ناوەنڎوو کەشەوانیی هەڵەبجەی، جە هەرمانۍ ژیوگەدۊسیینە ڕۆو جمعەی جە مەنتێقەکاو "سەرسوڵۍ، ڕێوڵە، بەڵخەی سەرین، تەوەنۍ، هانەو تێ" جە پارێزگاو هەڵەبجەینە، کە فرەو یاگاشۊ زیاڎ جە مەترۍ وەروە وارێبۍ، دانەشا کەرڎەرە، پەی باڵدارا و ئاژەڵە کەشییەکا.
-"ماکوان جەمال" سەرپەرشتوو ناوەنڎوو کەشەوانیی هەڵەبجەی، بە ئاژانسوو هەواڵوو فوراتی (ئە نە فە)یش ئەرەیاونا: جە چالاکیێوە ژیوگە دۊسیی ناوەنڎوو کەشەوانیی هەڵەبجەینە، چوار ئەندامۍ ناوەندەکەی، دماو بڕییەی ڕایۍ فرۍ، کە فرەو شۊنەکاوە زیاڎ جە مەترۍ وەرووە وارێبۍ، مەنتێقەکاو "سەرسوڵۍ، ڕێوڵە، بەڵخەی سەرین، تەوەنۍ، هانەو تێ"نە جە کەشەکاو پارێزگاو هەڵەبجەینە، دانەما کەرڎەرە پەی ئاژەڵە کەشییەکا و باڵدارە کەشییەکا، دماو ئانەی زاناما وەروۍ فرۍ وارێنە و تەرسەو مەرڎەی ئاژەڵ و باڵدارەکا هەن و جە ئیسەنە بە ناڕەحەت وارڎەشا دەس گنۊ.
"کورڎ و سرووش دووانێوە دەس جەملانێنێ"
کەشەوانەکە وەشەویسیی وێشاش پەی سرووشتی دووەپات کەردۊ و واتش هەرمانەو کەشەوانی تەنیا گەشتوگێڵ و لەزەتی شەخسی نیا، بەشێوە فرەو ڕەئیسیچش هەستکەرڎەین بە وەرپەرسبییەی، ئیمە پەوپەڕوو هەستکەرڎەیما بە وەرپەرسیی پارێزنای ژیوگەی و جەدەسنەڎای هامسەنگییش، بە هەرمانەو وێما زاناما، بلمۍ دەموو سرووشتیوە، چوون پارێزنای سرووشتی، ئەخلاقێوە ئینسانیی بەرزا.
"زەروورا ژیوگەدۊسی بۊ بە کولتوور"
"ماکوان کەریم" جە دمادمایی قسەکاشنە ئانەشە وات، زەرورا ژیوگەدۊسی تەنیا قسۍ و شیعرۍ نەبا و بە هەرمانەی جیددییە سەلەمیۊ و بۊ بە کولتوور و گرڎ کەسۍ ڕاو وێشۊ ئانەی پەنەش کریۊ ژیوگەی پارێزنۊ، ئەچێگەوە من و هەریۊ جە هامڕایام "زاناعومەر، وەلید محەممەد، شاخەوان ڕەحمان" ورێستیمۍ پی هەرمانۍ ، تا بتاومۍ دەسبارۍ هەقەتین بیمۍ پەی پارێزنای هامسەنگیی ژیوگەی.
ک.ز
