاتی کوردستان و ئێران ٢١ کەس بە هەڕەمەکی لە لایەن چەکدارەکانی ئێرانەوە کوژراون، کە یەکێکیان کۆڵبەرێکی کورد بووە و دووانیان بەهۆی ئەشکەنجەی هێزەکانی وەزارەتی ئیتلاعاتی ئێرانەوە گیانیان لەدەستداوە.
