کۆمیسۆنو زۋان و کلتوری و پەروەردەو کۆنگرەو نەتەوەیی کورڎەسانی (کەنەکە)ی بە ئەرەیاۋنێوە هرووژمەکۍ دۆڵەتو تورکیش پەی سەرو ناوەندەکا پەروەردەی و فێرکەردەی زۋانی کوردی شەرمەزارۍ کەردۍ.

ئەرەیاۋناکەو کەنەکەی پی جۆرەنە:

" هەر پېسە ئاشکران دۆڵەتو تورکی فاشیستی و ئەرەگیری، چی ڕووا دماینەینە بە شێوێوە دڕندانە و بە بەردەوامی جە دژو بەکاربەردەی، فێرکردەی و پەروەردەو زۋانی کوردی مردانۆ و هرووژم مکەرۆ سەرو کەسایەتی و ئەرەمەرزیاکا زۋانی.

جە سەرەتانە هونەرمەندێوە کوردشا کوشت بە تۆمەتەو ئانەی بە کوردی گۆرانیێش واتێنۍ. دماو ئا ڕووەدایە جوانۍ کوردی کە زەماۋنە و هۆرپڕای کوردی کەرێنۍ، جە لایەنو پۆلیسەکا دۆڵەتی و هامپەیمانی ئاکەپە-مەهەپەیۆ دەسبەسەرۍ کریۍ. دماو ئانەیچ هۊرشا کوا سەرو زەماوەنڎەکا کوردا. پینەیچۆ نەمردۍ چەتەکۍ دۆڵەتی شارو ئەستەنبوڵینە هرووژم مکەرا سەرو کەسێوە  و تیرۆرش مکەرا بە بەهانۍ ئانەی کە بە تەلەفون چنی یۆ جە بنەیانەکەیش بە کوردی قسێش کەرڎێنە. هەر جە لایەنو چەتەکا دۆڵەتیوە هرووژمشا کەرڎ سەرو  جەمۍ جە کرێکارا کوردی کە  پەی بژێوی ژیۋای ڕووانەیشا کرێکاری کەرێنۍ، وە چا هرووژمانە  بڕێشا گیریۍ.

بە مەڵامەتوو ئانەی کە جە دژو ئا ڕەفتارا دۆڵەتی هیچ  کاروەدایۍ ئەنجام نەدریا، پۊکەی گرفتشا پەی ئا شۊنا کە وەنەو زۋانی کوردیش چنە وچیێوە و ۋنیۍ وەش کەرد و شۊنەو بەهانێوەرە گێڵۍ پەی ئانەی ئا شۆنا وزارە و ئا چەمڎاریکەردەی و هرووژمۍ لا یەزال بەردەوامێنۍ. چی ڕووا دمایینە چا شارەوانیانە کە ڕەوزەو زاوڵاشا کەردەبێوە سەرو دیوارەکاشۆ چن مۆچیاریۍ ئاماو لوایشا سەرۆ نویستەبۍ جە لایەنو چەتە ڕسمی و نا ڕسمیەکا دۆڵەتیوە شۊنیرە لوایشا سەر کریا و دماتەر ئەسڕیێوە. جە بەردەوامینە ڕاوەبەر و فەرمانبەرا ئا شۆنا ۋنەپەرسایشا چنی کریا.  ئیساتێچ ئەوەکۊڵیەرەکۍ دۆڵەتی شارەوانییەکاو ئامەد، وانی و شارەکا تەری شۊنیرەلوای و وشکنای مکەرا و پەی ۋەنەپەرسایۆ کەردەیۆ شۆنەماو وانە واتەیۆ جە بەهانۍ گێڵا.

سەرسەعبو هێزی هرووژمشا کەرڎ سەرو باڵەخانەو جەمەو ئەوەکۊڵیای زۋان و کلتووری مێسۆپۆتامیا ) MED-DER )ی و کتێب ورەشو پایزی پەرتووکی و دماو ئانەی هۆرشا کوا سەرو یانەو ڕاوەبەر و مامۆسایا مەد-دەری و کۊششکارەکا پایز پەرتووکی تەمامو هامسەرۆک، ڕاوەبەر و مامۆسایاشا دەسبەسەرۍ کریۍ. فرێوە جە کتێب و گۆڤارەکا تەری کە بە زۋانی کوردی بێنۍ پېسە نموونە و تاوانۍ چنی ۋێشا بەردێشا. هەرپاسە شارو ئەزمیریچەنە ڕاوەبەرو (ژن ئارت هونەر)ی جە لایەنو چەتەکا دۆڵەتیوە دەسبەسەرۍ کریۍ.

دۆڵەتو فاشیستی تورکی ئەرەگیری جارێوەتەر دژمنایەتی ۋێش ۋەرا ۋەر بە زۋان، کلتوور، وێژە، تاریخ ، هونەر و فۆلکلۆری کوردی بە گەلوو کوردی نیشانە دا و گرڎو قیمەت و بەهاکا کورداشا پاشێلۍ کەردۍ.

ۋەرو ئی تاوانە وەحشیانا دۆڵەتو تورکیای ئێمە پېسە کۆنگرەو نەتەوەیی کورڎەسانی (کەنەکە)ی داوا جە گرڎو رێکوستە سیاسیەکا، دام و دەزگا مەدەنی و پیشەییەکا، باوەڕی و ئاینی، کۆمەڵایەتی و رۆشنۋیری، ئەکادیمیەکا، نوویسەرا و گرڎو وڵاتپارێزنە کورڎەسانیەکا مکەرمۍ کە پێوەرە و بە یەک دەنگیی جە ۋەرا ۋەرو ئی هرووژم و رەفتارە نا ئەخلاقی و دڕندە نەژاڎپەرسیا دۆڵەتی و هامپەیمانی ئاکەپە-مەهەپەو تورکیای کاروەدای و هەلوێسی تنوتۆڵ بە کۆمەڵ و بە یەک دەنگ نیشانە بڎا و چی قیمەت و بەها پیرۆزا گەلوو کوردی و کورڎةسانی خاوەنداری بکەرا.

دیسان ئێمە پېسە کەنەکەی، ئی هرووژما بە تنی شەرمەزارۍ مکەرمۍ. پەی ئانەی بەیەک دەنگی هەڵوێس و کاروەدای بنریۆ داوا جە گرڎو وڵاتپارێزنا کورڎةسانی مکەرمۍ.

تەئکیدش مکەرمێوە کە، زۋان، کلتور، فۆلکلۆر و هونەری کوردی پێناسەو بیەیمانە."