سەرسەعبو ئارۆی جە هۆڵو سەردەمینە جە شارو حەسەکەو ۋەرنیشتوو کورڎەسانی بە درووشمەو "پێوەرە ئازاڎی جەسەیی ڕابەر ئاپۆی، چەسپنای ۋێڕاوەبەری و ئەرەمەرزناو سوریێوە دیموکراتیکی مسۆگەر مکەرمۍ" کۆنگرەو ١٠یەمینو پەیەدەی جە ٢١ەمین ساڵوەگەڕو پەیەدەینە دەسشپنەکەرڎ و قەرارا دووۍ ڕوۍ (٢١ و ٢٢ۍ ئەیلول)ی بەردەوام بۆ.

جە هۆڵو کۆنگرەکەینە چڼین لافیتۍ پېسە؛ "پەیەدە پارتو گەشمەرڎا و کۆششیا"، "ئەرەکۊشایما بەردەوام مکەرمۍ"، "فەلسەفەو ژەنی ژیۋای ئازاڎیی زامنو گلێرگێوە ئەخلاقی، سیاسی و دیموکراتیکیا" و... چنی وێنەو سەرمەشقا پەیەدەی؛ شیلان کۆبانێ، زەکەریا، جوان، فواد و جەمیل کە جە ساڵەو ٢٠١٤ینە جە کۆمکوژیێوەنە گەشمەرڎۍ بیۍ هۊرواسیێبێنۍ.

جە کۆنگرەکەنە سەرەڕاو ئامادەبیەی ٧٠٠ ئەندام کۆنگرا، ئەڤین سوێدە و حسێن عوسمان هامسەرۆکا ئەنجومەنو ڕاوەبەری ئیدارەو ۋێڕاوەبەری دیموکراتیکی هەرێموو سەرنیشت و ۋەرکۊتوو سوریای و هامسەرۆک و نوێنەرو چڼین پارت و ئەرەمەرزیایا ۋێڕاوەبەری ۋەرنیشتی ئاماڎۍ بێنۍ.

سەرەتاو کۆنگرەکەی بە دەیەقێوە مردای پەی گەشمەرڎا ئازادی دەسشپنەکەرڎ و دماتەر هامسەرۆکۆو پەیەدەی ئاسیا عەبدوڵا دەسش بەقسەکەردەی کەرڎ.

بە پاو کۆمیتەو ئاماڎەکارو کۆنگرەکەی؛ بە نامۍ ئەنجومەنو بنەیانەو گەشمەرڎا، ئیدارەو ۋێڕاوەبەری دیموکراتیکی و کۆنگرە ستاریچۆ قسۍ مکریا. هەرپاسە وتارەو پیرۆزبایی بەستەی کۆنگرەی و بەڵگەفیلمێوە دەربارەو کارەکا پەیەدەی نیشانە مڎریۆ.

جە کۆنگرەکەنە سوپاسنامە پێشکەش بە بنەیانەو گەشمەرڎا مکریۆ، هەرپاسە گوزارشتەو ئەنجومەنو پەیەدەی و ڕوانگەکا ڕابەرو گەلوو کورڎی عەبدوڵا ئۆجالانیچ ۋنریاوە.

هامکات پەیڕەوو پارتو (پەیەدە)ی بە پاو پێشنیاری و پەیلواکا مواڕیۆ، دماتەر ئەنجومەنو گرڎی پارتەکەی و هامسەرۆکایەتی تازە هورۍ چنیا.

شایانو یاڎ ئاردەیۆین کە پەیەدە یوەمین کۆنگرەو ۋێش بە بەشداری ١٨٥ نوێنەرا جە مانگەو ئەیلولو ٢٠٠٣ جە کەشەکا کورڎەسانینە بەست. جە کۆنگرەکەنە ئەرەمەرزناو پەیەدەی ئەرەیاۋییا.