تشرینو یوەمو ٢٠٢٤ بەدماوە ١٥ سەرۆک شارەوانییەکێ جەهەپەی گیریێنێ کە دلێشانە سەرۆک شارەوانی گۆرە و شارو ئەستەنبوڵی ئەکرەم ئیمامۆغڵویش ئینا چنە. وەزارەتو دلینەی قەیومیش سەر و دووێ شارەوانییارە سەپنا. پەرلەمانتارا  جەهەپەی جە ١٠ شارەوانیانە نوێنەرشا هورچنی، دماتەر ئا شارەوانیێ وەر و ئاکەپەی کەوتێ.

هامسەرۆکو گرڏی دەم پارتی تونجای باکرهان ئی ئۆپەراسیۆنێشە بە تنی ئیدانە کەردی و ئاماژەش پانەی کەرد کە چا شارەوانیا کە قەیومش سەرەرە سەپیان، بەمەڵامەتوو سەپنا و قەیومی گەندەڵی و دزیی گۆرەش چنە کەوتەنۆ.

سەرۆک فراکسیۆنو پارتو یەکسانی و دیموکراسیی گەلا (دەم پارتی) سەزای تەمەلی پەیوەس بە ئۆپەراسیۆنەکاوە ئەرەیاوناش، ئا ئۆپەراسیۆنڕ کە جە ١٩ـو ئاداریۆ بەردەوامیشا هەن، دلێ گەلینە دوودڵی و بێهیواییش وەشکەردەن. تەمەلی باسش چانەی کەرد، هیواکێ پەی ئاشتی، کە جە ١ـو تشرینو یوەمیۆ دەسش پنەکەردەن و بە ئەرەیاونێوە ڕابەر ئاپۆ کە جە ٢٧ـو شوباتی بەهێز بێ، پی ئۆپەراسیۆنێ هەوڵ دریۆ تێک دریۆ.

'پرۆسەکە پەنەوازیش بە ڕا و یاسایی و دیموکراسی هەنە'

تەمەلی ئاماژەش پانەی دا، پڕۆسەکە بەبێ دیموکراسی بییەی مەتاوۆنە بەشێوێ تەندروس بلۆڕاوە و ئەرەیاوناش، دەسەڵات پەرسەکێش بە "تیرۆرزم" و "چەکنیارەی" سنووردارکەردەن و واتش، "ئی مامەڵە کێشە و سیاسیی جددی بەرهەم مارۆنە." تەمەلی ئاماژەش پانەی کەرد، دەم پارتی جە سەرەتاوە هەڵوێسی ڕۆشنش سەر و ئی بابەتەیە بییەن و هۆشداریش دان بە دەسەڵاتی.

سەزای تەمەلی باسش چانەی کەرد، ئەوەکۆشای چەکداری دمایش ئامان، بەڵام ئەوەکۆشای پەی چارەسەریی دیموکراتیکو پەرسە و کوردی بەردەوامیش هەن و ئاماژەش پانەی کەرد، هەنگامەی یوەمە بەرەو چارەسەریی دادگایێ سەربەخۆی، دمای ئاردەی بە زینان کەردەی سیاسی و لابەردە و سیستەمو قەیومی.

سەزای تەمەلی ڕۆشنش کەردۆ، ئۆپەراسیۆنەکێ دژو سەرۆک شارەوانییەکا جەهەپەی "ڕێککەوتەکێ شار" ی و هەدەکە ی پێسە و هێماو تاوانێ نیشاندریێنێ و واتش ئینە قبووڵ مەکریۆ. تەمەلی باسش چانەیش کەرد، ئۆپەراسیۆنەکێ چێرو نامێ گەندەڵینە ئەنجامدریێنێ و واتش، بەڵام هیچ بەڵگێوە کاریگەر و جددی بییەیش نییا.