جە دوەم ساڵڕۆو سەرهۆرداو "ژەنی، ژیوای، ئازادی"نە لەندەن و پایتەخت و بەریتانیاینە وەردەمو باڵیۆزخانەو ئێرانینە گلیێرۆبییەیۍ سازکریا و چنەشەنە جەخت چانەی کریاوە کە سەرەڕاو گرڎو فشارەکا نمەتاویۊ پاشەکشە بە ژەنا بکریۆ.
بە دەسوەڵێوستەو کۊمیتەو پژاکی جە بەریتانیانە دما نیمەرۆو دوەشەممەی ۱٦ ئەیلوولی وەردەمو باڵیۆزخانەو ئێرانینە بە چالاکیېوە یادو دوەم ساڵڕۆو گەشمەرڎەبېیەو ژینا ئەمینیۍ و سەرهۆرداو شۆڕشو “ژەنی ژیوای ئازادی” جە ۋەرکۆتوو کورڎەسانی و ئێرانەنە بەرزڕاگیریا.
سەرەتاو چالاکییەکەی بە دەیەقێوە بېدەنگی پەی ڕېزۋنەنیای جە گەشمەردا ڕاو ئازادی کورڎەسانی بۍ و دماتەر میهریە ڕەزاییە ئەندامەو مەجلیسو پژاکی جە ئۆرووپانە سەرەڕاو پەرسە و سەرەوەشی وېش پەی بنەیانەو ژینا ئەمینیۍ واتش: "ئارۊ شۆرشو ژەنې ژیوای ئازادی جە سەرنیشتوو کورڎەسانی و ئێرانی و تەنانەت سەرانسەرو جەهانینە بېیەن بە لۆژیکێ ئازاڎی ژەنا، هەرپاسە کۊمارو ئیسلامی ئێرانی پەی تەرسناو گەلو ئېمە و پاشەکشەکەرڎەی بە ژەنا ژمارېوە فرە جە چالاکاش وستێنۍ دلې زینانەکا ئێرانی و بە سەپناو سزای قورسۍ و سزاو جە قەنارەدای سەرو ژەنا سەرمەشقێ ئازادیوازو ئېمە کۊشش مڎۊ دمایی با شۆڕشەو ژەنا بارۆ، بەڵام هەڤاڵا ئېمە بە مڎرامانو ۋېشا تەرسیشا وستێنە دلې سیستەمو کۊمارو ئیسلامی ئێرانی جەزینانە تاریکەکاو ئێرانینە ژەنا گرڎو گەلا ئێرانیشا ئازاڎۍ کەرڎېنێ."
لاو وېشۆ هامسەرۊکۆو جڤاکی ئازادی جە بەریتانیانە، تورکان ئۆزجانە جە پەیامېوەشە هەنە پەی بنەیانەو ژینا ئەمینیۍ سڵامو ڕېزش ئاراسە کەرڎې و هەرپاسە ئاماژەش پانەیەکەرد کە "دۆڵەتو ئێرانی دۆڵەتێوە دیکتاتەور و فاشیستا و ساڵانێوە فرەن ئێرانەنە ئازادی بییەیش نیا، بەتاییبەتت بە گرڎ ڕەنگێوە دژایەتی ژەنا مکەرۊ و ژەنا ئازادیوازی بە مەرام مگېرۆ، بەکوشتەو ژینۍ گرڎ دەنگە ئازادیوازەکۍ گەلا ئێرانی و جەهانیش زېیاتەر پەی ئازادی ژەنا بەگڕوتین کەردۍ. بەتاییبەتت دروشمەو ژەنی ژیوای ئازادی کە دروشمەو ڕابەرو گەلو کورڎی عەبدوڵا ئۆجالانی بې، جە لایەنو ژەنا کورڎی و شۊڕشگەرا ئازاڎی کورڎەسانیۆ وچیېوە، ئارۊ ئی دروشمۍ بېیېنە بە فەلسەفەو ژەنا جەهانی" .
جەبەردەوامی چالاکییەکەینە ئامادەبییەکې بەوەڵاکراوۍ ئینگلیزی و بە 'دروشمەو ژەنې ژیوای ئازادی' و 'بژیۋۊ مڎرامانو ژەنا'، 'بژیۋۊ مڎرامانو زینانەکا'، 'بژیۋۊ ڕابەر ئاپۆ' و 'گەشمەرڎۍ نمەمرا' دماو دۋۍ|دوۍ سەعاتا چالاکییەکە دمایش پنە ئاما.
