ڕابەر ئاپۆ دما و ٢٦ ساڵا پەی یوەم جاری پەیامێوە ڤیدۆییش وەڵاکەردۆ، پەیامەکە دلێ ڕاو گرڏینە پێشوازیش چنە کریا و کاروەدای ئەرێنیش شۆنە و وێشەرە ئارد. ئەرەن کەسکینە چالاکوانە و مافو مرۆڤی و هامسەرۆکە و جەمە و مافو مرۆڤی (ئیهەدە)، چا بارۆ هورسەنگنایش کەرد و یاڏش وستیمێ کە پەی ماوێوە فرەی جە ئیمراڵینە گۆشەگیری بەردەوام بییەن.

ئەرەن کەسکینە ئەرەیاوناش کە پەیامە ڤیدیۆییەکە ئاماژەن بە قۆناغێوە گرنگ جە پەرسە و کوردانە و واتش: "کاتێ ئۆجالان ئاردشا تورکیا، من یۆ بێنا جە ١٢ پارێزنەرەکا یوەمی و پەی ماوە و چنین ساڵا جیا جە چن پارێزنەرێ، کەس نەتاواش چەمێش پنە گنۆ، تەنیا کاتو پرۆسەو 'چارەسەری' نەبۆ. چونکە گۆشەگیرییێ ڕەها سەرشەرە سەپیا بێ. گۆشەگیرییەکە چی ساڵا دماینە تنتەر بی، زینانو  ئیمراڵی زینانێن کە دیار نییا گرێدراو کۆکەین، تەنانەت یاسا دلینەکێ تورکیای چاکە جابەجێ مەکریا و هەرپاسە هیچ ستانداردێوە یاسایی چاکە نە گیریانەرە وەر. ئی دۆخە ساڵانە بەردەواما.

'پشتڕاسش مکەرۆوە کە پێسە و موخاتەبی وینریۆ'

وەڵابییەیۆ ڤیدیۆو کەسێوە چانەی کە ئینا گۆشەگیریی ڕەهانە، نیشاندەرو ئانەین کە پەرسە و کوردی یاوان چ ئاستێ. بەڕاو من ئی دۆخە ئانەی نیشانە مرۆ کە بە مۆخاتەب هورگێرتە و ئێژا ئۆجالانی و جمیەرە و ئازادیی کوردی قبووڵکریان و گلێرۆبییەکێ چا چوارچێوەنە ئەنجام دریێنێ. جگە چانەی بێ گومان گەل چونکە بەساڵانە نەوینانشا، کاریگەریێ فرەشا سەر بییەن."

ئەرەن کەسکینە ئاماژەش با جەنگە قورسا کەرد کە دۆڵەت جە کوردوسانەنە ئەنجامش دێنێ و واتش: "چارەسەرو ئاشتیانەی فرە بەنرخا، پۆکەی فرە گرنگا چەکەکێ بێدەنگێ کریا و گفتوگۆو ئاشتی دەس پنە بکەرۆ."

دۆڵەتیش ناچارا هەنگامە بنیۆ

ئەرەن کەسکینە ئەرەیاوناش، مشۆم دیموکراتیزەکەردە و گرڏی دەس پنە بکەرۆ و واتش: "گرڏ و ئا هەنگاما کە ئیسە نریێنێ، جەلایەنو جمیەرە و کوردیۆ بیێنێ، دۆڵەت ناچارا هەنگامەی یاساییە بنیۆ. پەی نموونەی ئازادکەردە و زینانیا سیاسی، ئازادکەردە و زینانیا نەوەشی، وەڵکەوتە و ئازادی ڕابەربڕییەی و ڕێکوزتەکا؛ ئینێ هەڵای جابەجێ نەکریێنێ."

جە دماینە ئەرەن کەسکین جەختش چانەیە کەردۆ کە هیواڏارەنە دۆڵەت ئەرکەکا وێشا جابەجێ بکەرا.