تێدرۆس ئەدهانۆم گیبریسوس ڕاوەبەری گرڎینوو ڕێکوزیاو تەندروسیی جیهانی ئەرەیاوناش، بەردەوامۍ با جە هامکارییەکاشا پەی وەنەقۆمیایا بوومەلەرزەکاو و ئەرەیاونایچش، ئەگەروو ئانەی هەن ژمارەو قوربانییەکا فرەتەرۍ با.
ڕاوەبەری گرڎینوو ڕێکوزیاو تەندروسیی جیهانی "تێدرۆس ئەدهانۆم گیبریسوس" جە کۆنگرێوە ڕۆنامەنویسینە واتش: "سەرەوەشی جە کەسووکاروو ئا مەرڎا کەرمۍ، کە بۆنەو بوومەلەرزەکاو تورکیای و سووریایۆ گیانشا ئسپارا. ئێمە پەی ڕزگارکەرڎەی ئا خەڵکی هەرمانە کەرمۍ. خەڵک پێویسشا بە پەناگە، وارڎەی، ئاوی پاکە، چەمڎاریی پزیشکی و خزمەتگوزاریی تەندروستی هەن. ڕێکوزیاو تەندروسیی جیهانی (دەبیلو ئێچ ئۆ / WHO) بڕوو ٣ ملیۆن دۆلاراش پێسە هامکاری پەی دۆخوو کتوپڕی جە سندۆقوو فریاکەوتەی پەی هەرمانەکاو فریاکەوتەی و ڕزگارکەرڎەی و مسۆگەرکەرڎەی، بەشێوە جە پێویسییەکا چا دووە وڵاتانە تەرخان کەرڎەن.
گیبریسوس واتش، تەندروستیی جیهانی پێویسیۍ پزیشکیۍ پەی ئاو دووە وڵاتا و یارڎەی و چەمڎاریی پزیشکیی تایبەت مڎۆ پەنەشا. گیبریسوس واتیچش: "ئا تەیارۍ، کە پێویسیی پزیشکی و عەمەلیاتیشا چەنەن ملۆ ئەستەنبوڵ و ئەوی تەریچشا پەی دیمەشقی بۆ. ئێمە ئینایمۍ پلانەو کیانای تەیارەی یەرەمینە".
گیبریسوس ئاماژەیچش پانەیە دا، کە تیمێوە پلەبەرزێچ پەی هەماهەنگی و ڕێکوستەی هەرمانەکاو دەسوەردایەکا "دەبیلو ئێچ ئۆ" کاینیینۍ پەی مەحاڵەکەی و ئانەیچش وات: "جە هەردووە وڵاتەکەنە ٧٧ تیمۍ تەندروسیۍ نیشتمانیۍ و ١٣ تیمۍ تەندروسیۍ بەیننەتەوەیۍ هەرمانە کەرا".
ڕاوەبەری گرڎینوو ڕێکوزیاو تەندروسیی جیهانی ئانەیچش وست ڕووە، چانەی مشۆ ژمارەو مەرڎەکا و بریندارەکاو بومەلەرزەکەیچ بەرزتەر بۆوە.
