دەسەو ڕاوەبەری کۆنگرەو نەتەوەیی کوردەسانی (کەنەکە) پێوەس بە سەپنای قەیومی سەرو شارەوانییەکا گۆرە شارو مێردینی و ئێلحی و خەلفەتی ڕەحایرە، ئەرەیاۋنێوەش وەڵا کەردۆ و ئاماژەش پانەی دا کە دۆڵەتو تورکی جە ماوەو ١٠ ساڵی دماینە ئینە یەرەم جارا ئیراڎەو دیموکراتیکی گەلوو کوردی پاشێل مکەرۆ و بە شێوێوە نایاسایی دەسگێرۆ سەرو ڕاوەبەریە هەرێمییەکا کوردەسانیرە.

"سەپنای قەیومی درێژکەردەیۆ سیستەمو فاشیستی و تاڵانکەریا"

جە بەردەوامینە کەنەکە سەپنای قەیومیش سەرو شارەوانییەکارە بە بێڕێزی ۋەرا ۋەر بە ئیراڎەو گەلی نیانەرە و ئامان: "ئی کردەوۍ نەک تەنیا گۆش نەڎاین بە دەنگ و ئیراڎەو خەڵکی، جە هەمانکاتەنە بەردەوامیداین بە درێژکەردەیۆ سیستەمو فاشیستی و تاڵانکاری. پېسە کەنەکەی بە تنی ئی هەوڵدایە شەرمەزار مکەرمۍ."

جە بەشێوە تەرو ئەرەیاۋناکەینە ئاماژە پانەی کریان کە بێدەنگی ئەرەمەرزیا مېیاننەتەوەییەکا مەڵامەتوو کارە نایاساییەکا دەسەڵاتدارو فاشیستی ئاکەپە-مەهەپەین و ئامان: "داوا جە هێزە دیموکراتیکە جەهانییەکا و ئەرەمەرزیا مېیاننەتەوەییەکا مکەرمۍ کە جە ۋەرا ۋەرو ئی کردەوانە بێدەنگۍ نەبا و جە دژو یاسا ماڕای و نادادپەروەری مرداوە."

بانگەواز پەی خاوەنداری جە شارەوانییەکا

جە درێژەو ئەرەیاۋناکەینە بانگەواز پەی خاوەنداری جە شارەوانییەکا کریان و ئامان: "داوا جە گرڎو شارەوانییەکا جەهانی مکەرمۍ کە دژو ئی یاسا ماڕیە و سەپنایە مرداوە و پەشتیوانی جە شارەوانییەکا کوردەسانی بکەرا."

'جەخت مکەرمێوە سەرو مافو چارەو ۋێنویستەی، دیموکراسی و ئیراڎەی ئازادی'

جە دما دمایی ئەرەیاۋناکەینە داواو لابەردەی و دماییئاردەی دەمودەسو سەپنای قەیومی کریان و داواش جە گەلوو کوردی و ئۆپۆزسیۆنی دیموکراتیکی تورکیای کەرڎ جە دژو ئی نا دادپەرەوەرییە مرداوە و ئەرەیاۋییان: "جەخت مکەرمێوە سەرو مافو چارەو ۋێنویستەی، دیموکراسی و ئیرادەی ئازادی."