کەجەکە ناڕەزایش بەربڕی ۋەرا ۋەرو دەسسەرەرەگێرتەی شارەوانییەکا مێردین، ئێلح و خەلفەتی، واتش: "داوا جە گەلەکەیما مکەرمۍ، خاوەنداری جە شکۆ و ئیراڎە و ئازادیی ۋێشا بکەرا. هەتا دەسسەرەرەگێرتەی هۆرگیریۆ، پەنەوازا گەلەکەما درێژە بە چالاکیەکاش بڎۆ".
ئەرەیاۋناکەو هامسەرۆکایەتی کۆنسەو ڕاوەبەری کەجەکەی، پی جۆرەنە:
"سەرسەعبو ئارۆی، دەسەڵاتو ئاکەپە-مەهەپەی فاشیستی جە شارەوانییەکا مێردین، ئێلح و خەلفەتینە قەیومش نیارە، دیسان ئیراڎەو گەلیش دەسسەرەرەگێرت و ئیراڎەو گەلوو کوردیش بە بارمتە گێرت. جە قۆناغێوەنە، جە تورکیانە باس جە چارەسەری و پرۆسەی تازەی مکریۆ، دیسان دەسسەرەرەگێرتەی ئیراڎەو گەلی بەرش وست جە حەقەتینەنە هیچ نیازێوە چارەسەری بیەیش نییا، بەپێچەوانۆ، زیهنیەت و سیاسەتی قڕکەر بەردەواما. ئیتر ئاشکرا بیەن، ئانەی بەدەم وچیۆ و ئانەی بە کردار جابەجێ مکریۆ، تەمام پێچەوانەو یۆترینینۍ. سەلەمنۆش ئا چێوۍ وچیا، تەنیا ئامانج چنەش هۆرخەڵەتناین. دەسەڵاتو ئاکەپە-مەهەپەی هیچ نیازێوە ئاشتی و واڵە و برایەتی و چارەسەریش نییا، پلانێوە چامنێچش نییەنە. ڕێک بە پێچەوانۆ، خاوەنو زیهنیەت و سیاسەتو ئەسڕیەیۆ ئاشتی و واڵە و برایەتی و چارەسەرین. تەنیا پلانێوەش هەنە، ئاڎیچ پلانەو تەسفیەی و قڕکەردەین.
واوەی دەسسەرەرەگێرتەی ئیراڎەو گەلوو کوردی، نیەتو حەقەتینە و پیلانەو دەسەڵاتو ئاکەپە_مەهەپەی ئاشکرا مکەرۆ. پۊکەی مشۆم کەس باوەڕ بە قسەکا ئی دەسەڵاتیە نەکەرۆ، جە زیهنیەتو ئاکەپە_مەهەپەینە ئاشتی و دیموکراسی و چارەسەری کێشەکا و دڎانیایپۆرەی ئیراڎەی، بیەیش نییا. زیهنیەتو ئی دەسەڵاتیە سەراپا دژو دیموکراسییا. نەژاڎپەرس و فاشیست و قڕکەر و فریودەرا. گرڎو قسەکاش ئینۍ چوارچێوەو جەنگی تایبەتینە. بە ڕێبازو جەنگی تایبەتی هەوڵمڎۆ زیهنیەتو گلێرگەی تێکبڎۆ و گلێرگەی هۆرخەڵەتنۆ و ملکەچشا بکەرۆ. قسەکۍ ئی دماییەیچشا، هەر پی مەرامەینۍ.
پەنەوازا گرڎو گەلوو کوردی ئەرەپڕۆ و خاوەنداری جە ئیراڎەو ۋێش بکەرۆ. پەنەوازا بە هیچ جۆرێ ئی ئاژەیە قبووڵ نەکەرۆ، ناڕەزایی نیشانە بڎۆ، پەنەوازا نەمردا تا دەسەڵات پاشکەشە نەکەرۆ و واز جە دەسسەرەرەگێرتەی نارۆ و شارەوانییەکا ڕادەسو گەلی نەکریاوە. ئانەی مکریۆ، چڼۍ دەسسەرەرەگێرتەی و قڕکەردەین، هامکات پاشێلکەردەی یاسای و دیموکراسییا. ئەرەکۆشای دژو ئی سیاسەتە دژە دیموکراسیی و قڕکەری و تاڵانکەریە، تەنیا دەرفەتا پەی دیموکراسی. داوا جە گەلەکەیما مکەرمۍ، خاوەنداری جە شکۆ و ئیراڎە و ئازادیی ۋێشا بکەرا. هەتا دەسسەرەرەگێرتەی هۆرگیریۆ، پەنەوازا گەلەکەما درێژە بە چالاکیەکاش بڎۆ.
بانگەواز جە گلێرگەو تورکیای و هێزە دیموکراسییەکا تورکیای مکەرمۍ پەشتیوانی جە گەلوو کوردی بکەرا. خاوەنداری جە ئیراڎەو گەلوو کوردی و داواو ژیۋای ئازادی و دیموکراتیکی ماناو خاوەندارییا جە دیموکراتیکبیەو تورکیای. هەر کودەتێوە دژو ئیراڎەو گەلوو کوردی، بە ماناو کودەتاین دژو دیموکراتیکبیەو تورکیای. دەسسەرەرەگێرتەی شارەوانییەکا مێردینی و ئێلحی و خەلفەتی کودەتان. هامکات کودەتان دژو دیموکراسیی تورکیای و پێوەرەژیۋای. کودەتان دژو دیموکراسی تورکیای و ئیراڎەو پێوەرەژیۋای. ئاشکران دەسەڵاتوو ئاکەپە_مەهەپەی نمەمدرۆ، جە کوردەسان و تورکیانە بەردەوام مەبۆ جە دەسسەرەرەگێرتەی ئیراڎەو گلێرگەی. سەرەتا شارەوانی ئەسەنیورتی، ئیساتێچ شارەوانییەکاو مێردین ، ئێلح و خەلفەتیش دەسسەرەرەگێرتێنۍ، ئینە بەرش وزۆ کە بەردەوام مەبۆ. پۊکەی مشۆم گەل ۋەرا ۋەر بە فاشیزمی و تاڵانی و دەسسەرەرەگێرتەی و قڕکەردەی پێوەرە مڎرامان بکەرا و هەتا ئیراڎەو دەسسەرەرەگیریای واوەی بە دەس نێوە، درێژە بە چالاکییەکاشا بڎا".
