کۆردیناسیۆنو جەمەو ژەنا کوردەسانی (کەژەکە)ی سەبارەت بە سەپنای سزاو جە قەنارەدای سەرو وەریشە مورادیێرە ئەرەیاونێوەش وەڵاکەردۆ.

ئەرەیاوناکەینە ئامان، "سەبارەت بە وەریشە مورادیۍ کە ئابو ٢٠٢٣ ێنە جە لایەنو هێزەکا شالیارو ئیتلاعاتو ئێرانیوە بڕفانیۍ بۍ و ئەشکەنجەی قورس دریێبێ،  دووێ ڕوێ چا وەڵتەر سزاو جەقەنارەدایش پەی بڕیەنۆ. ئێمە ئا قەرارە نایاساییە بە تنی رەڎ مکەرمێوە".

جە ئەرەیاوناکەینە ئانەیچ ئامان، "وەریشە مورادیە پەی شەرمەزارکەردەی جەقەنارەدای جە ۋەرکۆتەنە جە ١٠و تشرینو یوەمیۆ دەسش بە مانگێرتەی جەواردەی کەردەبۍ. دماتەریش دۆڵەتو ئێرانی بە شێوێ نایاسایی دژو ئاڎۍ ئا قەرارو جەقەنارەدایش بەر کەرد. پا قەراریە دۆڵەتو ئێرانی تەرسەو وێش جە بەشداری ژەنا جە ئەرەکۆشاینە نیشانەدا. رژێمو ئێرانی کە دژمنایەتی ژەنا مکەرۆ، بە سیاسەتو جەقەنارەدای گەرەگشا مدرامانو ژەنا ماڕۆنە. ئێمە ئا سیاسەتۍ کە دژمنایەتی چنی ژەنا، جەقەنارەدای و قەڎەغەکەردەی کە دەرفەتو پێوەرە ژیوای ئاشتیانەی و دیموکراسیانەو گەلا دلێنە بەرۆ، شەرمەزار مکەرمێ.

'ئەر ئێران گەرەگشا سەرو پەیاوە مەنۆوە، مشۆم بە پاو دیموکراسی و مافەکاو مرۆڤی جمۆوە'

کاتێنە جەهان، بەتایبەت هەرێمەکەما وەرکەوتو مېیامینی بییەن بە گرۆڵیۍ جە ئێری، پاگیری سەرو راسی جەنگی دەردەو گەلا نمەوەرۆ. جەنگ سەرو دەسەڵاتی ژیوایش جە هەرێمەکەمانە سەرەو چێر کەردەن. جە ئاژێوە چامنەنە پاگیری سەرو کردەوەی نادیموکراتیکی دۆڵەتی، دوور جە ئاوەزی و لۆژیکین. ئا راسیە رەق، سەرد و کۆرانەو ئاوەزو نەتەوە دۆڵەتی وەرپەرسا جە فشار وستەی سەرو ژەنا و گەلا. پاگیرتەیرە سەرو راسی نەتەوە دۆڵەتی پاگیریا سەرو درێژەدای بە قەیرانی یاسایی، دیموکراتیک، سەروازی، ئابوری، سیاسی و کۆمەڵایەتیەکا.

جە قۆناغێوەنە کە ئێر جە شارەکا وەرمڎریۆ و کاولۍ کریا، وڵاتەکێ وەرویۆی هۆرشێویاوە و پارچە پارچە مکریانە، جە گرڎو تەمەنەکانە ئینسانەکێ کوشیا، کۆمکوژی دژوار ئەنجام مڎریۆنە، پاگیری سەرو سیاسەتو جەقەنارەدای دەرڎەو حیچ هێزێوە نمەوەرۆ. دۆڵەتو ئێرانی بە پاگیری سەرو دژمنایەتی ژەنا، دژمنایەتی جە ۋەرا ۋەرو مافەکا و دیموکراسینە نمەتاو بیاوۆنە حیچ یاگێ. پا کردەواشە جە جبەرو مرۆڤایەتینە گەرەگشا ژەنا، گەلا چەمتەرسنۍ بکەرۆ، بەڵام مشۆم بزانۆ کە نمەتاو بیاوۆ ئەنجام. پێسەو هېزی ئارۆیچەنە سەرەڕاو سیاسەتو دژمنکارانەو دۆڵەتا وەرا وەر بە دۆڵەتا، وێڕاگیری مکەرا. چی بوارەنە ژەنی حیچشا نییا تا جە دەسش بڎا. بەعەکسۆ، مزانا کە بە مڎرامان متاوانە جەهانێوە ئازاد بەدەسبارانە. بەڵام دەسەڵاتی باڵادەس کە دژمنایەتی وەرا وەر بە ژەنا مکەرا فرەو چێویشا هەن کە بە سیاسەتو جەقەنارەدای و چەوەسنایۆ جەدەسش مڎا. وەرو ئانەیە دەنگو دهۆڵو جەنگی پەی ئێرانیچ چی کاتەنە بە بەرزی مژنەویۆ و ئەر دۆڵەتو ئێرانی گەرەکشا سەرو پەیا وێشۆ مردۆ مشۆم بە پاو دیموکراسی و مافەکا مرۆڤی جمۆوە. فشار، قەنارە، ئەشکەنجە و دەس سەرەرەگیرتەی ماف و ئازادییەکا ئێرانی قەوەت نمەکەرۆ، بەعەکسۆ مەڵامەتو مایۍ سازکەردەی گردو کێشە کۆمەڵایەتیەکان.

'مشۆم قەرارەکە دەمودەس هۆرشنریۆوە، زینانیا ئازاڎۍ بکریا'

پێسەو کەژەکەی ئێمە ماچمێ، مشۆم دۆڵەتو ئێرانی وەڵی ئانەینە کە دێر گنۆ ئا قەراریە هۆرشانۆوە، زینانیا وێڕاگرەکا دەمودەس ئازاڎۍ بکەرۆ، گۆش پەی داواکاری هێزە ئیتنیکی، کۆمەڵایەتییەکا دارۆنە کە داواو مافەکاشا مکەرا، ئەر نا وەرا وەرو ئەرەکۆشاو ژەنانە شکس مارۆنە و دۆڕنۆنەش.

'ئێمە هەڵوێس مگێرمێنە ۋەر، پەرە بە ئەرەکۆشای هامبەشی مڎەیمۍ'

پی بۆنۆ ئێمە سڵام ۋنەو چالاکا مافەکا مرۆڤی پەخشان عەزیزیۍ و وەریشە مورادیۍ و گردو وێڕاگرا ئازادی مکەرمێ کە قەرارو جەقەنارەدایشا سەرەرە سەپیان. ئێمە داوا جە گەلا، لایەنە دیموکراتیکەکا، هێزەکاو ژەنا، کەسایەتیە داکۆکیکارەکا جە مافەکا مرۆڤی مکەرمێ کە وەرا وەرو ئا قەرارا دۆڵەتو ئێرانی جە دژو ژەنا، جە وەرا وەرو سیاسەتو ئەشکەنجەدای و کودەتاچینە هەڵوێس نیشانە بڎانە و ئەرەکۆشای هامبەش پەرەپنە بڎانە. بەتایبەتی ژەنا کوردەسانو ئێمە داوا جە گرڎو ڕێکوزییایەکا ژەنا مکەرمێ کە بە چالاکیەکاشا  دەنگو وێشا بیاونا پا ژەنا کە زینانەکانە بە دژواری ئەشکەنجە مڎریانە، بە سزاو جەقەنارەدای هەوڵ مڎریۆ بێدەنگێ بکریانە و ناچار بە وێدایدەسۆی بکریا ".