جە ١٦و ئەیلوولوو ٢٠٢٢ێنە دماو وەڵابییەیۊ خەبەروو کوشیای "ژینا ئەمینی"یۍ کناچە کورڎەو خەڵکوو شاروو "سەقز"ی، کە بە دەسوو پۊلیسوو ئەخلای دماو گیریایش مەردە، بە وەڵێوەبییەی ژەنا جە تارانۊ تا وەرکەوتوو کورڎسانی، هاموەڵاتیۍ مجیۍ سەروو جاڎەکا و وێشا نیشانە دا.

ئا وێنیشاندایە کە بە نامۍ سەرەوردای "ژەنی، ژیوای، ئازاڎی"یوە سەرتاسەروو دنیێنە وەڵا بییۊ، پەنج مانگێش پەڕ کەردۊ. سەرباروو "کوشتەی، گێرتەی، ئەشکەنجەی و جەداردای" مدرامانەکە درێژەش هەن.

هێزۍ جە شارەكاو "زاهیدانی و خاشی جە پارێزگاو سیستان و بەلووچستان"ی سەرباروو دۊخێوە قورسیی سەروازی و ئەمنی، پەی ویسەم جمعەی سەروو یۊی، ڕاپیمای و وێنیشانداێۍ فراون لوا ڕاوە.

وێنیشاندەرۍ دژوو دیكتاتۊریەتی، سەركوتی و جەداردای درووشمێشا واتێوە، تەماموو ئا هەوڵایچشا ڕەفزێ کەرڎێوە، كە پەی گێڵنایۊ سیستموو پاشایەتی وزیێنۍ هەرمانە.

هاموەخت، وێنیشاندەراو بەلووچی، داواو ئازاڎكەرڎەی زیندانییە سیاسییەکا و دماییئارڎەی بە هەڵمەتەكاو گێرتەی و چڕیەی چالاكاشا كەردە.

وەڵۍ دەسپەنەکەرڎەی وێنیشانەداکەینە "مەولەوی عەبدولحەمید ئیسماعیل زهی" جەماعەتکەروو وتارواچوو مزگیۍ "مەكی زاهیدان"ی وتاروو نماو جومعەینە جارێوە تەر داواش کەردۊ، جە ڕاو ڕیفراندۊمێوە ئازاڎانەیۊ، خەڵك بڕیار جە سیستمۍ سیاسیی ئێرانی بڎا.

هیزیچ شارەكاو "سنە"ی و "سەردەشت"وو وەرکەوتوو كوردستانینە، دژوو گێرتەی ئا مامۊسا ئاینییا، کە پەشتیوانییشا جە وێنیشاندەرا كەردەبۍ، کۊبییەیۊ و ناڕەزایی لوا ڕاوە.

جە دەگاو نەنەڵەو شاروو سنەیچنە، هامشێوەو یەرە جومعەی ویەرڎەی، وەردەموو مزگیی دەگێنە خەڵک کۊبییۊ، دلێشەنە وێنیشاندەرۍ جگە بەروستەی ناڕەزایەتی و بێزاریی وێشا وەراوەروو سیاسەتوو سەركوتی و تۊقنای، كە لاو دەسەڵاتوو ئێرانیوە پەیڕەو کریۊ، داواو دەمودەس ئازاڎكەرڎەی مامۊستا "ئیبراهیم كەریمی"ی نەنەڵەیشا كەردە، كە نزیکوو یەرۍ حەفتان، بە تۊمەتوو پەشتیوانیی جە وێنیشاندایەکا، هێزەكاو دەسەڵاتی گێرتەن.

هاموەخت شاروو سەردەشتیچنە، هاموەڵاتۍ دژوو گێرتەۍ مامۊستا "فەتحوڵڵا ڕۊستەمی"ی مەلاو مزگیی دەگاو "مارەغان" کوۍ بیۍ و داواو ئازاڎكەرڎەی ئا مامۊسا ئاینییەیشا کەرڎە.

فەتحوڵڵا ڕۊستەمی، یۊن چا مامۊسا ئاینییا پەشتیوانییش جە وێنیشاندەرا و داوکارییەکاشا کەرڎێبۍ، ڕۊو ١٤و شوباتینە و جە وەختوو یاونای هامكاری بە وەنەقۊمیایا بوومەلەرزەكەو شارەکەیش، جە لاو هێزەکاو دەسەڵاتیوە نوقتۍ وشکنای "ورمۍ"نە گیریا.

حەر هیزۍ شاروو "گالیكش"وو سەر بە پارێزگاو "گوڵستان"ینە هامشێوەو جومعە ویەردەکا، دژوو دووروستەیۊ "مەولەوی محەمەد حسێن گورگیج"ی مەلاو شاروو "ئازاڎشەهر" کۊبییەیۊ لوا ڕاوە، دلێشنە وێنیشاندەرۍ پەشتیوانیی وێشا پەی وێنیشاندایەکا و سەرەوردای "ژەنی، ژیوای، ئازاڎیی" بەر وست.

جبەروو ئێرانیچنە پەشتیوانییەكۍ جە سەرەوردای "ژەن، ژیوای، ئازاڎی" درێژەش هەن و هیزی جە  وەختوو كەرڎەیۊ ڤیستیڤاڵوو فیلموو "بەرلین"ینە بەشێوە جە ژەنە ئەكتەرەكا، دروشموو "ژەنی، ژیوای، ئازاڎی"یشا بەرز كەردۊ.

حەر جە ئەڵمانیایچنە، كە كۊبییەیۊ ئاسایشوو "میونشن"ی ملۊ ڕاوە، قەرارا یۊ جە نیشتەیرەکاشنە، چێروو ناموونیشانوو "ژەنی، ژیوای، ئازاڎی" تاوتۊو وێنیشاندایەکاو ئێرانی و وەرکەوتوو كورڎسانی کریۊ.

س.ز