بانگەوازو دەم پارتی: ۋەراۋەر بە ئاوەزیەتو کودەتاچیەکا ئەرەپڕدۍ
دەم پارتی ۋەراۋەر بە دەسسەرەرەگېرتەی شارەوانییەکا ناڕەزایش بەربڕی و ئەرەیاۋناش: "گرڎ کەسۍ مشۊم جە بەرزتەرین ئاستەنە دەنگو ۋېشا دژ پی کودەتا ناڕەوایەو دەسەڵاتی بەرز بکەراوە."
دەسەو ڕاوەبەری مېیانو پارتو دیموکراسی و یەکسانی گەلا دەم پارتی ئەرەیاۋنێوەش سەبارەت بە نیایرەو قەیومی پەی شارەوانیەکا مێردین، ئێلیح و خەلفەتی روحای و تەوقدای شارەوانییەکا وەڵا کەردۆ. جە ئەرەیاۋناکەینە ئاماژە پانەی کریان کە حکومەتو ئاکەپە – مەهەپەی جە دماو جۆلەمێرگی و ئەسەنیورتی بەردەواما جە دەسسەرەرەگێرتەی شارەوانییەکا.
دەم پارتی، نیایرەو قەیومیش بە کودەتا وەسف کەرد و ئەرەیاۋناش: "یاگۍ سەرنجیا کە جە ساڵیاڎو کودەتاکەو پەرلەمانینە جە ٤و تشرینو دووەمو ٢٠١٦ ی دژو ئیراڎەو گەلوو کوردی کودەتا مکریۆ. هرووژمەکۍ بە مەرامو دمای ئاردەی بە سیاسەتو دیموکراتیکی گەلوو کوردی ملاڕاوە. جە ساڵۆو ١٩٩٤یوە ئی سیاسەتۍ بەردەوامێنۍ و سەرکۆتۍ نەبێنۍ. ئانەی کریان تەنیا واوەی بیەیۆ هەمان ئاوەزیەتو ٣٠ ساڵەین. ئێمە جارێوەتەر ماچمۍ ئی هرووژمۍ کودەتێوە ئاشکران جە دژو ئیراڎەو گەلی. جە ۋییەردەنە کودەتاو قەیومەکا جە لایەنو گەلیۆ ڕەڎکریانۆ و سیاسەتەکێشا جە هۆرچنیەکانە شکسێوە گۆرەش ۋنەکۆتۆ و گەلەکەما دەم پارتیش پېسە ئیراڎەو ۋێش هۆرچنی.
کودەتا نیشانۍ شکسی سیاسییا، حکومەتو ئاکەپە-مەهەپەی جە ڕاو دادگا و هێزە ئەمنییەکاوە هەوڵو دەسسەرەرەگێرتەی ئا شارەوانیا مڎا کە نەتاواشا جە ڕاو هۆرچنیەیۆ بە ڕێبازێوە یاسایی بەدەسشا بارۆ. ئی هرووژمە، هرووژما جە دژو مافو دەنگدای گەلوو کوردی. هەرپاسە دەسەڵاتو سیاسی ئیساتۍ شەرعیەتو دیموکراسی ۋێش جە گرڎ ڕووێوە جە دەس دان.
هیچ دەسەڵاتێوە نەتاوانش چی وڵاتەنە بە چەوەسنایۆ و زۆرداری سەرکۆتە بۆ و نمەبۆیچ. گەلاو تورکیای ئیتر مل بە ستەمی و چەوەسنایۆ نمەڎا. کودەتاو قەیومی کێشەو دیموکراسی و ئازادیی ٨٥ ملیۆن هاموڵاتیا تورکیاین و ئەگەر ڕاش ۋنە نەگیریۆ، تەنیا بە هۆرشێونایۆ شارەوانییە کوردییەکاوە سنووردار نمەبۆ، بەڵکم جە گرڎ شۆنۍ تورکیاینە ئی ئاوازیەتەیە مسەپنا.
ئی شێواز و هرووژمۍ گرڎو هەوڵدای و جە یۆ نزیک بیەیۆکا پەی چارەسەری شێونانە و گومانێوە گۆرێش سەرو ڕاسی حکومەتی وەش کەردەن. ئێمە چەمەڕۍ بێنمۍ دەسشا پەی ئاشتی و چارەسەری درێژ بکەرا، بەڵام دەسشا پەی دەسسەرەرەگێرتەی ئیراڎەو گەلی درێژ کەرڎ. هەرپاسە چەمەڕۍ ئانەی بێنمۍ ئی پرسە بە گفتوگۆو ئەرەنیشتەی چارەسەر بکریۆ، بەڵام ئاڎۍ دامەشا پەی ئیراڎەو گەلی نیارە. ئێمە بە هیچ جۆرۍ تەسلیمیەت قبووڵ نمەکەرمۍ و جە ئەرەکۆشای ۋێما پاشەکشە نمەکەرمۍ. حکومەت ڕووبەڕوو شکسێوە گۆرەی بیەنۆ و پی جۆرە جە قەیرانەکا ڕزگارش نمەبۆ. هامکات مشۆم گەلەکەما جە گرڎ هەلو مەرجێوەنە خاوەنداری جە ئیراڎەو ۋێش بکەرۆ."
