کۆنگرەو جەمە دیموکراتیکەکا کوردەسانیا ئۊروپای (کەجەدەکە-ئە) بە ئەرەیاۋنێوە نویسیا پاڵپەشتی ۋێش پەی بانگەوازەکەو ڕابەر ئاپۆی نیشانە دا و جەختش چانەی کەرڎۆ ئامادێنې پەی جابەجا کەردەی ئەرکەکاشا و  ئەرەیاۋناش، ئەوەکۊشای شکۆدار و ئازادانەو گەلو کوردی و گەلا ۋەرکۊتوو مېیامینی پڕانۆ پەی قۆناغێوە تازەی و واتش: "پەیامە ڤیدۆییەکەو ڕابەر ئاپۆی بی بە یاگې هیواو گەلەکەیما و ئیرادەو چارەسەری گەلەکەیماش بەهێز کەرد.

پېسە کەجەدەکە-ئەی جارێوەتەر پەی ڕای گرڎینیش ئاشکرا مکەرمې کە پاڵپەشتې بانگەوازە تاریخیەکەو ڕابەر ئاپۆینمې و ئاماڎینمې بە نامې گەل و گلێرگەکەیماوە ۋەرپرسیاری ۋێما گێرمېنە ئەستۆ." کەجەدەکە ئاماژەش بە بەرەنجامو قۆناغەکې کەرڎ و واتش: "ئی قۆناغې دەرەنجامو بڕیارداری، فیداکاریی و ئەوەکۊشای ڕێکوزیایی گەلان."

کەجەدەکە-ئە سەرنجش وست سەرو بانگەوازییە تاریخیەکەو ڕابەر ئاپۆ و جەختش چانەیە کەرڎۆ گرڎو ئا ئەرکا جابەجێ مکەرا کە گنۆ ئەستۆشا پەی سەروستەی پرۆسەکەی و پەنەوازیەکا بانگەوازییەکەی.

'مەشۆم هەنگامە پەی ئاشتی بنریۆ'

کەجەدەکە-ئە هەڵوێسو خاوەنداری ۋێش جە پەیامەکەو ڕابەر ئاپۆی ئەرەیاۋنا و واتش: "ئاشکران ئاشتی بە یەکلایەنە پێکنمې و پەنەوازا گرڎو لایەنەکا ۋەرپرسیاری ۋێشا جابەجا بکەرا. داوا جە گرڎو لایەنە پەیوەندیدارەکا مکەرمې هەنگامە پەی ئاشتی هۆرگێرا. داوا جە گەلەکەیما مکەرمې پی ڕوحیەتۆ خاوەنداری جە ئەوەکۊشای بکەرا، یۆگێرتەیشا زیاتەر بکەرا و بە بەهێزیۆ بەشدارۍ پرۆسەکەی بانە."